ANNESS A KJARIFIKI TAT-TERMINOLOĠIJA

ANNESS A

KJARIFIKI TAT-TERMINOLOĠIJA

Dan l-Anness jipprovdi spjegazzjonijiet, noti ġeografiċi u definizzjonijiet tat-termini użati fl-Annessi l-oħra, sakemm ma jkunx speċifikat mod ieħor f’dawn l-Annessi.

1.    NOTI ĠEOGRAFIĊI

Għal finijiet biss tar-rappurtar statistiku, japplikaw id-definizzjonijiet ġeografiċi li ġejjin:

2.    AGGREGATI

Il-produtturi tal-elettriku u tas-sħana huma kklassifikati skont il-fini tal-produzzjoni:

2.1.    Provvista

2.1.1.   PRODUZZJONI/PRODUZZJONI INDIĠENA

Il-kwantitajiet tal-fjuwils estratti jew prodotti huma kkalkulati wara kull operazzjoni tat-tneħħija tal-materja inerti. Il-produzzjoni tinkludi l-kwantitajiet ikkonsmati mill-produttur waqt il-proċess tal-produzzjoni (eż. għat-tisħin jew għat-tħaddim tat-tagħmir u tal-awżiljarji), kif ukoll il-provvisti lil produtturi oħra tal-enerġija għat-trasformazzjoni jew għal użi oħra.

“Produzzjoni indiġena” tfisser il-produzzjoni minn riżorsi f’territorju speċifiku — it-territorju nazzjonali tal-pajjiż rapportatur.

2.1.2.   PRODOTTI RKUPRATI

Japplika għall-faħam iebes biss. Slurries u shale tal-munzelli tal-iskart irkuprati mill-minjieri.

2.1.3.   RIĊEVUTI MINN SORSI OĦRA

Il-kwantitajiet tal-fjuwils li l-produzzjoni tagħhom hi koperta b’rappurtar ieħor dwar il-fjuwils, iżda li jitħalltu bi fjuwils oħra u kkonsmati bħala taħlita. Aktar dettalji dwar dan il-komponent iridu jingħataw bħala:

2.1.4.   IMPORTAZZJONIJIET/ESPORTAZZJONIJIET

Sakemm ma jkunx speċifikat mod ieħor, “importazzjonijiet” tirriferi għall-oriġini finali (il-pajjiż fejn ikun sar il-prodott tal-enerġija) għall-użu fil-pajjiż, u “esportazzjonijiet” tirreferi għall-pajjiż finali tal-konsum tal-prodott tal-enerġija li jkun sar. L-ammonti jitqiesu importati jew esportati meta jkunu qasmu l-fruntieri politiċi tal-pajjiż, sew jekk kien hemm awtorizzazzjoni doganali u sew jekk le.

Meta ma tkunx tista’ tiġi speċifikata l-oriġini jew id-destinazzjoni, tista’ tintuża “Mhux speċifikata/Oħrajn”.

2.1.5.   BUNKERS TAL-BAĦAR INTERNAZZJONALI

Il-kwantitajiet tal-fjuwils ikkonsenjati lill-bastimenti li jtajru kwalunkwe bandiera u li jintużaw fin-navigazzjoni internazzjonali. In-navigazzjoni internazzjonali tista’ ssir fuq il-baħar, fl-għadajjar u fil-passaġġi tal-ilma interni, u fl-ilmijiet kostali. Dawn li ġejjin huma esklużi:

2.1.6.   AVJAZZJONI INTERNAZZJONALI

Il-kwantitajiet tal-fjuwils ikkonsenjati lill-inġenji tal-ajru għall-avjazzjoni internazzjonali. Id-distinzjoni domestika/internazzjonali għandha ssir skont il-postijiet tat-tluq u tal-ħatt u mhux skont in-nazzjonalità tal-linja tal-ajru. Eskluż il-fjuwils użati mil-linji tal-ajru għall-vetturi tat-triq tagħhom (li jridu jiġu rappurtati f’“Mhux speċifikat band’oħra — Trasport”) u l-użu militari tal-fjuwils tal-avjazzjoni (li jridu jiġu rappurtati f’“Mhux speċifikat band’oħra — Oħrajn”).

2.1.7.   BIDLIET FL-ISTOKKIJIET

Id-differenza bejn il-livell tal-istokk tal-ftuħ u l-livell tal-istokk tal-għeluq għall-istokk miżmum fit-territorju nazzjonali. Sakemm ma jkunx speċifikat mod ieħor, żieda fl-istokk tintwera bħala numru negattiv u tnaqqis fl-istokk jintwera bħala numru pożittiv.

