Airteagal 7 Pleananna réamhghabhálacha grúpa téarnaimh

1.   Áiritheoidh na Ballstáit go mbeidh sé de chumhacht ag an maoirseoir grúpa a cheangal ar mháthairghnóthas deiridh grúpa plean réamhghabhálach grúpa téarnaimh a tharraingt suas agus a chur faoi bhráid an mhaoirseora grúpa.

Plean réamhghabhálach grúpa téarnaimh ar a bhfuil an máthairghnóthas deiridh i gceannas a bheidh sna pleananna réamhghabhálacha grúpa téarnaimh. Sainaithneofar sa phlean réamhghabhálach grúpa téarnaimh gníomhaíochtaí ceartaitheacha a bhféadfadh gá a bheith lena gcur chun feidhme ar leibhéal an mháthairghnóthais deiridh sin agus ar leibhéal a fhoghnóthas aonair chun a staid airgeadais a athbhunú i gcás ina bhfuil meath suntasach tagtha ar an staid sin.

Forchuirfidh an maoirseoir grúpa an ceanglas dá dtagraítear sa chéad fhomhír ar bhonn na gcritéar dá dtagraítear in Airteagal 5(2) nó (3), de réir mar is infheidhme.

2.   Beidh bearta ceartaitheacha sa phlean réamhghabhálach grúpa téarnaimh chun cobhsaíocht an ghrúpa, nó chun cobhsaíocht aon ghnóthais árachais nó athárachais de chuid an ghrúpa, a bhaint amach, nuair atá an grúpa nó aon cheann de ghnóthais árachais nó athárachais an ghrúpa i riocht anáis, chun aghaidh a thabhairt ar chúiseanna an anáis sin nó chun iad a bhaint, agus chun staid airgeadais an ghrúpa nó an ghnóthais ar cuid den ghrúpa é a athbhunú, agus an tráth céanna staid airgeadais ghrúpeintiteas eile a chur san áireamh.

Beidh socruithe sa phlean réamhghabhálach grúpa téarnaimh chun comhordú agus comhsheasmhacht beart comhréireach a thógfar ar leibhéal an ghrúpa agus na ngrúpeintiteas a áirithiú.

3.   Déanfar an plean réamhghabhálach grúpa téarnaimh, agus aon phlean arna tharraingt suas le haghaidh fhoghnóthais árachais nó athárachais aonair, a tharraingt suas i gcomhréir le hAirteagal 5(5) go (8), agus déanfar iad a thabhairt cothrom le dáta i gcomhréir le hAirteagal 5(4).

I gcomhréir le hAirteagal 5(8), an triú fomhír, cuirfear socruithe iomchuí i bhfeidhm chun faireachán tráthrialta a dhéanamh ar na táscairí.

Sainaithneofar sa phlean réamhghabhálach grúpa téarnaimh cé acu atá bacainní ar chur chun feidhme na mbeart ceartaitheach laistigh den ghrúpa nó nach bhfuil, lena n-áirítear ar leibhéal na n-eintiteas aonair a chumhdaítear leis an bplean, agus cé acu atá baic phraiticiúla nó dhlíthiúla shuntasacha ar chistí dílse a aistriú go pras nó ar dhliteanais nó sócmhainní a aisíoc laistigh den ghrúpa nó nach bhfuil.

4.   Féadfaidh na húdaráis mhaoirseachta ceangal a chur ar fhoghnóthais árachais nó athárachais nó ar na heintitis dá dtagraítear in Airteagal 1(1), pointí (c) agus (d), pleananna réamhghabhálacha téarnaimh a tharraingt suas agus a chur isteach i gcás nach ann do phlean réamhghabhálach grúpa téarnaimh.

5.   I gcás ina measfaidh an t-údarás maoirseachta lena mbaineann nach bhfuil eintiteas á chur san áireamh go leordhóthanach ag an bplean réamhghabhálach grúpa téarnaimh i bhfianaise thábhacht an eintitis i dtrácht sa Bhallstát lena mbaineann agus i bhfianaise na n-oibleagáidí a bhfuil gnóthais inchomparáide sa Bhallstát sin faoina réir, féadfaidh sé a iarraidh ar an maoirseoir grúpa, ar bhonn tuairim réasúnaithe, a cheangal ar an máthairghnóthas deiridh, nó ar an gcuideachta sealbhaíochta árachais atá i gceannas ar an ngrúpa, plean réamhghabhálach grúpa téarnaimh athbhreithnithe a chur isteach agus na hábhair imní a chuir an t-údarás maoirseachta lena mbaineann in iúl á gcur san áireamh. I gcás ina bhfuil plean réamhghabhálach grúpa téarnaimh athbhreithnithe curtha isteach measfaidh an t-údarás maoirseachta lena mbaineann nach dtugann an plean athbhreithnithe sin aghaidh go leordhóthanach ar na hábhair imní atá aige, féadfaidh sé a cheangal ar na foghnóthais árachais nó athárachais nó ar na heintitis dá dtagraítear in Airteagal 1(1), pointí (c) agus (d), lena mbaineann, plean réamhghabhálach téarnaimh a tharraingt suas agus a chur isteach. Sa chás sin, cuirfidh an t-údarás maoirseachta tuairim réasúnaithe ar fáil don mhaoirseoir grúpa maidir leis an measúnú sin. Ina dhiaidh sin, cuirfidh sé an plean réamhghabhálach téarnaimh ar fáil don mhaoirseoir grúpa.

6.   Déanfaidh an maoirseoir grúpa, ar choinníoll go gcomhlíonfar na ceanglais rúndachta a leagtar síos in Airteagal 66, na pleananna réamhghabhálacha grúpa téarnaimh a tharchur chuig:

7.   Comhlacht riaracháin, bainistíochta nó maoirseachta an eintitis a bhfuil an plean réamhghabhálach grúpa téarnaimh de bhun mhír 1 nó an plean réamhghabhálach téarnaimh de bhun mhír 4 nó mír 5 á tharraingt suas aige, déanfaidh sé an plean lena mbaineann a mheasúnú agus a fhormheas sula gcuirfidh sé faoi bhráid an mhaoirseora grúpa nó an údaráis maoirseachta é, de réir mar is iomchuí, lena athbhreithniú.

8.   Agus pleananna réamhghabhálacha téarnaimh á dtarraingt suas, féadfaidh foghnóthas de chuid an Aontais aon phlean grúpa maidir le téarnamh réamhghabhálach arna tharraingt suas ag na gnóthais árachais nó athárachais tríú tír nó ag na máthairghnóthais tríú tír ar foghnóthas díobh é a chur san áireamh, i gcás inarb infheidhme.