Artikolu 11 Data dwar is-sustanzi kimiċi f’artikli jew fi prodotti

1.   L-ECHA għandha tistabbilixxi u tiġġestixxi, bħala parti mill-pjattaforma komuni tad-data, bażi tad-data li jkun fiha data dwar is-sustanzi kimiċi f’artikli jew fi prodotti ġġenerata jew ippreżentata bħala parti mill-implimentazzjoni tal-atti legali tal-Unjoni elenkati fl-Anness V. Il-Kummissjoni għandha tfassal il-funzjonalitajiet rilevanti relatati tal-bażi tad-data.

2.   Fejn il-Kummissjoni jew waħda mill-Aġenziji jkollha d-data msemmija fil-paragrafu 1 ta’ dan l-Artikolu, hija għandha tagħmel dik id-data disponibbli għall-ECHA biex tiġi inkorporata fil-pjattaforma komuni tad-data fil-formati standard kif imsemmija fl-Artikolu 17, fejn disponibbli, mingħajr dewmien u, fejn ikun rilevanti, ladarba l-aġenzija responsabbli jew il-Kummissjoni tkun wettqet il-valutazzjoni tal-validità.

3.   Fejn l-awtoritajiet kompetenti tal-Istati Membri jkollhom id-data msemmija fil-paragrafu 1 ta’ dan l-Artikolu, huma jistgħu jagħmlu dik id-data disponibbli fil-formati standard kif imsemmija fl-Artikolu 17, fejn disponibbli, għall-aġenzija responsabbli skont l-att legali rilevanti tal-Unjoni elenkat fl-Anness V, jew għall-ECHA fin-nuqqas ta’ tali aġenzija, li tista’ tospita d-data.

4.   Il-Kummissjoni u l-Aġenziji għandhom jipprovdu l-kooperazzjoni teknika meħtieġa lill-ECHA biex id-data dwar is-sustanzi kimiċi f’artikli jew fi prodotti tkun tista’ tiġi inkorporata fil-bażi tad-data relatata msemmija fil-paragrafu 1.