2.1.8.   STOKKIJIET TOTALI TAL-FTUĦ U TAL-GĦELUQ FIT-TERRITORJU NAZZJONALI

L-istokkijiet kollha fit-territorju nazzjonali, inkluż l-istokkijiet miżmuma mill-gvernijiet, mill-konsumaturi l-kbar u mill-organizzazzjonijiet taż-żamma tal-istokkijiet, l-istokkijiet miżmuma abbord bastimenti tal-oċean li jkunu deħlin, l-istokkijiet miżmuma f’żoni riżervati u l-istokkijiet miżmuma għal ħaddieħor, sew jekk skont ftehim governattiv bilaterali u sew jekk le. Il-ftuħ u l-għeluq jirreferu għall-ewwel u għall-aħħar jum tal-perjodu tar-rappurtar, rispettivament. L-istokk jinkludi l-istokkijiet miżmuma f’kull tip ta’ faċilità tal-ħażna speċjali, fuq l-art jew taħt l-art.

2.1.9.   UŻU DIRETT

Żejt (Żejt mhux raffinat u prodotti taż-żejt mhux raffinat) użat direttament mingħajr ma jiġi pproċessat f’raffineriji taż-żejt mhux raffinat. Inkluż iż-żejt mhux raffinat maħruq għall-ġenerazzjoni tal-elettriku.

2.1.10.   PRODOTTI PRIMARJI RIĊEVUTI

Inkluż il-kwantitajiet taż-żejt mhux raffinat indiġenu jew importat (inkluż il-kondensat) u l-NGL ( 3 ) indiġeni użati direttament mingħajr ma jiġu pproċessati f’raffinerija taż-żejt mhux raffinat, u l-kwantitajiet tal-flussi lura mill-industrija petrokimika li, għalkemm ma jkunux fjuwil primarju, jintużaw direttament.

2.1.11.   PRODUZZJONI GROSSA TAR-RAFFINERIJA

Il-produzzjoni tal-prodotti finali f’raffinerija jew f’impjant tat-taħlit. Eskluż it-telf mir-raffineriji, iżda inkluż il-fjuwil tar-raffinerija.

2.1.12.   PRODOTTI RIĊIKLATI

Il-prodotti finali li jgħaddu għat-tieni darba min-network tal-kummerċjalizzazzjoni, wara li jkunu ġew ikkonsenjati lill-konsumaturi finali (eż. lubrikanti użati li jkunu qed jiġu pproċessati mill-ġdid). Dawn il-kwantitajiet għandhom jiġu distinti mill-flussi lura tal-industrija petrokimika.

2.1.13.   FLUSSI LURA

Il-prodotti finali jew semifinali li jiġu rritornati mill-konsumaturi finali lir-raffineriji għall-ipproċessar, għat-taħlit jew għall-bejgħ. Ġeneralment dawn ikunu prodotti sekondarji tal-manifattura petrokimika.

2.1.14.   TRASFERIMENTI TAL-INTERPRODOTTI

Il-kwantitajiet klassifikati mill-ġdid għax tinbidel l-ispeċifikazzjoni tagħhom jew għax ikunu tħalltu fi prodott ieħor. Entrata negattiva għal prodott wieħed titpatta b’entrata pożittiva (jew b’diversi entrati pożittivi) għal prodott wieħed jew għal bosta prodotti u viċiversa; l-effett nett totali għandu jkun żero.

2.1.15.   PRODOTTI TRASFERITI

Il-prodotti taż-żejt mhux raffinat importati li jiġu kklassifikati mill-ġdid bħala materja prima għal aktar ipproċessar fir-raffinerija, mingħajr ma jiġu kkonsenjati lill-konsumaturi finali.

2.1.16.   DIFFERENZI STATISTIĊI

Il-valur ikkalkulat, definit bħala d-differenza bejn il-kalkolu mill-perspettiva tal-provvista (approċċ minn fuq għal isfel) u l-kalkolu mill-perspettiva tal-konsum (approċċ minn isfel għal fuq). Kull differenza statistika kbira trid tiġi spjegata mill-pajjiżi rapportatur.

2.2.    Settur tat-trasformazzjoni

Fis-settur tat-trasformazzjoni, iridu jiġu rappurtati biss il-kwantitajiet tal-fjuwils li ġew trasformati fi fjuwils oħra. Il-kwantitajiet tal-fjuwils użati għat-tisħin, għat-tħaddim tat-tagħmir u b’mod ġenerali biex jappoġġaw it-trasformazzjoni għandhom jiġu ddikjarati fis-settur tal-enerġija.

