Artikolu 12 Data dwar l-alternattivi għas-sustanzi ta’ tħassib

1.   L-ECHA għandha tistabbilixxi u tiġġestixxi, bħala parti mill-pjattaforma komuni tad-data, bażi tad-data li jkun fiha data dwar l-alternattivi għas-sustanzi ta’ tħassib kif definit fl-Artikolu 2, il-punt 27 tar-Regolament (UE) 2024/1781 tal-Parlament Ewropew u tal-Kunsill (21) u għas-sustanzi li jissodisfaw il-kriterji għall-klassifikazzjoni fil-klassijiet ta’ periklu msemmija fl-Artikolu 2, il-punt (27)(b), ta’ dak ir-Regolament. Dik id-data għandha tinkludi data dwar teknoloġiji jew materjali alternattivi li ma jeħtiġux tali sustanzi.

2.   Meta l-Kummissjoni jew waħda mill-Aġenziji jkollha data kif imsemmi fil-paragrafu 1, hija għandha tagħmel dik id-data disponibbli għall-ECHA biex tiġi inkorporata fil-pjattaforma komuni tad-data.

3.   Fejn l-awtoritajiet kompetenti tal-Istati Membri jkollhom id-data kif imsemmija fil-paragrafu 1 ta’ dan l-Artikolu, huma jistgħu jagħmlu dik id-data disponibbli fil-formati standard kif imsemmija fl-Artikolu 17, fejn disponibbli, għall-aġenzija responsabbli skont l-att legali rilevanti tal-Unjoni elenkat fl-Anness I jew, fin-nuqqas ta’ tali aġenzija, għall-ECHA, li tista’ tospita d-data.

4.   L-ECHA għandha tiffaċilita s-sottomissjoni volontarja ta’ data minn partijiet interessati kif imsemmi fil-paragrafu 1.