Artikolu 25 Kontrolli doganali relatati mal-passaport diġitali tal-prodott

1.   Id-deterġenti u l-aġenti tensjoattivi għall-utent finali li jidħlu fis-suq tal-Unjoni għandhom ikunu soġġetti għal verifiki u miżuri oħra stabbiliti f'dan l-Artikolu.

2.   Kwalunkwe persuna li jkollha l-ħsieb li tqiegħed deterġent jew aġent tensjoattiv għall-utent finali taħt il-proċedura doganali “rilaxx għal ċirkolazzjoni ħielsa” għandha tipprovdi lill-awtoritajiet doganali jew tagħmel disponibbli għalihom l-identifikatur uniku tar-reġistrazzjoni.

3.   L-awtoritajiet doganali jistgħu jirrilaxxaw deterġent jew aġent tensjoattiv għall-utent finali għal ċirkolazzjoni ħielsa biss wara li jkunu vverifikaw bħala minimu li l-identifikatur uniku tar-reġistrazzjoni u l-kodiċi tal-komodità pprovdut jew magħmul disponibbli għalihom jikkorrispondi mad-data maħżuna fir-reġistru. Ir-rilaxx għal ċirkolazzjoni ħielsa ma għandux jitqies bħala prova ta' konformità ma' dan ir-Regolament jew ma' kwalunkwe liġi oħra tal-Unjoni.

4.   Il-verifika msemmija fil-paragrafu 3 għandha ssir b'mod elettroniku u awtomatiku permezz tal-interkonnessjoni bejn ir-reġistru u s-Sistema ta' Skambju ta' Ċertifikati tat-Tieqa Unika tal-UE għad-Dwana u għandha tapplika mit-23 ta’ Settembru 2029 jew mid-data li fiha l-interkonnessjoni tkun operattiva, skont liema tiġi l-aħħar.

5.   L-awtoritajiet doganali u l-Kummissjoni jistgħu jirkupraw u jużaw id-data dwar id-deterġent jew l-aġent tensjoattiv għall-utent finali inkluża fil-passaport diġitali tal-prodott u fir-reġistru għat-twettiq tad-dmirijiet tagħhom skont il-liġi tal-Unjoni, inkluż il-ġestjoni tar-riskju, il-kontrolli doganali u r-rilaxx għal ċirkolazzjoni ħielsa f'konformità mar-Regolament (UE) Nru 952/2013.

6.   Il-verifiki u miżuri oħra stabbiliti f'dan l-Artikolu għandhom jitwettqu abbażi tal-lista tal-kodiċijiet tal-komodità u d-deskrizzjoni tal-prodotti li tinsab fl-Anness VII.

7.   Dan l-Artikolu huwa mingħajr preġudizzju għal kwalunkwe att legali ieħor tal-Unjoni, b'mod partikolari r-Regolament (UE) Nru 952/2013 u l-Kapitolu VII tar-Regolament (UE) 2019/1020.