2.2.1.   PRODUTTUR TAL-ATTIVITÀ EWLENIJA TAL-ELETTRIKU BISS

Il-kwantitajiet tal-fjuwils użati mill-produtturi tal-attività ewlenija biex jipproduċu l-elettriku f’unitajiet/impjanti tal-elettriku biss.

2.2.2.   UNITAJIET TAS-SĦANA U TAL-ENERĠIJA KKOMBINATI (CHP) TAL-PRODUTTURI TAL-ATTIVITÀ EWLENIJA

Il-kwantitajiet tal-fjuwils użati mill-produtturi tal-attività ewlenija biex jipproduċu l-elettriku u/jew is-sħana f’unitajiet CHP.

2.2.3.   PRODUTTUR TAL-ATTIVITÀ EWLENIJA TAS-SĦANA BISS

Il-kwantitajiet tal-fjuwils użati mill-produtturi tal-attività ewlenija biex jipproduċu s-sħana f’unitajiet/impjanti tas-sħana biss.

2.2.4.   AWTOPRODUTTUR TAL-ELETTRIKU BISS

Il-kwantitajiet tal-fjuwils użati mill-awtoprodutturi biex jipproduċu l-elettriku f’unitajiet/impjanti tal-elettriku biss.

2.2.5.   UNITAJIET TAS-SĦANA U TAL-ENERĠIJA KKOMBINATI (CHP) TAL-AWTOPRODUTTURI

Il-kwantitajiet kollha tal-fjuwils użati mill-awtoprodutturi biex jipproduċu l-elettriku u l-parti proporzjonali tal-fjuwils użati biex jipproduċu s-sħana mibjugħa f’unitajiet CHP. Il-parti proporzjonali tal-fjuwils użati għall-produzzjoni tas-sħana li ma tkunx inbiegħet (sħana awtokkonsmata) trid tiġi rappurtata skont is-settur speċifiku tal-konsum finali tal-enerġija abbażi tal-klassifikazzjoni tan-NACE. Is-sħana mhux mibjugħa iżda kkonsenjata lil entitajiet oħra skont ftehimiet nonfinanzjarji jew lil entitajiet bi sjieda differenti trid tiġi rappurtata bl-istess prinċipju bħas-sħana mibjugħa.

2.2.6.   AWTOPRODUTTUR TAS-SĦANA BISS

Il-parti proporzjonali tal-fjuwils użati għall-produzzjoni tas-sħana mibjugħa f’unitajiet/impjanti tas-sħana biss mill-awtoprodutturi. Il-parti proporzjonali tal-fjuwils użati għall-produzzjoni tas-sħana li ma tkunx inbiegħet (sħana awtokkonsmata) trid tiġi rappurtata skont is-settur speċifiku tal-konsum finali tal-enerġija abbażi tal-klassifikazzjoni tan-NACE. Is-sħana mhux mibjugħa iżda kkonsenjata lil entitajiet oħra skont ftehimiet nonfinanzjarji jew lil entitajiet bi sjieda differenti trid tiġi rappurtata bl-istess prinċipju bħas-sħana mibjugħa.

2.2.7.   IMPJANTI TAL-FJUWILS BIL-PRIVATTIVA

Il-kwantitajiet tal-fjuwils użati fl-impjanti tal-fjuwils bil-privattiva għall-produzzjoni tal-fjuwils bil-privattiva.

2.2.8.   FRAN TAL-KOKK

Il-kwantitajiet tal-fjuwils użati fil-fran tal-kokk għall-produzzjoni tal-kokk tal-fran tal-kokk u tal-gass tal-fran tal-kokk.

2.2.9.   IMPJANTI BKB/PB

Il-kwantitajiet tal-fjuwils użati għall-produzzjoni tal-mattunelli tal-faħam kannella (BKB) f’impjanti BKB u l-kwantitajiet tal-fjuwils użati f’impjanti tal-mattunnelli tal-pit għall-produzzjoni tal-mattunelli tal-pit (PB).

2.2.10.   IMPJANTI TAL-MANIFATTURA TAL-GASS

Il-kwantitajiet tal-fjuwils użati għall-produzzjoni tal-gass tal-impjanti tal-gass f’impjanti tal-manifattura tal-gass u f’impjanti tal-gassifikazzjoni tal-faħam.

