IARSCRÍBHINN III GNÍOMHAÍOCHTAÍ ATÁ LE DÉANAMH AG IOMPRÓIRÍ DE CHUID AN AONTAIS AGUS IOMPRÓIRÍ NACH IOMPRÓIRÍ DE CHUID AN AONTAIS IAD

(1)

maidir le cosc: fíorú, le linn luchtú agus díluchtú, agus ina ndiaidh, go mbaintear na millíní plaisteacha den taobh amuigh den mhodh iompair agus de na coimeádáin lasta mar is ceart sula bhfágann siad an tsuiteáil, agus go ndúntar rampaí luchtaithe agus díluchtaithe na modhanna iompair nuair a fhágann siad an tsuiteáil; cumarsáid shoiléir maidir le ceanglais a bhaineann le stuáil shábháilte; seiceáil amhairc a dhéanamh ar shláine phacáistíocht na millíní plaisteacha roimh an turas; a áirithiú go n-úsáidtear cumhdaigh chosanta ar fhorcardaitheoirí/trealamh hiodrálach, mar shampla, chun polladh pacáistíochta a chosc; aon sceitheadh le linn an turais iompair a chosc, mar shampla trína áirithiú go bhfuil na modhanna iompair oiriúnach go teicniúil agus go bhforlíontar na coimeádáin lasta, más gá, le séalú iomchuí; na hurranna luchtaithe, na coimeádáin lasta agus na leantóirí a ghlanadh go tráthrialta chun caillteanas millíní plaisteacha doirte a íoslaghdú; seiceáil amhairc a dhéanamh ar oscailtí agus sláine na n-urrann luchtaithe, na gcoimeádán lasta agus na leantóirí chun caillteanas na millíní plaisteacha a imshrianadh agus a íoslaghdú roimh an aistear agus lena linn, a mhéid is féidir, lena n-áirítear sna críochfoirt ilmhódacha, críochfoirt iarnróid, calafoirt intíre agus calafoirt chósta.

(2)

maidir le himshrianadh agus glantachán: i gcás inar féidir, pacáistíocht a ndearnadh damáiste di a dheisiú le linn iompair agus na millíní plaisteacha atá fágtha a imshrianadh in urrann an lasta; na millíní plaisteacha a doirteadh a bhailiú i gcoimeádáin nó málaí dúnta lena ndiúscairt go cuí; i gcás ina n-iompraítear millíní plaisteacha in ollumair, gan an dúnpholl/cón ag bun an umair sadhlainne a oscailt go dtí go rachaidh sé isteach sa bhá ghlantacháin; gan an líneáil choimeádáin a ionadú ach amháin i limistéir oscailte neamhphoiblí, mar a mbeifear in ann aon doirteadh a imshrianadh; fógra a thabhairt do na húdaráis iomchuí, mar shampla údaráis éigeandála idirnáisiúnta agus náisiúnta nó údaráis chomhshaoil an Bhallstáit inar tharla an caillteanas.

(3)

trealamh ar bord: gaireas soilsiúcháin iniompartha amháin ar a laghad, uirlisí láimhe (e.g. scuaba, sluasaidíní agus scuaibíní, buicéid, téipeanna deisithe, etc.); coimeádáin bhailiúcháin dhúnta/málaí bailithe treisithe.