Artikolu 2 Definizzjonijiet

Japplikaw ukoll id-definizzjonijiet li ġejjin:

“superviżur finanzjarju” tfisser superviżur responsabbli għall-istituzzjonijiet ta' kreditu u l-istituzzjonijiet finanzjarji;

“superviżur mhux finanzjarju” tfisser superviżur responsabbli għas-settur mhux finanzjarju;

“settur mhux finanzjarju” tfisser l-entitajiet marbutin b'obbligu elenkati fl-Artikolu 3, il-punt (3), tar-Regolament (UE) 2024/1624.

“entità marbuta b'obbligu” tfisser persuna fiżika jew ġuridika elenkata fl-Artikolu 3 tar-Regolament (UE) 2024/1624 li mhijiex eżentati f'konformità mal-Artikoli 4, 5, 6 jew 7 ta' dak ir-Regolament;

“Stat Membru domiċiljari” tfisser l-Istat Membru fejn jinsab l-uffiċċju reġistrat tal-entità marbuta b'obbligu jew, jekk l-entità marbuta b'obbligu ma jkollhiex uffiċċju reġistrat, l-Istat Membru li fih jinsab l-uffiċċju prinċipali tagħha;

“Stat Membru ospitanti” tfisser Stat Membru, li ma jkunx l-Istat Membru domiċiljari, li fih l-entità marbuta b'obbligu topera stabbiliment, bħal sussidjarja jew fergħa, jew fejn l-entità marbuta b’obbligu topera bil-libertà li tipprovdi servizzi permezz ta’ infrastruttura.

“awtoritajiet doganali” tfisser l-awtoritajiet doganali kif definiti fl-Artikolu 5, il-punt (1), tar-Regolament (UE) Nru 952/2013 tal-Parlament Ewropew u tal-Kunsill (34) u l-awtoritajiet kompetenti kif definiti fl-Artikolu 2(1), il-punt (g), tar-Regolament (UE) 2018/1672 tal-Parlament Ewropew u tal-Kunsill (35);

“kulleġġ superviżorju għall-AML/CFT” tfisser struttura permanenti għall-kooperazzjoni u l-kondiviżjoni tal-informazzjoni għall-finijiet ta' superviżjoni ta' grupp jew entità li topera fi Stat Membru ospitanti jew f'pajjiż terz;

“abbozz ta' miżura nazzjonali” tfisser it-test ta' att, irrispettivament mill-forma tiegħu li, ladarba jiġi promulgat, ikollu effett legali, bit-test ikun fi stadju ta' tħejjija li fih ikunu għadhom jistgħu jsiru emendi sostanzjali;

“kont ta' titoli” tfisser kont ta' titoli kif definit fl-Artikolu 2(1), il-punt (28), tar-Regolament (UE) Nru 909/2014 tal-Parlament Ewropew u tal-Kunsill (36);

“titoli” tfisser strumenti finanzjarji kif definiti fl-Artikolu 4(1), il-punt (15), tad-Direttiva 2014/65/UE tal-Parlament Ewropew u tal-Kunsill (37).