2.2.11.   FORN TAL-BLAST

Il-kwantitajiet tal-fjuwils li jidħlu fir-reċipjent tal-forn tal-blast, kemm mill-fetħa ta’ fuq flimkien mal-mineral tal-ħadid, kif ukoll mit-tuyeres fil-qiegħ flimkien mal-arja msaħħna tal-blast.

2.2.12.   LIKWIFAZZJONI TAL-FAĦAM

Il-kwantitajiet tal-fjuwil użati għall-produzzjoni taż-żejt sintetiku.

2.2.13.   IMPJANTI TAL-GASS GĦAL LIKWIDU

Il-kwantitajiet tal-fjuwils gassużi konvertiti fi fjuwils likwidi.

2.2.14.   IMPJANT TAL-PRODUZZJONI TAL-FAĦAM TAL-KANNOL

Il-kwantitajiet tal-bijofjuwils solidi konvertiti f’faħam tal-kannol.

2.2.15.   RAFFINERIJI TAŻ-ŻEJT MHUX RAFFINAT

Il-kwantitajiet tal-fjuwils użati għall-produzzjoni tal-prodotti taż-żejt mhux raffinat.

2.2.16.   IMPJANTI TAT-TAĦLIT TAL-GASS NATURALI (GĦALL-GASS NATURALI MĦALLAT)

Il-kwantitajiet tal-gassijiet imħallta mal-gass naturali għal ġol-grillja tal-gass (network tal-gass).

2.2.17.   GĦAT-TAĦLIT MAL-GAŻOLINA TAL-MAGNI/DIŻIL/PITROLJU:

Il-kwantitajiet tal-bijofuwils likwidi mħallta mal-kontropartijiet fossili tagħhom. Il-kwantitajiet tal-idroġenu mħallat fil-fjuwils.

2.2.18.   PRODUZZJONI TAL-IDROĠENU

Il-kwantitajiet tal-fjuwils użati għall-produzzjoni tal-idroġenu

2.2.19.   MHUX SPEĊIFIKAT BAND’OĦRA

Il-kwantitajiet tal-fjuwils użati għall-attivitajiet tat-trasformazzjoni li mhumiex inklużi band’oħra. Jekk użati, kulma jiddaħħal f’din l-intestatura jrid jiġi spjegat fir-rapport.

2.3.    Settur tal-enerġija

Il-kwantitajiet ikkonsmati mill-industrija tal-enerġija biex jappoġġaw l-operazzjonijiet tal-estrazzjoni (tħaffir fil-minjieri, produzzjoni taż-żejt u tal-gass) jew l-operazzjonijiet tal-impjanti relatati mal-attivitajiet tat-trasformazzjoni. Dan jikkorrispondi għan-NACE Div 05, 06, 19 u 35, għan-NACE Grupp 09.1 u għan-NACE Klassijiet 07.21 u 08.92.

Eskluż il-kwantitajiet tal-fjuwils trasformati f’forma ta’ enerġija oħra (li jridu jiġu rappurtati fis-settur tat-trasformazzjoni) jew użati biex jappoġġaw l-operazzjoni tal-pipelines tat-taħlitiet (slurries) biż-żejt, bil-gass u bil-faħam (li jridu jiġu rappurtati fis-settur tat-trasport).

2.3.1.   UŻU PROPRJU MILL-IMPJANTI TAL-ELETTRIKU, TAS-CHP U TAS-SĦANA

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fl-impjanti b’unitajiet tal-elettriku biss, tas-sħana biss u tas-CHP.

2.3.2.   MINJIERI TAL-FAĦAM

Il-kwantitajiet tal-fjuwils ikkonsmati bħala enerġija biex jappoġġaw l-estrazzjoni u l-preparazzjoni tal-faħam fl-industrija tat-tħaffir fil-minjieri għall-faħam. Il-faħam maħruq fl-impjanti tal-enerġija fid-daħla ta’ minjiera tal-faħam irid jiġi rappurtat fis-settur tat-trasformazzjoni.

2.3.3.   IMPJANTI TAL-FJUWILS BIL-PRIVATTIVA

Il-kwantitajiet tal-fjuwils ikkonsmati bħala enerġija biex jappoġġaw operazzjonijiet fl-impjanti tal-fjuwils bil-privattiva.

2.3.4.   FRAN TAL-KOKK

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fil-fran tal-kokk (impjanti tal-kokk).

2.3.5.   IMPJANTI BKB/PB

Il-kwantitajiet tal-fjuwils użati bħala enerġija biex jappoġġaw l-operazzjonijiet fl-impjanti BKP/PB (impjanti tal-agglomerazzjoni).

