Artikolu 2 Definizzjonijiet

“akkwirent” tfisser fornitur ta' servizzi ta' pagament li jikkuntratta ma' benefiċjarju biex jaċċetta u jipproċessa transazzjonijiet ta' pagament permezz ta' kard, li jirriżultaw fi trasferiment ta' fondi lill-benefiċjarju;

“emittent” tfisser fornitur ta' servizzi ta' pagament li jaqbel li jipprovdi lil pagatur bi strument ta' pagament biex jibda u jipproċessa t-transazzjonijiet ta' pagatur ta' pagament permezz ta' kard;

“konsumatur” tfisser persuna fiżika li, f'kuntratti ta' servizzi ta'pagament koperti minn dan ir-Regolament, qed taġixxi għal finijiet li mhumiex is-sengħa, in-negozju jew il-professjoni tagħha;

“transazzjoni b'kard ta' debitu” tfisser transazzjoni ta' pagament permezz ta' kard, inklużi dawk b'kards imħallsin minn qabel, li ma tkunx transazzjoni b'kard ta' kreditu;

“transazzjoni b'kard ta' kreditu” tfisser transazzjoni ta' pagament permezz ta' kard fejn l-ammont tat-transazzjoni ikun debitat għalkollox jew f'parti minnu lill-pagatur f'data speċifika maqbula minn qabel, f'konformità ma' faċilità ta' kreditu maqbula minn qabel, bl-imgħax jew mingħajru;

“kard kummerċjali” tfisser kwalunkwe strument ta' pagament permezz ta' kard maħruġ lil impriżi jew entitajiet tas-settur pubbliku jew persuni fiżiċi li jaħdmu għal rashom li jkun limitat fl-użu għall-ispejjeż tan-negozju fejn il-pagamenti magħmula minn tali kards jitħallsu b'mod dirett mill-kont tal-impriża jew l-entità tas-settur pubbliku jew il-persuna fiżika li taħdem għal rasha;

“transazzjoni ta' pagament permezz ta' kard” tfisser servizz ibbażat fuq l-infrastruttura u r-regoli tan-negozju ta' skema ta' kards ta' pagament biex issir transazzjoni ta' pagament permezz ta' kwalunkwe kard, telekomunikazzjoni, apparat jew software diġitali jew tal-IT jekk dan jirriżulta fi transazzjoni b'kard ta' debitu jew ta' kreditu. It-transazzjonijiet ta' pagament permezz ta' kard jeskludu transazzjonijiet ibbażati fuq tipi oħra ta' servizzi ta' pagament;

“transazzjoni ta' pagament transkonfinali” tfisser transazzjoni ta' pagament permezz ta' kard fejn l-emittent u l-akkwirent ikunu jinsabu fi Stati Membri differenti jew fejn l-istrument ta' pagament permezz ta' kard jinħareġ minn emittent li jinsab fi Stat Membru differenti minn dak tal-punt tal-bejgħ;

“transazzjoni ta' pagament domestika” tfisser kwalunkwe transazzjoni ta' pagament permezz ta' kard li ma tkunx transazzjoni ta' pagament transkonfinali;

“tariffa tal-interkambju” tfisser tariffa mħallsa għal kull transazzjoni direttament jew indirettament (jiġifieri permezz ta' terza parti) bejn l-emittent u l-akkwirent involuti fi transazzjoni ta' pagament permezz ta' kard. Il-kumpens nett jew remunerazzjonijiet maqbula oħrajn jitqiesu bħala parti mit-tariffa tal-interkambju;

“kumpens nett” tfisser l-ammont nett totali ta' pagamenti, skontijiet jew inċentivi riċevuti minn emittent mill-iskema ta' kards ta' pagament, l-akkwirent jew kwalunkwe intermedjarju ieħor fir-rigward ta' transazzjonijiet ta' pagament permezz ta' kard jew attivitajiet relatati;

“tariffa għas-servizzi tan-negozjant” tfisser tariffa mħallsa mill-benefiċjarju lill-akkwirent b'rabta ma' transazzjonijiet ta' pagament permezz ta' kard;

“benefiċjarju” tfisser persuna fiżika jew ġuridika li hija r-riċevitur intiż ta' fondi li kienu s-suġġett ta' transazzjoni tal-ħlas;

“pagatur” tfisser persuna fiżika jew ġuridika li jkollha kont ta' pagament u tippermetti ordni ta' pagament minn dak il-kont ta' pagament, jew, fejn ma jkun hemm ebda kont ta' pagament, persuna fiżika jew ġuridika li tagħti ordni ta' pagament;

“kard ta' pagament” tfisser kategorija ta' strument ta' pagament li jippermetti lil pagatur jagħti bidu għal transazzjoni b'kard ta' debitu jew ta' kreditu;

“skema ta' kards ta' pagament” tfisser sett wieħed ta' regoli, prattiki, standards u/jew linji gwida għall-implimentazzjoni għall-eżekuzzjoni ta' transazzjonijiet ta' pagament permezz ta' kard u li jkun separat minn kwalunkwe sistema ta' infrastruttura jew ta' pagament li tappoġġa l-operazzjoni tiegħu, u li jinkludi kwalunkwe korp, organizzazzjoni jew entità speċifika li tieħu d-deċiżjonijiet b'responsabbiltà għall-funzjonament tal-iskema;

“skema ta' pagament permezz ta' kard ta' erba” partijiet' tfisser skema ta' pagament permezz ta' kard li fiha l-pagamenti jsiru mill-kont ta' pagament ta' pagatur fil-kont ta' pagament ta' benefiċjarju permezz tal-intermedjazzjoni tal-iskema, emittent (min-naħa tal-pagatur) u akkwirent (min-naħa tal-benefiċjarju);

