5.7. Sistemi tal-ICT, aggregazzjoni tad-data tar-riskju u rapportar tar-riskju

L-awtoritajiet kompetenti għandhom jivvalutaw jekk is-sistemi tal-ICT tal-istituzzjoni humiex affidabbli, reżiljenti u adegwati biex ikejlu, jivvalutaw u jirrapportaw dwar id-daqs, il-kompożizzjoni u l-kwalità tal-iskoperturi fit-tipi ta’ riskju, il-prodotti u l-kontropartijiet kollha tal-istituzzjoni, u jappoġġawx b’mod sħiħ il-kapaċitajiet ta’ aggregazzjoni tad-data tar-riskju fi żminijiet normali u fi żminijiet ta’ stress.

L-awtoritajiet kompetenti għandhom jivverifikaw jekk l-istituzzjoni tiżviluppax u żżommx aggregazzjoni xierqa ta’ data tar-riskju u kapaċitajiet ta’ rapportar tar-riskju proporzjonati għall-profil tar-riskju u l-importanza sistemika tagħha. Meta jkunu qed jirrieżaminaw il-kapaċitajiet tal-aggregazzjoni tad-data tar-riskju u r-rapportar tar-riskju tal-istituzzjoni, l-awtoritajiet kompetenti għandhom jieħdu inkunsiderazzjoni l-prinċipji tal-BCBS 239 għall-aggregazzjoni effettiva tad-data tar-riskju u r-rapportar tar-riskju²⁵ għall-istituzzjonijiet sorveljati li jaqgħu taħt il-kamp ta’ applikazzjoni ta’ dawk il-prinċipji. B’mod partikolari, l-awtoritajiet kompetenti għandhom jivvalutaw jekk l-istituzzjoni hijiex kapaċi tiġġenera data u rapportar dwar ir-riskju preċiżi, konsistenti, kompleti u affidabbli għall-istituzzjoni kollha, filwaqt li jkopru r-riskji materjali kollha, u jirriflettu b’mod xieraq il-profil tar-riskju u l-ħtiġijiet tal-kapital u tal-likwidità tal-istituzzjoni, u jekk dawn jistgħux jiġu aggregati u jsiru disponibbli fil-ħin u b’mod flessibbli għall-korp maniġerjali u għall-maniġment superjuri. Fejn applikabbli, l-awtoritajiet kompetenti għandhom jivvalutaw jekk l-istituzzjoni tkunx stabbilixxiet sistema effettiva ta’ informazzjoni maniġerjali u rapportar fil-grupp kollu applikabbli għall-unitajiet operatorji u l-entitajiet legali kollha, u jekk din l-informazzjoni hijiex disponibbli fil-ħin għall-korp maniġerjali tal-impriża omm tal-istituzzjoni.

²⁵ Kumitat ta’ Basel dwar il-Prinċipji tas-Superviżjoni Bankarja għal aggregazzjoni effettiva tad-data tar-riskju u r-rapportar tar-riskju (BCBS 239).

L-awtoritajiet kompetenti għandhom jiddeterminaw jekk il-korp maniġerjali tal-istituzzjoni japprovax il-qafas tal-aggregazzjoni tad-data dwar ir-riskju u tar-rapportar tar-riskju tal-istituzzjoni u jissorveljax l-implimentazzjoni effettiva tiegħu, inkluż l-użu ta’ riżorsi adegwati biex jappoġġaw dawn l-isforzi. L-awtoritajiet kompetenti għandhom jivvalutaw ukoll jekk il-kapaċitajiet tal-istituzzjoni għall-aggregazzjoni tad-data dwar ir-riskju u l-prattiki tagħha ta’ rapportar tar-riskju humiex ivvalidati f’konformità mal-qafas ta’ kontroll intern tal-istituzzjoni.