Airteagal 11 Sonraí maidir le ceimiceáin in earraí nó i dtáirgí

1.   Mar chuid den ardán sonraí comhchoiteann, déanfaidh ECHA bunachar sonraí a bhunú agus a bhainistiú ina mbeidh sonraí maidir le ceimiceáin in earraí nó i dtáirgí arna nginiúint nó arna gcur isteach mar chuid de chur chun feidhme ghníomhartha dlí an Aontais a liostaítear in Iarscríbhinn V. Dearfaidh an Coimisiún feidhmíochtaí bunachair sonraí ábhartha gaolmhara.

2.   I gcás ina bhfuil na sonraí dá dtagraítear i mír 1 den Airteagal seo i seilbh an Choimisiúin nó ceann de na Gníomhaireachtaí, cuirfidh siad na sonraí sin ar fáil do ECHA lena n-ionchorprú san ardán sonraí comhchoiteann sna formáidí caighdeánacha dá dtagraítear in Airteagal 17, i gcás ina bhfuil fáil orthu, gan mhoill agus, i gcás inarb ábhartha, nuair atá an measúnú bailíochta feidhmithe ag an nGníomhaireacht fhreagrach nó ag an gCoimisiún.

3.   I gcás ina bhfuil na sonraí dá dtagraítear i mír 1 den Airteagal seo i seilbh údaráis inniúla na mBallstát, féadfaidh siad na sonraí sin a chur ar fáil sna formáidí caighdeánacha dá dtagraítear in Airteagal 17, i gcás ina bhfuil fáil orthu, don Ghníomhaireacht fhreagrach faoi ghníomh dlí ábhartha an Aontais a liostaítear in Iarscríbhinn V, nó do ECHA murab ann don ghníomhaireacht sin, a fhéadfaidh na sonraí a óstáil.

4.   Soláthróidh an Coimisiún agus na Gníomhaireachtaí an comhar teicniúil is gá do ECHA chun ionchorprú na sonraí maidir le ceimiceáin in earraí nó i dtáirgí a éascú sa bunachar sonraí dá dtagraítear i mír 1.