Artikolu 16 Setgħa sabiex jiġu indirizzati jew jitneħħew l-impedimenti għar-riżolvibbiltà: trattament tal-grupp

1.   Awtorità ta' riżoluzzjoni fil-livell tal-grupp, flimkien mal-awtoritajiet ta' riżoluzzjoni tal-impriżi sussidjarji, wara li tkun ikkonsultat il-kulleġġ tas-superviżuri stabbilit skont l-Artikolu 248 tad-Direttiva 2009/138/KE, għandha tqis il-valutazzjoni, imsemmija fl-Artikolu 14, fil-kulleġġ ta' riżoluzzjoni u għandha tieħu l-passi raġonevoli kollha sabiex tilħaq deċiżjoni konġunta kif imsemmi fl-Artikolu 17 dwar l-applikazzjoni ta' miżuri identifikati f'konformità mal-Artikolu 15(4) fir-rigward tal-entitajiet rilevanti kollha fi grupp.

2.   L-awtorità ta' riżoluzzjoni fil-livell tal-grupp, f'kooperazzjoni mas-superviżur tal-grupp u mal-EIOPA, f'konformità mal-Artikolu 25(1) tar-Regolament (UE) Nru 1094/2010, għandha tħejji rapport u tippreżentah lill-impriża omm apikali u lill-awtoritajiet ta' riżoluzzjoni tas-sussidjarji, li għandhom jipprovdu dak ir-rapport lill-impriżi sussidjarji taħt il-mandat tagħhom. Ir-rapport għandu jitħejja wara li tkun saret konsultazzjoni mal-awtoritajiet superviżorji, u għandu janalizza l-impedimenti sostantivi għall-applikazzjoni effettiva tal-għodod ta' riżoluzzjoni u l-eżerċizzju effettiv tas-setgħat ta' riżoluzzjoni fir-rigward tal-grupp. Ir-rapport għandu jirrakkomanda kwalunkwe miżura proporzjonata u mmirata li, fil-fehma tal-awtorità ta' riżoluzzjoni fil-livell tal-grupp, tkun neċessarja jew xierqa sabiex jitneħħew dawk l-impedimenti, filwaqt li jitqies l-impatt ta' dawk il-miżuri fuq il-mudell ta' negozju tal-grupp.

3.   Fi żmien erba' xhur mid-data tar-riċevuta tar-rapport, l-impriża omm apikali tista' tippreżenta osservazzjonijiet u tipproponi miżuri alternattivi lill-awtorità ta' riżoluzzjoni fil-livell tal-grupp sabiex tindirizza jew tneħħi l-impedimenti identifikati fir-rapport.

L-awtorità ta' riżoluzzjoni fil-livell tal-grupp, wara li tikkonsulta lis-superviżur tal-grupp, għandha tivvaluta jekk dawk il-miżuri effettivament jindirizzawx jew ineħħux l-impedimenti sostantivi.

4.   L-awtorità ta' riżoluzzjoni fil-livell tal-grupp għandha tikkomunika kwalunkwe miżura proposta mill-impriża omm apikali lill-awtoritajiet li huma membri tal-kulleġġ ta' riżoluzzjoni jew li jipparteċipaw fih. L-awtorità ta' riżoluzzjoni fil-livell tal-grupp u l-awtoritajiet ta' riżoluzzjoni tal-impriżi sussidjarji, wara li jkunu kkonsultaw lill-awtoritajiet superviżorji, għandhom jagħmlu dak kollu li jistgħu sabiex jilħqu deċiżjoni konġunta, kif imsemmi fl-Artikolu 17, fil-kulleġġ ta' riżoluzzjoni rigward l-identifikazzjoni ta' impedimenti sostantivi, u, fejn ikun neċessarju, fir-rigward tal-valutazzjoni tal-miżuri proposti mill-impriża omm apikali u l-miżuri meħtieġa mill-awtoritajiet sabiex jindirizzaw jew ineħħu l-impedimenti. Meta jagħmlu dan, huma għandhom iqisu l-impatt potenzjali tal-miżuri fl-Istati Membri kollha fejn jopera l-grupp.