Airteagal 71 Coláistí réitigh Eorpacha

1.   I gcás ina bhfuil foghnóthais de chuid an Aontais, arna mbunú in dhá Bhallstát nó níos mó ná sin, nó dhá bhrainse de chuid an Aontais nó níos mó de ghnóthas tríú tír ag gnóthas árachais nó athárachais nó máthairghnóthas tríú tír a measann dhá Bhallstát nó níos mó ná sin gur brainsí suntasacha iad, féadfaidh údaráis réitigh na mBallstát ina bhfuil na foghnóthais sin de chuid an Aontais bunaithe nó ina bhfuil na brainsí de chuid an Aontais sin de ghnóthas tríú tír lonnaithe, féadfaidh na húdaráis sin coláiste réitigh Eorpach a bhunú.

2.   Déanfaidh an coláiste réitigh Eorpach na feidhmeanna agus na cúraimí a shonraítear in Airteagal 70 i ndáil le foghnóthais de chuid an Aontais agus, a mhéid atá na cúraimí sin ábhartha, i ndáil le brainsí de chuid an Aontais de ghnóthas tríú tír dá dtagraítear i mír 1 den Airteagal seo agus feidhmeoidh sé seachas sin i gcomhréir leis na rialacha a leagtar síos in Airteagal 70.

3.   I gcás nach sealbhaíonn ach máthairghnóthas amháin atá bunaithe i mBallstát foghnóthais uile an Aontais de ghnóthas árachais nó athárachais tríú tír nó de mháthairghnóthas tríú tír, is é údarás réitigh an Bhallstáit ina bhfuil an máthairghnóthas sin bunaithe a bheidh ina chathaoirleach ar an gcoláiste réitigh Eorpach.

I gcás nach mbeidh feidhm ag an gcéad fhomhír, is é údarás réitigh an Bhallstáit ina bhfuil foghnóthas de chuid an Aontais, ar airde luach na sócmhainní cláir chomhardaithe a shealbhaíonn sé, bunaithe, is é an t-údarás réitigh sin a ghníomhóidh mar chathaoirleach ar an gcoláiste réitigh Eorpach.