Artikolu 20 Użu tad-data dwar sustanzi kimiċi li tinsab fil-pjattaforma komuni tad-data

1.   L-Awtoritajiet jistgħu jużaw id-data dwar sustanzi kimiċi li tinsab fil-pjattaforma komuni tad-data jew fil-Bażi tad-Data tan-Notifiki dwar l-Istudji imsemmija fl-Artikolu 9 fit-twettiq ta’ kwalunkwe waħda mill-attivitajiet tagħhom, fejn dawk l-attivitajiet jappoġġaw l-iżvilupp, l-implimentazzjoni jew l-infurzar tal-liġi u tal-politika tal-Unjoni.

2.   L-Awtoritajiet ma għandhomx jużaw id-data dwar sustanzi kimiċi li tinsab fil-pjattaforma komuni tad-data biex jissodisfaw kwalunkwe obbligu legali tad-detenturi tad-dover ħlief għall-valutazzjoni tal-kompletezza tad-data dwar sustanzi kimiċi sottomessa mid-detenturi tad-dover jew fejn id-dispożizzjonijiet eżistenti jipprevedu l-kondiviżjoni u l-użu ta’ data dwar sustanzi kimiċi skont l-atti legali tal-Unjoni elenkati fl-Anness I.

3.   Meta jużaw id-data dwar sustanzi kimiċi li tinsab fil-pjattaforma komuni tad-data li hija indikata skont l-Artikolu 5(2) bħala li ma saritx disponibbli għall-pubbliku, l-Awtoritajiet għandhom jirrispettaw dik l-indikazzjoni u ma għandhomx jagħmlu dik id-data disponibbli għall-pubbliku mingħajr il-kunsens tal-oriġinatur.