2.3.6.   IMPJANTI TAL-MANIFATTURA TAL-GASS/IMPJANTI TAL-GASSIFIKAZZJONI

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fl-impjanti tal-manifattura tal-gass u fl-impjanti tal-gassifikazzjoni tal-faħam.

2.3.7.   FRAN TAL-BLAST

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fil-fran tal-blast.

2.3.8.   LIKWIFAZZJONI TAL-FAĦAM

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fl-impjanti tal-likwifazzjoni tal-faħam.

2.3.9.   LIKWIFAZZJONI (LNG)/RIGASSIFIKAZZJONI

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fl-impjanti tal-likwifazzjoni tal-gass naturali u tar-rigassifikazzjoni.

2.3.10.   IMPJANTI TAL-GASSIFIKAZZJONI (BIJOGASS)

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fl-impjanti tal-gassifikazzjoni tal-bijogass.

2.3.11.   IMPJANTI TAL-GASS GĦAL LIKWIDU (GTL)

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fl-impjanti tal-konverżjoni tal-gass għal likwidu.

2.3.12.   IMPJANTI TAL-PRODUZZJONI TAL-FAĦAM TAL-KANNOL

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fl-impjanti tal-produzzjoni tal-faħam tal-kannol.

2.3.13.   RAFFINERIJI TAŻ-ŻEJT MHUX RAFFINAT

Il-kwantitajiet tal-fjuwils ikkonsmati bħala enerġija biex jappoġġaw l-operazzjonijiet fir-raffineriji taż-żejt mhux raffinat.

2.3.14.   INDUSTRIJA NUKLEARI

Il-kwantitajiet tal-fjuwils ikkonsmati bħala enerġija biex jappoġġaw operazzjonijiet tal-industrija nukleari (it-tħaffik fil-minjieri, l-ipproċessar, u l-ipproċessar mill-ġdid ta’ materjali nukleari għall-fissjoni u għall-fużjoni atomika) u inkluż it-trattament, ir-rimi u l-ħżin tal-iskart nukleari radjuattiv.

2.3.15.   ESTRAZZJONI TAŻ-ŻEJT U TAL-GASS

Il-kwantitajiet tal-fjuwils ikkonsmati fil-faċilitajiet tal-estrazzjoni taż-żejt u tal-gass naturali. Eskluż it-telf mill-pipelines (li jrid jiġi rappurtat bħala telf mid-distribuzzjoni) u l-kwantitajiet tal-enerġija użata biex jitħaddmu l-pipelines (li jridu jiġu rappurtati fis-settur tat-trasport).

2.3.16.   PRODUZZJONI, LIKWIFAZZJONI U GASSIFIKAZZJONI TAL-IDROĠENU.

Il-kwantitajiet tal-fjuwils ikkonsmati bħala enerġija biex jappoġġaw il-produzzjoni, il-likwifazzjoni u l-gassifikazzjoni tal-idroġenu.

2.3.17.   MHUX SPEĊIFIKAT BAND’OĦRA — ENERĠIJA

Il-kwantitajiet tal-fjuwils relatati mal-attivitajiet tal-enerġija mhux inklużi band’oħra. Jekk użati, kulma jiddaħħal f’din l-intestatura jrid jiġi spjegat fir-rapport.

2.4.    Telf mit-trażmissjoni u mid-distribuzzjoni

2.4.1.   TELF MIT-TRAŻMISSJONI

Il-kwantitajiet ta’ telf tal-fjuwils minħabba t-trażmissjoni, fil-parti tas-sistema mħaddma mill-operatur tas-sistema tat-trażmissjoni. Inkluż it-telf tekniku u mhux tekniku. Għall-elettriku, dan jinkludi t-telf fit-trasformaturi li ma jitqisux bħala partijiet integrali tal-impjanti tal-enerġija. Għall-gass, dan jinkludi l-ivventjar u l-ivvampjar waqt trażmissjoni.

2.4.2.   TELF MID-DISTRIBUZZJONI

Il-kwantitajiet ta’ telf tal-fjuwils minħabba d-distribuzzjoni, fil-parti tas-sistema mħaddma mill-operatur tas-sistema tad-distribuzzjoni. Inkluż it-telf tekniku u mhux tekniku. Għall-gass, dan jinkludi l-ivventjar u l-ivvampjar waqt distribuzzjoni.

2.5.    Konsum finali mhux tal-enerġija

Il-kwantitajiet tal-fjuwils fossili użati għal finijiet mhux tal-enerġija — fjuwils mhux maħruqa.

