Artikolu 7 Pjanijiet ta' rkupru preventiv ta' grupp

1.   L-Istati Membri għandhom jiżguraw li s-superviżur tal-grupp ikollu s-setgħa li jirrikjedi li l-impriża omm apikali ta' grupp tfassal u tippreżenta pjan ta' rkupru preventiv ta' grupp lis-superviżur tal-grupp.

Il-pjanijiet ta' rkupru preventiv ta' grupp għandhom jikkonsistu fi pjan ta' rkupru preventiv għall-grupp immexxi mill-impriża omm apikali. Il-pjan ta' rkupru preventiv ta' grupp għandu jidentifika azzjonijiet ta' rimedju li jistgħu jkunu meħtieġa li jiġu implimentati fil-livell ta' dik l-impriża omm apikali u fil-livell tal-impriżi sussidjarji individwali tagħha biex jirrestawraw il-pożizzjoni finanzjarja tagħhom meta dik il-pożizzjoni tkun iddeterjorat b'mod sinifikanti.

Is-superviżur tal-grupp għandu jimponi r-rekwiżit imsemmi fl-ewwel subparagrafu abbażi tal-kriterji msemmija fl-Artikolu 5(2) jew (3), kif applikabbli.

2.   Il-pjan ta' rkupru preventiv ta' grupp għandu jkun fih azzjonijiet ta' rimedju sabiex tinkiseb l-istabbilizzazzjoni tal-grupp, jew ta' kwalunkwe impriża tal-assigurazzjoni jew tar-riassigurazzjoni tal-grupp, meta l-grupp jew kwalunkwe waħda mill-impriżi tal-assigurazzjoni jew tar-riassigurazzjoni tiegħu tkun f'sitwazzjoni ta' stress sabiex tindirizza jew tneħħi l-kawżi tad-diffikultà u tirrestawra l-pożizzjoni finanzjarja tal-grupp jew tal-impriża li tkun parti mill-grupp inkwistjoni, fl-istess ħin filwaqt li titqies il-pożizzjoni finanzjarja ta' entitajiet oħrajn fi grupp.

Il-pjan ta' rkupru preventiv ta' grupp għandu jkun fih arranġamenti sabiex jiġu żgurati l-koordinazzjoni u l-konsistenza ta' miżuri proporzjonati li għandhom jittieħdu fil-livell tal-grupp u tal-entitajiet fi grupp.

3.   Il-pjan ta' rkupru preventiv ta' grupp, u kwalunkwe pjan imfassal għal impriża sussidjarja individwali tal-assigurazzjoni jew tar-riassigurazzjoni, għandu jitfassal f'konformità mal-Artikolu 5(5) sa (8), u għandu jiġi aġġornat f'konformità mal-Artikolu 5(4).

F'konformità mal-Artikolu 5(8), it-tielet subparagrafu, għandhom jiġu stabbiliti arranġamenti xierqa għall-monitoraġġ regolari tal-indikaturi.

Il-pjan ta' rkupru preventiv ta' grupp għandu jidentifika jekk hemmx xi ostaklu għall-implimentazzjoni tal-azzjonijiet ta' rimedju fil-grupp, inkluż fil-livell tal-entitajiet individwali koperti mill-pjan, u jekk hemmx impedimenti prattiċi jew legali sostanzjali għat-trasferiment fil-pront tal-fondi proprji jew għar-ripagament ta' obbligazzjonijiet jew ta' assi fil-grupp.

4.   L-awtoritajiet superviżorji jistgħu jirrikjedu li impriżi sussidjarji tal-assigurazzjoni jew tar-riassigurazzjoni jew l-entitajiet imsemmijin fl-Artikolu 1(1), il-punti (c) u (d), ifasslu u jippreżentaw pjanijiet ta' rkupru preventiv fejn ma jeżisti l-ebda pjan ta' rkupru preventiv ta' grupp.

5.   Meta l-awtorità superviżorja kkonċernata tivvaluta li entità ma tkunx meqjusa biżżejjed mill-pjan ta' rkupru preventiv ta' grupp minħabba s-sinifikat tal-entità inkwistjoni fl-Istat Membru kkonċernat u minħabba l-obbligi li għalihom ikunu soġġetti impriżi komparabbli f'dak l-Istat Membru, hija tista' titlob lis-superviżur tal-grupp, abbażi ta' opinjoni motivata, biex jitlob lill-impriża omm apikali, jew lill-kumpanija holding tal-assigurazzjoni li tmexxi l-grupp, biex tippreżenta pjan rivedut ta' rkupru preventiv tal-grupp filwaqt li tqis it-tħassib espress mill-awtorità superviżorja kkonċernata. Meta pjan rivedut ta’ rkupru preventiv tal-grupp ikun ġie sottomess u l-awtorità superviżorja kkonċernata tivvaluta li dak il-pjan rivedut ma jindirizzax biżżejjed it-tħassib tagħha, hija tista' tirrikjedi li l-impriżi sussidjarji tal-assigurazzjoni jew tar-riassigurazzjoni jew l-entitajiet imsemmijin fl-Artikolu 1(1), il-punti (c) u (d), ikkonċernati, ifasslu u jippreżentaw pjan ta' rkupru preventiv. F'dak il-każ, l-awtorità superviżorja għandha tipprovdi lis-superviżur tal-grupp opinjoni motivata għal din il-valutazzjoni. Sussegwentement għandha tipprovdi lis-superviżur tal-grupp il-pjan ta' rkupru preventiv.

6.   Dment li jkunu ssodisfati r-rekwiżiti tas-sigriet professjonali previsti fl-Artikolu 66, is-superviżur tal-grupp għandu jibgħat il-pjanijiet ta' rkupru preventiv ta' grupp lil:

7.   Il-korp amministrattiv, maniġerjali jew superviżorju tal-entità li tfassal il-pjan ta' rkupru preventiv tal-grupp skont il-paragrafu 1 jew il-pjan ta' rkupru preventiv skont il-paragrafu 4 jew 5 għandu jivvaluta u japprova l-pjan ikkonċernat qabel ma jippreżentah lis-superviżur tal-grupp jew lill-awtorità superviżorja, kif xieraq, għal rieżami.

8.   Meta tfassal il-pjanijiet ta’ rkupru preventiv, impriża sussidjarja tal-Unjoni tista’ tqis kwalunkwe pjan tal-grupp dwar l-irkupru preventiv imfassal mill-impriżi tal-assigurazzjoni jew tar-riassigurazzjoni ta’ pajjiżi terzi jew mill-impriżi prinċipali ta’ pajjiż terz li tagħhom hija impriża sussidjarja, fejn applikabbli.