Artikolu 24b Konsultazzjoni tal-banek ċentrali tal-ħruġ

Fir-rigward tal-valutazzjonijiet superviżorji mwettqa b’rabta mal-Artikoli 41, 44, 46, 50 u 54 u deċiżjonijiet li għandhom jittieħdu skont dawn l-Artikoli li jirrigwardaw CCPs tal-Grad 2, il-Kumitat Superviżorju tas-CCPs għandu jikkonsulta lill-banek ċentrali tal-ħruġ imsemmijin fl-Artikolu 25(3), il-punt (f). Kull bank ċentrali tal-ħruġ jista’ jirrispondi. Meta l-bank ċentrali tal-ħruġ jiddeċiedi li jwieġeb, huwa għandu jagħmel dan fi żmien 10 ijiem tax-xogħol minn meta jirċievi l-abbozz ta’ deċiżjoni. F’sitwazzjonijiet ta’ emerġenza, dak il-perjodu ma għandux jaqbeż l-24 siegħa. Meta bank ċentrali tal-ħruġ jipproponi emendi jew joġġezzjona għall-valutazzjonijiet relatati jew l-abbozzi ta’deċiżjonijiet skont l-Artikoli 41, 44, 46, 50 u 54, għandu jipprovdi r-raġunijiet kollha u fid-dettall, bil-miktub. Malli jiskadi l-perjodu għall-konsultazzjoni, il-Kumitat Superviżorju tas-CCPs għandu jikkunsidra b’mod debitu r-risposta u kwalunkwe emenda proposta mill-banek ċentrali tal-ħruġ u jipprovdi l-valutazzjoni tiegħu lill-bank ċentrali tal-ħruġ.

Meta l-Kumitat Superviżorju tas-CCPs ma jirriflettix fl-abbozz ta’ deċiżjoni tiegħu l-emendi proposti minn bank ċentrali tal-ħruġ, il-Kumitat Superviżorju tas-CCPs għandu jinforma lil dak il-bank ċentrali tal-ħruġ bil-miktub waqt li jiddikjara r-raġunijiet kollha tiegħu għalfejn ma jkunx ħa kont tal-emendi proposti minn dak il-bank ċentrali tal-ħruġ, u jipprovdi spjegazzjoni għal kwalunkwe devjazzjoni minn dawk l-emendi. Il-Kumitat Superviżorju tas-CCPs għandu jippreżenta lill-Bord tas-Superviżuri r-risposti riċevuti u l-emendi proposti minn banek ċentrali tal-ħruġ u l-ispjegazzjonijiet tiegħu għalfejn ma jkunx ħa kont tagħhom flimkien mal-abbozz ta’ deċiżjoni tiegħu.

Fir-rigward tad-deċiżjonijiet li għandhom jittieħdu skont l-Artikoli 25(2c) u 85(6), il-Kumitat Superviżorju tas-CCPs għandu jfittex il-qbil tal-banek ċentrali tal-ħruġ imsemmijin fil-punt (f) tal-Artikolu 25(3) għall-kwistjonijiet relatati mal-muniti maħruġa minnhom. Għandu jkun ikkunsidrat li kull bank ċentrali tal-ħruġ ta l-qbil tiegħu sakemm il-bank ċentrali tal-ħruġ ma jipproponix emendi jew ma joġġezzjonax fi żmien għaxart ijiem tax-xogħol mit-trasmissjoni tal-abbozz ta’ deċiżjoni. Fejn bank ċentrali tal-ħruġ jipproponi emendi jew joġġezzjona għal abbozz ta’ deċiżjoni, huwa għandu jipprovdi r-raġunijiet kollha u fid-dettall, bil-miktub. Fejn bank ċentrali tal-ħruġ jipproponi emendi fir-rigward ta’ kwistjonijiet relatati mal-munita maħruġa minnu, il-Kumitat Superviżorju tas-CCPs jista’ biss jippreżenta lill-Bord tas-Superviżuri l-abbozz ta’ deċiżjoni kif emendat fir-rigward ta’ dawk il-kwistjonijiet. Fejn bank ċentrali tal-ħruġ joġġezzjona fir-rigward ta’ kwistjonijiet relatati mal-munita maħruġa minnu, il-Kumitat Superviżorju tas-CCPs ma għandux jinkludu dawk il-kwistjonijiet fl-abbozz ta’ deċiżjoni lill-Bord tas-Superviżuri għall-adozzjoni.