2.6.    Konsum finali tal-enerġija (speċifikazzjonijiet ta’ użu finali)

2.6.1.   SETTUR TAL-INDUSTRIJA

Dan jirreferi għall-kwantitajiet ta’ fjuwil ikkunsmati mill-intrapriża industrijali biex issostni l-attivitajiet primarji tagħha.

Għall-unitajiet tas-sħana biss jew tas-CHP, iridu jiġu rappurtati biss il-kwantitajiet tal-fjuwils ikkonsmati għall-produzzjoni tas-sħana użata mill-entità stess (sħana awtokkonsmata). Il-kwantitajiet tal-fjuwils ikkonsmati għall-produzzjoni tas-sħana mibjugħa u għall-produzzjoni tal-elettriku jridu jiġu rappurtati fis-settur tat-trasformazzjoni xieraq.

2.6.2.   SETTUR TAT-TRASPORT

Enerġija użata fl-attivitajiet kollha tat-trasport irrispettivament mill-kategorija tan-NACE (is-settur ekonomiku) fejn issir l-attività. Il-fjuwils użati għat-tisħin u għat-tidwil fl-istazzjonijiet tal-ferrovija, fil-vened tax-xarabanks, fuq il-mollijiet tal-bastimenti u fl-ajruporti jridu jiġu rappurtati f’“Servizzi Kummerċjali u Pubbliċi” u mhux fis-settur tat-trasport.

2.6.2.1.   Ferroviji

Il-kwantitajiet tal-fjuwils użati mit-traffiku tal-ferroviji, inkluż il-ferroviji industrijali u t-trasport bil-ferroviji bħala parti minn sistemi tat-trasport urbani u suburbani (pereżempju il-ferroviji, it-trams, il-metros).

2.6.2.1.1.   Ferroviji b’veloċità kbira

L-enerġija użata mill-ferroviji li jaħdmu fuq linji li jippermettu veloċità iżjed minn 200 kilometru fis-siegħa.

2.6.2.1.2.   Ferroviji konvenzjonali

L-enerġija użata mit-traffiku ferrovjarju, eskluż il-ferroviji ta’ veloċità għolja u l-metrò u t-tramm.

2.6.2.1.2.1.   Trasport tal-passiġġieri bil-ferrovija konvenzjonali

L-enerġija użata mill-ferrovija għat-trasport tal-passiġġieri, jiġifieri għall-moviment tal-passiġġieri li juża l-vetturi ferrovjarji bejn il-post tal-imbark u l-post tal-iżbark. Il-passiġġier hu kwalunkwe persuna li tivvjaġġa, eskluż il-membri tal-ekwipaġġ tal-ferrovija.

2.6.2.1.2.2.   Trasport tal-merkanzija bil-ferrovija konvenzjonali

L-enerġija użata mill-ferrovija għat-trasport tal-merkanzija, jiġifieri għall-moviment tal-merkanzija li juża l-vetturi ferrovjarji bejn il-post tat-tagħbija u l-post tal-ħatt.

2.6.2.1.3.   Metrò u tramm

L-enerġija użata mill-metrò, mit-tramm, mill-ferrovija ħafifa u minn sistemi ferrovjarji urbani oħra elevati jew taħt l-art.

2.6.2.2.   Navigazzjoni domestika

Il-kwantitajiet tal-fjuwils ikkonsenjati lill-bastimenti li jtajru kwalunkwe bandiera u li mhumiex involuti fin-navigazzjoni internazzjonali (ara bunkers tal-baħar internazzjonali). Id-distinzjoni domestika/internazzjonali għandha ssir skont il-port tat-tluq u l-port tal-wasla, u mhux skont il-bandiera jew in-nazzjonalità tal-bastiment.

2.6.2.3.   Bit-triq

Il-kwantitajiet tal-fjuwils użati fil-vetturi tat-triq. Inkluż il-fjuwil użat mill-vetturi agrikoli fuq l-awtostradi u l-lubrikanti għall-użu fil-vetturi tat-triq.

Eskluż l-enerġija użata fil-magni stazzjonarji (ara “Settur ieħor”), fit-tratturi li ma jintużawx fl-awtostradi (ara “Agrikoltura”), għal użu militari fil-vetturi tat-triq (ara “Settur ieħor — Mhux Speċifikat Band’Oħra”), għall-bitum użat fil-kisi tat-toroq u l-enerġija użata fil-magni fis-siti tal-kostruzzjoni (ara “Industrija”, is-subsettur “Kostruzzjoni”).

