Artikolu 45 Notifiki u talbiet għal sospensjoni mill-awtoritajiet kompetenti

1.   Awtorità kompetenti ta’ Stat Membru li ssib li fit-territorju tagħha stess jew ta’ Stat Membru ieħor qed jitwettqu jew twettqu atti minn fornitur ta’ klassifikazzjonijiet ESG li jiksru dan ir-Regolament, għandha tinforma lill-ESMA b’dan. Meta awtorità kompetenti tqis li jkun xieraq għal skopijiet investigattivi, dik l-awtorità kompetenti tista’ tissuġġerixxi lill-ESMA li tivvaluta l-ħtieġa li tuża s-setgħat skont l-Artikolu 32 b’rabta mal-fornitur ta’ klassifikazzjonijiet ESG involut f’dawk l-atti.

2.   L-ESMA għandha tieħu azzjoni xierqa. L-ESMA għandha tinforma lill-awtorità kompetenti notifikanti bl-eżitu u, sa fejn ikun possibbli, bi kwalunkwe żvilupp interim sinifikanti.

3.   Awtorità kompetenti notifikanti ta’ Stat Membru li tqis li fornitur ta’ klassifikazzjonijiet ESG elenkat fir-reġistru msemmi fl-Artikolu 14 li l-klassifikazzjonijiet ESG tiegħu jintużaw fit-territorju ta’ dak l-Istat Membru jkun kiser dan ir-Regolament b’tali mod li l-protezzjoni tal-investituri jew l-istabbiltà tas-sistema finanzjarja f’dak l-Istat Membru tiġi affettwata b’mod sinifikanti, tista’ titlob lill-ESMA tissospendi l-forniment ta’ klassifikazzjonijiet ESG mill-fornitur ta’ klassifikazzjonijiet ESG ikkonċernat. L-awtorità kompetenti notifikanti għandha tipprovdi lill-ESMA bir-raġunijiet sħaħ għat-talba tagħha.

4.   Meta l-ESMA tqis li t-talba msemmija fil-paragrafu 3 ma tkunx ġustifikata, hija għandha tinforma lill-awtorità kompetenti notifikanti b’dan bil-miktub, filwaqt li tistabbilixxi r-raġunijiet għall-opinjoni tagħha. Meta l-ESMA tqis li t-talba hija ġustifikata, hija għandha tieħu l-miżuri xierqa biex issolvi l-kwistjoni u għandha tgħarraf b’dan lill-awtorità kompetenti notifikanti bil-miktub.