Airteagal 25 Rialuithe custaim a bhaineann leis an bpas táirge digiteach

1.   Beidh glantaigh agus dromchlaghníomhaithe úsáideora deiridh a thagann isteach i margadh an Aontais faoi réir fíoruithe agus bearta eile a leagtar síos san Airteagal seo.

2.   Aon duine a bheartaíonn glantach nó dromchlaghníomhaí a chur faoin nós imeachta custaim dar teideal ‘scaoileadh i saorchúrsaíocht’, soláthróidh sé an t-aitheantóir clárúcháin uathúil do na húdaráis chustaim, nó cuirfidh sé ar fáil dóibh é.

3.   Ní fhéadfaidh na húdaráis chustaim glantach nó dromchlaghníomhaí úsáideora deiridh a scaoileadh i saorchúrsaíocht ach amháin tar éis dóibh a fhíorú ar a laghad go bhfreagraíonn an t-aitheantóir clárúcháin uathúil agus an cód tráchtearra arna soláthar nó arna gcur ar fáil dóibh do na sonraí atá stóráilte sa chlárlann. Ní mheasfar an scaoileadh i saorchúrsaíocht a bheith ina chruthúnas ar chomhlíonadh an Rialacháin seo ná aon dlí eile de chuid an Aontais.

4.   Déanfar an fíorú dá dtagraítear i mír 3 go leictreonach agus go huathoibríoch tríd an idirnasc idir an chlárlann agus Córas Malartaithe Deimhnithe de chuid Ionad Ilfhreastail AE maidir le Custam agus beidh feidhm aige ón 23 Meán Fómhair 2029 nó ón dáta a mbeidh an t-idirnasc sin oibríochtúil, cibé acu is déanaí.

5.   Féadfaidh na húdaráis chustaim agus an Coimisiún na sonraí maidir leis an nglantach nó leis an dromchlaghníomhaí úsáideora deiridh a áirítear sa phas táirge digiteach agus sa chlárlann a aisghabháil agus a úsáid chun a ndualgais a dhéanamh de bhun dhlí an Aontais, lena n-áirítear maidir le bainistiú riosca, rialuithe custaim agus scaoileadh i saorchúrsaíocht i gcomhréir le Rialachán (AE) Uimh. 952/2013.

6.   Déanfar na fíoruithe agus na bearta eile a leagtar síos san Airteagal seo ar bhonn an liosta de chóid tráchtearraí agus tuairisc ar tháirgí a leagtar amach in Iarscríbhinn VII.

7.   Tá an tAirteagal seo gan dochar do ghníomhartha dlí eile de chuid an Aontais, go háirithe Rialachán (AE) Uimh. 952/2013 agus Caibidil VII de Rialachán (AE) 2019/1020.