2.6.2.3.1.   Vetturi tqal li jġorru l-merkanzija

Il-kwantitajiet tal-fjuwils użati fi trakkijiet b’kapaċità tat-tagħbija ta’ 3,5t, li jġorru l-merkanzija (vetturi tal-kategoriji N2 u N3 skont il-klassifikazzjoni Ewropea għall-kategorija tal-vetturi, abbażi tal-istandards tal-UNECE).

2.6.2.3.2.   Trasport kollettiv

Il-kwantitajiet tal-fjuwils użati fil-vetturi kbar li jġorru l-passiġġieri, bħax-xarabanks, il-kowċis, il-vannijiet kbar, eċċ. (vetturi tal-kategoriji M2 u M3 skont il-klassifikazzjoni Ewropea għall-kategorija tal-vetturi, abbażi tal-istandards tal-UNECE).

2.6.2.3.3.   Karozzi u vannijiet

Il-kwantitajiet tal-fjuwils użati fil-vetturi żgħar, bħall-karozzi u l-vannijiet, li jġorru l-passiġġieri jew il-merkanzija (vetturi tal-kategoriji N1 u M1 skont il-klassifikazzjoni Ewropea għall-kategorija tal-vetturi, abbażi tal-istandards tal-UNECE).

2.6.2.3.4.   Trasport ieħor bit-triq:

Il-kwantitajiet tal-fjuwils użati fil-forom kollha tat-trasport bit-triq apparti l-vetturi tqal li jġorru l-merkanzija, it-trasport kollettiv u l-karozzi u l-vannijiet.

2.6.2.4.   Trasport bil-pipelines

Il-kwantitajiet tal-fjuwils użati bħala enerġija li jappoġġaw it-tħaddim tal-pipelines li jġorru l-gassijiet, il-likwidi, is-slurries u komoditajiet oħra. Inkluż l-enerġija użata għall-istazzjonijiet tal-pompa u għall-manutenzjoni tal-pipelines. Eskluż l-enerġija użata għad-distribuzzjoni bil-pipelines tal-gass naturali jew tal-gass manifatturat, il-misħun jew l-istim mingħand id-distributur għall-utenti finali (li trid tiġi rappurtata fis-settur tal-enerġija), l-enerġija użata għad-distribuzzjoni finali tal-ilma lill-utenti fl-unitajiet domestiċi, lill-utenti industrijali, lill-utenti kummerċjali u lil utenti oħra (li jridu jiġu inklużi f’Servizzi Kummerċjali u Pubbliċi) u t-telf imġarrab waqt dan il-ġarr bejn id-distributur u l-utenti finali (li jrid jiġi rappurtat bħala telf mid-distribuzzjoni).

2.6.2.5.   Avjazzjoni domestika

Il-kwantitajiet tal-fjuwils ikkonsenjati lill-inġenji tal-ajru għall-avjazzjoni domestika. Inkluż il-fjuwil użat għal finijiet oħra għajr it-titjir, eż. l-ittestjar ta’ qabel tal-magni. Id-distinzjoni domestika/internazzjonali għandha ssir skont il-postijiet tat-tluq u tal-ħatt u mhux skont in-nazzjonalità tal-linja tal-ajru. Dan jinkludi l-vjaġġi ta’ tul konsiderevoli bejn żewġ ajruporti f’pajjiż b’territorji extra-Ewropej. Eskluż il-fjuwils użati mil-linji tal-ajru għall-vetturi tat-triq tagħhom (li jridu jiġu rappurtati f’“Mhux speċifikat band’oħra — Trasport”) u l-użu militari tal-fjuwils tal-avjazzjoni (li jridu jiġu rappurtati f’“Mhux speċifikat band’oħra — Oħrajn”).

2.6.2.6.   Mhux speċifikat band’oħra — Trasport

Il-kwantitajiet tal-fjuwils użati għall-attivitajiet tat-trasport li mhumiex inklużi band’oħra. Inkluż il-fjuwils użati mil-linji tal-ajru għall-vetturi tat-triq tagħhom u l-fjuwils użati fil-portijiet għat-tagħmir tal-ħatt mill-bastimenti, diversi tipi ta’ krejnijiet. Jekk użati, kulma jiddaħħal f’din l-intestatura jrid jiġi spjegat fir-rapport.

2.6.3.   SETTURI OĦRA

Din il-kategorija tkopri l-kwantitajiet tal-fjuwils użati f’setturi mhux imsemmija speċifikament jew li ma jagħmlux parti mit-trasformazzjoni, l-enerġija, l-industrija jew it-trasport.