“skema ta' pagament permezz ta' kard ta' tliet partijiet” tfisser skema ta' kards ta' pagament li fiha l-iskema stess tipprovdi servizzi akkwirenti u emittenti u t-transazzjonijiet ta' pagament permezz ta' kard isiru minn kont ta' pagament ta' pagatur fil-kont ta' pagament ta' benefiċjarju fl-iskema. Meta skema ta' pagament permezz ta' kard ta' tliet partijiet tilliċenzja fornituri oħrajn ta' servizzi ta' pagament għall-ħruġ ta' strumenti ta' pagament permezz ta' kards jew l-akkwist ta' transazzjonijiet ta' strumenti ta' pagament permezz ta' kard, jew it-tnejn, jew toħroġ strumenti ta' pagament permezz ta' kard flimkien ma' sieħeb f'co-branding jew permezz ta' aġent, hija titqies bħala skema ta' pagament permezz ta' kard ta' erba' partijiet;

“strument ta' pagament” tfisser kwalunkwe apparat personalizzat u/jew sett ta' proċeduri miftiehma bejn l-utent tas-servizzi ta' pagament u l-fornitur tas-servizzi ta' pagament u użat sabiex jagħti bidu għal ordni ta' pagament;

“strument ta' pagament permezz ta' kard” ifisser kwalunkwe strument ta' ħlas, inklużi kard, mowbajl, kompjuter jew kwalunkwe apparat teknoloġiku ieħor li jkun fih l-applikazzjoni adattata ta' pagament, li tippermetti lill-pagatur jibda transazzjoni ta' pagament permezz ta' kard li mhijiex trasferiment ta' kreditu jew debitu dirett kif definit fl-Artikolu 2 tar-Regolament (UE) Nru 260/2012;

“applikazzjoni ta' pagament” tfisser softwer tal-kompjuter jew ekwivalenti mtella' fuq apparat li jippermetti li jinbdew transazzjonijiet ta' pagament permezz ta' kard u li jħalli lill-pagatur joħroġ ordnijiet ta' pagament;

“kont ta' pagament” tfisser kont f'isem wieħed jew aktar fornituri ta' servizzi ta' pagament li jintuża għall-eżekuzzjoni ta' transazzjonijiet ta' pagament, inkluż permezz ta' ammont speċifiku ta' flus elettroniċi kif definit fil-punt 2 tal-Artikolu 2 tad-Direttiva 2009/110/KE tal-Parlament Ewropew u tal-Kunsill (8);

“ordni ta' pagament” tfisser kwalunkwe istruzzjoni minn pagatur lill-fornitur ta' servizzi ta' pagament tiegħu li biha jitolbu jesegwixxi transazzjoni ta' pagament;

“fornitur ta' servizzi ta' pagament” tfisser kull persuna fiżika jew ġuridika awtorizzati li jipprovdu s-servizzi ta' pagament elenkati fl-Anness tad-Direttiva 2007/64/KE jew rikonoxxuti bħala emittenti ta' flus elettroniċi skont l-Artikolu 1(1) tad-Direttiva 2009/110/KE. Fornitur ta' servizzi ta' pagament jista' jkun emittent jew akkwirent jew it-tnejn li huma;

“utent ta' servizzi ta' pagament” tfisser persuna fiżika jew ġuridika li tagħmel użu minn servizz ta' pagament fil-kapaċità jew ta' pagatur jew ta' benefiċjarju, jew it-tnejn li huma;

“transazzjoni ta' pagament” tfisser azzjoni ta' trasferiment ta' fondi, mibdija minn pagatur jew għan-nom tiegħu jew mill-benefiċjarju, irrispettivament minn kwalunkwe obbligi sottostanti bejn pagatur u l-benefiċjarju;

“ipproċessar” tfisser it-twettiq tas-servizzi ta' pproċessar ta' transazzjoni ta' pagament f'termini tal-azzjonijiet rikjesti għall-ittrattar ta' struzzjoni ta' pagament bejn l-akkwirent u l-emittent;

“entità ta' pproċessar” tfisser kwalunkwe persuna fiżika jew ġuridika li tipprovdi servizzi ta' pproċessar ta' transazzjoni ta' pagament;

“punt tal-bejgħ” tfisser l-indirizz tal-post fiżiku tan-negozjant fejn tinbeda t-transazzjoni ta' pagament. Madankollu:

“marka ta' pagament” tfisser kwalunkwe materjal jew isem, terminu, sinjal, simbolu diġitali jew kombinament tagħhom, li kapaċi jindika taħt liema skema ta' pagament permezz ta' kard isiru t-transazzjonijiet ta' pagament permezz ta' kard;

“co-badging” tfisser l-inklużjoni ta' żewġ marki jew aktar ta' pagament jew applikazzjonijiet ta' pagament tal-istess marka fuq l-istess strument ta' pagament permezz ta' kard;

“co-branding” tfisser l-inklużjoni ta' mill-inqas marka waħda ta' pagament u mill-inqas marka waħda mhux ta' pagament fuq l-istess strument ta' pagament permezz ta' kard;

“kard ta' debitu” tfisser kategorija ta' strument ta' pagament li jippermetti lil pagatur jagħti bidu għal transazzjoni b'kard ta' debitu esklużi dawk b'kards imħallsin minn qabel;

“kard ta' kreditu” tfisser kategorija ta' strument ta' pagament li jippermetti lill-pagatur jibda transazzjoni b'kard ta' kreditu;

“kard imħallsa minn qabel” tfisser kategorija ta' strument ta' pagament li fiha flus elettroniċi, kif definit fil-punt 2 tal-Artikolu 2 tad-Direttiva 2009/110/KE, ikunu maħżunin.