Artikolu 12 Ditti tal-investiment żgħar u mhux interkonnessi

B’deroga mid-dispożizzjonijiet tat-Titolu II, għall-finijiet tal-punti (a), (b), (c), (e), (f), sa fejn dan il-punt ikun marbut mal-NPR u (g) tal-ewwel subparagrafu, għandhom japplikaw il-valuri ta’ tmiem il-jum.

Għall-finijiet tal-punt (f) tal-ewwel subparagrafu, sa fejn dak il-punt ikollu x’jaqsam mas-CMG, għandhom japplikaw il-valuri ta’ matul l-istess jum.

Għall-finijiet tal-punt (d), tal-ewwel subparagrafu ta' dan il-paragrafu, u mingħajr preġudizzju għall-Artikolu 16(9) tad-Direttiva 2014/65/UE u l-Artikoli 2 u 4 tad-Direttiva Delegata (UE) 2017/593, għandhom japplikaw il-valuri ta’ matul l-istess jum, ħlief fejn kien hemm żball fiż-żamma tar-rekords jew fir-rikonċiljazzjoni tal-kontijiet li b'mod żbaljat indika li ditta tal-investiment kisret il-livell limitu żero msemmi fil-punt (d) tal-ewwel subparagrafu ta' dan il-paragrafu, u li jiġi solvut qabel ma jintemm il-jum ta' negozju. Id-ditta tal-investiment għandha tinnotifika lill-awtorità kompetenti mingħajr dewmien dwar l-iżball, ir-raġunijiet għalfejn seħħ u l-korrezzjoni tiegħu.

Għall-finijiet tal-punti (h) u (i) tal-ewwel subparagrafu, għandhom japplikaw il-livelli fi tmiem l-aħħar sena finanzjarja li fir-rigward tagħha l-kontijiet ġew iffinalizzati u approvati mill-bord maniġerjali. Fejn il-kontijiet ikunu għadhom ma ġewx iffinalizzati u approvati wara sitt xhur mit-tmiem tal-aħħar sena finanzjarja, ditta tal-investiment għandha tuża kontijiet proviżorji.

Ditti tal-investiment jistgħu jkejlu l-valuri taħt il-punti (a) u (b) tal-ewwel subparagrafu billi tuża l-metodi speċifikati taħt it-Titolu II, bl-eċċezzjoni li l-kejl għandu jsir fuq medda ta’ 12-il xahar, mingħajr l-esklużjoni tal-valuri mensili tal-aktar tliet xhur reċenti. Ditti tal-investiment li jagħżlu dan il-metodu ta’ kejl għandhom jinnotifikaw lill-awtorità kompetenti b'dan u għandhom japplikaw il-metodu magħżul għal perijodu kontinwu ta’ mhux inqas minn 12-il xahar konsekuttivi.

Il-kondizzjonijiet stabbiliti fil-punti (c) sa (g) tal-paragrafu 1 għandhom japplikaw għal kull ditta tal-investiment fuq bażi individwali.

B’deroga mill-ewwel subparagrafu, fejn ditta tal-investiment ma tibqax tissodisfa l-kondizzjonijiet stabbiliti fil-punti (a), (b), (h) jew (i) tal-paragrafu 1 iżda tibqa’ tissodisfa l-kondizzjonijiet stabbiliti fil-punti (c) sa (g) ta’ dak il-paragrafu, din ma għandhiex tibqa' titqies bħala ditta tal-investiment żgħira u mhux interkonnessa wara perijodu ta’ tliet xhur, ikkalkolati mid-data li fiha jkun inqabeż il-livell limitu. Id-ditta tal-investiment għandha tinnotifika lill-awtorità kompetenti mingħajr dewmien bla bżonn ta' kwalunkwe ksur ta’ livell limitu.