5.5. Funzjonijiet ta’ kontroll intern

Fil-valutazzjoni tal-funzjonijiet ta’ kontroll intern tal-istituzzjoni, l-awtoritajiet kompetenti għandhom jivvalutaw il-konformità tal-istituzzjoni mal-Linji Gwida tal-EBA dwar il-Governanza Interna u d-dispożizzjonijiet rilevanti tar-Regolament (UE) 2022/2554 (DORA)²¹ . F’dan il-kuntest, l-awtoritajiet kompetenti għandhom jikkunsidraw inter alia jekk:

• a. l-istituzzjoni għandhiex qafas ta’ kontroll intern li huwa xieraq biex ikopri l-oqsma kollha, skont il-mudell tat-“tliet linji ta’ difiża”, inklużi funzjonijiet ta’ ġestjoni tar-riskju, konformità u awditjar intern li jaħdmu tajjeb, b’mod effettiv u indipendenti;
• b. il-kapijiet tal-funzjonijiet ta’ kontroll intern (i) humiex stabbiliti f’livell ġerarkiku adegwat li jipprovdihom bl-awtorità u l-pożizzjoni xierqa meħtieġa biex iwettqu r-responsabbiltajiet tagħhom, (ii) għandhomx aċċess dirett u jistgħux jirrapportaw direttament lill-korp maniġerjali fil-funzjoni superviżorja tiegħu, u (iii) għandhomx ir-riżorsi kollha meħtieġa biex iwettqu l-kompiti tagħhom;
• c. l-istituzzjoni għandhiex politiki ta’ kontroll intern miktuba adegwati li ġew implimentati b’mod effettiv u allokazzjoni ċara tar-responsabbiltajiet għall-implimentazzjoni tal-qafas, segregazzjoni tad-dmirijiet, proċeduri amministrattivi u ta’ kontabilità sodi u arranġamenti robusti għar-rapportar.

²¹ DORA - Ir-Regolament (UE) 2022/2554 tal-Parlament Ewropew u tal-Kunsill tal-14 ta’ Diċembru 2022 dwar ir-reżiljenza operazzjonali diġitali għas-settur finanzjarju u li jemenda r-Regolamenti (KE) Nru 1060/2009, (UE) Nru 648/2012, (UE) Nru 600/2014, (UE) Nru 909/2014 u (UE) 2016/1011 (ĠU L 333, 27.12.2022, p. 1, ELI: http://data.europa.eu/eli/reg/2022/2554/oj).

L-awtoritajiet kompetenti għandhom jivvalutaw jekk il-funzjoni tal-ġestjoni tar-riskju tkoprix l-istituzzjoni kollha, billi tadotta perspettiva olistika tar-riskji kollha, hijiex involuta b’mod attiv f’fażi bikrija fl-elaborazzjoni tal-istrateġija tar-riskju tal-istituzzjoni u tissorveljax l-implimentazzjoni effettiva tagħha. L-awtoritajiet kompetenti għandhom jiddeterminaw ukoll jekk il-funzjoni tal-ġestjoni tar-riskju tipprovdix lill-korp maniġerjali b’informazzjoni kompleta, aġġornata u rilevanti relatata mar-riskju sabiex ikun jista’ jistabbilixxi l-livell tal-aptit għar-riskju u l-limiti tar-riskju relatati tal-istituzzjoni. L-awtoritajiet kompetenti għandhom jikkunsidraw ukoll il-valutazzjoni tal-funzjoni tal-ġestjoni tar-riskju dwar ir-robustezza u s-sostenibbiltà tal-istrateġija tar-riskju u tal-aptit għar-riskju kif ukoll l-involviment tagħha fl-evalwazzjoni tal-impatt ta’ bidliet materjali jew tranżazzjonijiet eċċezzjonali fuq ir-riskju globali tal-istituzzjoni u tal-grupp (fejn applikabbli).

L-awtoritajiet kompetenti għandhom jivvalutaw jekk il-funzjoni ta’ konformità tivvalutax u timmitigax b’mod effettiv ir-riskji ta’ konformità li jirriżultaw min-nuqqas ta’ konformità mar-rekwiżiti legali u regolatorji applikabbli, mal-obbligi kuntrattwali jew mar-regoli interni u mal-kodiċijiet ta’ kondotta, inklużi r-regoli dwar l-etika, u jekk tiżgurax li d-deċiżjonijiet materjali kollha dwar il-ġestjoni tar-riskju jqisu b’mod adegwat dawn ir-riskji.

L-awtoritajiet kompetenti għandhom jivvalutaw jekk il-funzjoni ta’ awditjar intern tivverifikax b’mod indipendenti u tipprovdix assigurazzjoni oġġettiva, f’konformità mal-pjan tal-awditu u l-programm tax-xogħol dettaljat, dwar l-adegwatezza u l-effettività tal-politiki, il-proċeduri u l-kontrolli interni tal-istituzzjoni u dwar il-konformità tal-attivitajiet kollha tal-istituzzjoni, inklużi l-attivitajiet ipprovduti minn fornituri terzi ta’ servizzi, mar-rekwiżiti legali u regolatorji. Fejn ikun applikabbli, l-awtoritajiet kompetenti għandhom jivvalutaw jekk il-funzjoni ta’ awditjar intern fil-livell tal-grupp hijiex indipendenti, għandhiex pjan tal-awditu bbażat fuq ir-riskju fil-livell tal-grupp, għandhiex riżorsi u statura xierqa u għandhiex linja ta’ rapportar diretta lill-korp maniġerjali tal-istituzzjoni konsolidanti.