Airteagal 20 Úsáid na sonraí ceimiceán atá ar an ardán sonraí comhchoiteann

1.   Féadfaidh na hÚdaráis na sonraí ceimiceán atá san ardán sonraí comhchoiteann nó sa Bhunachar Sonraí d’Fhógraí Staidéir dá dtagraítear in Airteagal 9 a úsáid i bhfeidhmiú aon cheann dá ngníomhaíochtaí, i gcás ina dtacaíonn na gníomhaíochtaí sin le forbairt, cur chun feidhme nó forfheidhmiú dhlí agus bheartas an Aontais.

2.   Ní úsáidfidh na hÚdaráis na sonraí ceimiceán atá san ardán sonraí comhchoiteann chun aon oibleagáidí dlíthiúla de chuid sealbhóirí dualgais a chomhlíonadh seachas chun measúnú a dhéanamh ar iomláine na sonraí ceimiceán arna gcur isteach ag sealbhóirí dualgais nó i gcás ina bhforáiltear, i bhforálacha atá ann cheana, do chomhroinnt agus úsáid sonraí ceimiceán faoi ghníomhartha dlí an Aontais a liostaítear in Iarscríbhinn I.

3.   I gcás ina bhfuil sonraí ceimiceán á n-úsáid san ardán sonraí comhchoiteann a léirítear i gcomhréir le hAirteagal 5(2) mar shonraí nár cuireadh ar fáil don phobal, urramóidh na hÚdaráis an léiriú sin agus ní chuirfidh siad na sonraí sin ar fáil don phobal gan toiliú an tionscnóra.