5.2 Raon feidhme an údaraithe

In éagmais raon feidhme aonfhoirmeach údaraithe arna leagan amach i ndlí an AE, d’fhéadfadh go mbeadh córais éagsúla i bhfeidhm ar an leibhéal náisiúnta. Dá réir sin, i gcás ina bhfuil córais ‘údarú uilíoch’ i bhfeidhm, clúdaíonn an t-údarú na gníomhaíochtaí go léir a liostaítear in Iarscríbhinn I CRD agus de réir an dlí náisiúnta.

Os a choinne sin, i gcás nach bhfuil aon ‘údarú uilíoch’ den sórt sin i bhfeidhm, eiseofar an t-údarú ar bhonn gníomhaíochta de réir gníomhaíochta agus ní chumhdóidh sé ach na gníomhaíochtaí sonracha a ndeonaítear an t-údarú ina leith. Sa chás deireanach sin, ba cheart d’údaráis inniúla a measúnú a nuashonrú maidir le raon feidhme an údaraithe a eisíodh roimhe seo aon uair a dhéanann an institiúid creidmheasa iarratas chun a gnó a leathnú chuig gníomhaíochtaí nach gcumhdaítear leis an údarú eisithe. Ba cheart measúnú den sórt sin a dhéanamh go comhsheasmhach leis an treoir atá leagtha amach i mír 20.

Sa dá chás a chuimsítear le míreanna 57 agus 58, ba cheart, áfach, go gcuimseofaí i raon feidhme mheasúnú na n-údarás inniúil na gníomhaíochtaí go léir a shamhlaítear i gclár na n-oibríochtaí.