Artikolu 96 Rieżami

Sat-12 ta’ Frar 2026, il-Kummissjoni għandha tirrieżamina l-implimentazzjoni ta’ dan ir-Regolament u għandha tippreżenta rapport dwarha lill-Parlament Ewropew u lill-Kunsill. Hija għandha tal-anqas tivvaluta dan li ġej:

l-adegwatezza u s-suffiċjenza tar-riżorsi finanzjarji disponibbli għall-awtorità ta’ riżoluzzjoni biex tkopri t-telf li jirriżulta minn eventi mhux ta’ inadempjenza;

L-ammont ta’ riżorsi proprji tas-CCP li għandu jintuża għall-irkupru u r-riżoluzzjoni u l-mezzi għall-użu tiegħu; u

jekk l-għodod ta’ riżoluzzjoni disponibbli għall-awtorità ta’ riżoluzzjoni humiex adegwati.

Fejn xieraq, ir-rapport għandu jkun akkumpanjat minn proposti għal reviżjoni ta’ dan ir-Regolament.

Sal-31 ta’ Diċembru 2021, il-Kummissjoni għandha tirrieżamina l-applikazzjoni tal-Artikolu 27(7). Il-Kummissjoni għandha tivvaluta b’mod partikolari l-ħtieġa għal kwalunkwe emenda ulterjuri fir-rigward tal-applikazzjoni tal-għodda ta’ valutazzjoni negattiva u ta’ konverżjoni f’każ ta’ riżoluzzjoni tas-CCPs flimkien ma’ għodod oħra ta’ riżoluzzjoni li jirriżultaw f’telf finanzjarju li jiġġarrab mill-membri tal-ikklirjar. Il-Kummissjoni għandha tippreżenta rapport dwar dan lill-Parlament Ewropew u lill-Kunsill, akkumpanjat fejn xieraq minn proposti għar-reviżjoni ta’ dan ir-Regolament.

Sat-12 ta’ Awwissu 2027, il-Kummissjoni għandha teżamina mill-ġdid dan ir-Regolament u l-implimentazzjoni tiegħu u għandha tivvaluta l-effikaċja tal-arranġamenti tal-governanza għall-irkupru u r-riżoluzzjoni tas-CCPs fl-Unjoni u tippreżenta rapport dwarhom lill-Parlament Ewropew u lill-Kunsill, akkumpanjat fejn xieraq minn proposti għal reviżjoni ta’ dan ir-Regolament.