Artikolu 29 ESMA

1.   F’konformità mal-Artikolu 16 tar-Regolament (UE) Nru 1095/2010, l-ESMA għandha toħroġ u taġġorna linji gwida dwar il-kooperazzjoni bejn l-ESMA u l-awtoritajiet kompetenti għall-finijiet ta’ dan ir-Regolament, inklużi l-proċeduri għal, u l-kundizzjonijiet dettaljati relatati, mad-delega tal-kompiti.

2.   F’konformità mal-Artikolu 16 tar-Regolament (UE) Nru 1095/2010, l-ESMA għandha, f’kooperazzjoni mal-EBA u mal-EIOPA, toħroġ u taġġorna linji gwida dwar l-applikazzjoni tar-reġim ta’ approvazzjoni msemmi fl-Artikolu 11 ta’ dan ir-Regolament sat-2 ta’ Ottubru 2025.

3.   L-ESMA għandha tippubblika rapport annwali dwar l-applikazzjoni ta’ dan ir-Regolament, inkluż dwar il-miżuri superviżorji meħuda u l-multi u l-pagamenti perjodiċi ta’ penali imposti mill-ESMA skont dan ir-Regolament. Dak ir-rapport għandu jkun fih, b’mod partikolari, informazzjoni dwar l-evoluzzjoni tas-suq tal-klassifikazzjonijiet ESG fl-Unjoni u valutazzjoni tal-applikazzjoni tar-reġimi tal-pajjiżi terzi msemmija fl-Artikoli 10, 11 u 12.

L-ESMA għandha tippreżenta r-rapport annwali msemmi fl-ewwel subparagrafu lill-Parlament Ewropew, lill-Kunsill u lill-Kummissjoni.

4.   Kull sena, l-ESMA għandha tippubblika fuq is-sit web tagħha lista ta’ fornituri ta’ klassifikazzjonijiet ESG elenkati fir-reġistru msemmi fl-Artikolu 14(1), li tindika s-sehem mis-suq totali tagħhom fl-Unjoni. Il-pubblikazzjoni għandha tqis l-istruttura tas-suq, inklużi l-livelli ta’ konċentrazzjoni u d-diversità tal-fornituri ta’ klassifikazzjonijiet ESG.

5.   Għall-finijiet tal-paragrafu 4, is-sehem mis-suq għandu jitkejjel b’referenza għall-fatturat annwali ġġenerat mill-attivitajiet ta’ klassifikazzjoni ESG fil-livell ta’ grupp fl-Unjoni.

6.   L-ESMA għandha tikkoopera mal-EBA u mal-EIOPA fit-twettiq tal-kompiti tagħha u għandha tikkonsulta mal-EBA u mal-EIOPA qabel ma toħroġ u taġġorna linji gwida u tissottometti abbozzi ta’ standards tekniċi regolatorji skont dan ir-Regolament.