Artikolu 8

Il-Kummissjoni għandha tikkunsidra li tistabbilixxi standards ta' kwalità għall-PFAS Totali fl-ilmijiet tal-wiċċ fir-rieżami li jmiss tal-Anness I ta' din id-Direttiva li għandu jitwettaq f'konformità mal-Artikolu 16 tad-Direttiva 2000/60/KE u jkollha l-għan li tikkomplementa l-gwida dwar il-monitoraġġ tal-PFAS Totali fl-ilma tajjeb għax-xorb, żviluppata f'konformità mal-Artikolu 13(7) tad-Direttiva (UE) 2020/2184 tal-Parlament Ewropew u tal-Kunsill ( 11 ), biex tagħmilha applikabbli għall-monitoraġġ tal-PFAS Totali fl-ilmijiet tal-wiċċ. L-Istati Membri huma mħeġġa japplikaw diġà dik il-gwida biex jimmonitorjaw il-PFAS Totali fl-ilmijiet tal-wiċċ u jirrapportaw id-data f'konformità mal-Artikolu 8(4) tad-Direttiva 2000/60/KE. Meta tqis it-tossiċità, il-persistenza u l-prevalenza tal-aċidu trifluworoaċetiku (TFA) fl-ambjent, il-Kummissjoni għandha tikkunsidra l-istabbiliment ta' standard ta' kwalità għat-TFA separatament fl-Anness I ta' din id-Direttiva fir-rieżami li jmiss.

Fl-Anness III ta’ din id-Direttiva huma inklużi l-parametru ‘Għadd totali ta' Bisfenoli’ u l-parametri għall-għadd totali ta' pestiċidi magħżula skont il-mod ta' azzjoni u l-farmaċewtiċi magħżula skont il-mod ta' azzjoni. Il-Kummissjoni għandha tirrieżamina l-inklużjoni possibbli ta' dawn il-parametri fil-lista ta' sustanzi prijoritarji fir-rieżami li jmiss tagħha tal-Anness I għal din id-Direttiva li għandha titwettaq skont l-Artikolu 16 tad-Direttiva 2000/60/KE, u tistabbilixxi EQS kif xieraq. Fir-rieżami li jmiss, il-Kummissjoni għandha tikkunsidra wkoll jekk jistax jittieħed approċċ ibbażat fuq ir-riskju għall-istabbiliment ta' EQS għall-għadd totali ta' bisfenoli, l-għadd totali ta' pestiċidi u għall-għadd totali ta' farmaċewtiċi fl-ilma tal-wiċċ, appoġġat minn metodi ta' monitoraġġ xierqa.

Il-Kummissjoni għandha s-setgħa li tadotta atti delegati, skont l-Artikolu 9a, biex temenda l-Parti B tal-Anness II sabiex tadattah għall-progress tekniku u xjentifiku.