Airteagal 12 Sonraí maidir le roghanna malartacha ar shubstaintí ar ábhair imní iad

1.   Mar chuid den ardán sonraí comhchoiteann, déanfaidh ECHA bunachar sonraí a bhunú agus a bhainistiú ina mbeidh sonraí maidir le roghanna malartacha ar shubstaintí ar ábhair imní iad mar a shainmhínítear in Airteagal 2, pointe 27 de Rialachán (AE) 2024/1781 ó Pharlaimint na hEorpa agus ón gComhairle (21) agus roghanna malartacha ar shubstaintí a chomhlíonann na critéir maidir le haicmiú in aicmí guaise dá dtagraítear in Airteagal 2, pointe (27)(b), den Rialachán sin. Áireofar sna sonraí sin sonraí maidir le teicneolaíochtaí malartacha nó ábhair nach dteastaíonn na substaintí sin uathu.

2.   I gcás ina bhfuil sonraí dá dtagraítear i mír 1 i seilbh an Choimisiúin nó ceann de na Gníomhaireachtaí, cuirfidh sé nó sí na sonraí sin ar fáil do ECHA, lena n-ionchorprú san ardán sonraí comhchoiteann.

3.   I gcás ina bhfuil sonraí dá dtagraítear i mír 1 den Airteagal seo i seilbh údaráis inniúla na mBallstát, féadfaidh siad na sonraí sin a chur ar fáil sna formáidí caighdeánacha dá dtagraítear in Airteagal 17, i gcás ina bhfuil fáil orthu, don ghníomhaireacht fhreagrach faoi ghníomh dlí ábhartha an Aontais a liostaítear in Iarscríbhinn I nó, murar ann do ghníomhaireacht den sórt sin, do ECHA, a fhéadfaidh na sonraí a óstáil.

4.   Éascóidh ECHA cur isteach deonach faisnéise dá dtagraítear i mír 1 ag páirtithe leasmhara.