2.6.3.1.   Servizzi kummerċjali u pubbliċi

Il-kwantitajiet tal-fjuwils ikkonsmati min-negozji u mill-uffiċċji fis-setturi pubbliċi u privati. NACE Div. 33, 36, 37, 38, 39, 45, 46, 47, 52, 53, 55, 56, 58, 59, 60, 61, 62, 63, 64, 65, 66, 68, 69, 70, 71, 72, 73, 74, 75, 77, 78, 79, 80, 81, 82, 84 (eskluż Klassi 84.22), 85, 86, 87, 88, 90, 91, 92, 93, 94, 95, 96 u 99. Il-fjuwils użati għat-tisħin u d-dawl fil-ferroviji, fl-istazzjonijiet tax-xarabanks, fil-mollijiet tat-trasport marittimu u fl-ajruporti jridu jiġu rappurtati f’din il-kategorija. Dan jinkludi l-fjuwils użati għall-attivitajiet kollha mhux tat-trasport tan-NACE Div. 49, 50 u 51.

2.6.3.2.   Unitajiet domestiċi

Il-kwantitajiet tal-fjuwils ikkonsmati mill-unitajiet domestiċi kollha inkluż l-“unitajiet domestiċi b’persuni impjegati”. NACE Div. 97 u 98.

Id-definizzjonijiet speċifiċi li ġejjin japplikaw għas-settur tal-unitajiet domestiċi:

Unità domestika hi persuna li tgħix waħedha, familja, jew grupp ta’ persuni li jgħixu flimkien fl-istess abitazzjoni privata u li jaqsmu l-utilitajiet u spejjeż essenzjali oħra għall-għajxien. Għaldaqstant is-settur tal-unitajiet domestiċi, magħruf ukoll bħala s-settur residenzjali jew domestiku hu grupp kollettiv tal-unitajiet domestiċi kollha f’pajjiż.

Ir-residenzi kollettivi permanenti (bħall-ħabsijiet) jew temporanji (bħall-isptarijiet) iridu jiġu esklużi għax dawn huma koperti fil-konsum fis-settur tas-servizzi. L-enerġija użata fl-attivitajiet kollha tat-trasport trid tiġi rappurtata fis-settur tat-trasport u mhux fis-settur tal-unitajiet domestiċi.

Anki l-konsum tal-enerġija assoċjat mal-attivitajiet ekonomiċi sinifikanti tal-unitajiet domestiċi jrid jiġi eskluż mill-konsum totali tal-enerġija fl-unitajiet domestiċi. Dawn l-attivitajiet jinkludu l-attivitajiet ekonomiċi agrikoli fl-azjendi agrikoli żgħar u attivitajiet ekonomiċi oħra mwettqa fir-residenza ta’ unità domestika, u jridu jiġu rappurtati fis-settur xieraq tal-konsum finali.

2.6.3.2.1.   Tisħin tal-ispazju

Dan is-servizz tal-enerġija jirreferi għall-użu tal-enerġija li jipprovdi s-sħana f’żona interna ta’ binja.

2.6.3.2.2.   Tkessiħ tal-ispazju

Dan is-servizz tal-enerġija jirreferi għall-użu tal-enerġija għat-tkessiħ ta’ binja, b’sistema u/jew unità tar-refriġerazzjoni.

Il-fannijiet, il-blowers u tagħmir ieħor li mhux konness ma’ unità tar-refriġerazzjoni huma esklużi minn din it-Taqsima, iżda jridu jiġu koperti mit-Taqsima tat-“Tagħmir tat-tidwil u tal-elettriku”.

2.6.3.2.3.   Tisħin tal-ilma

Dan is-servizz tal-enerġija jirreferi għall-użu tal-enerġija għat-tisħin tal-ilma għall-ilma ġieri sħun, il-banjijiet, it-tindif u applikazzjonijiet oħra mhux tat-tisjir.

It-tisħin tal-pixxini hu eskluż iżda jrid jiġi kopert fit-Taqsima ta’ “Użi finali oħra”.

2.6.3.2.4.   Tisjir

Dan is-servizz tal-enerġija jirreferi għall-użu tal-enerġija għat-tħejjija tal-ikel.

It-tagħmir għat-tisjir awżiljari (microwaves, ktieli, magni tal-kafè, eċċ) hu eskluż u jrid jiġi kopert fit-taqsima tat-“Tagħmir tat-tidwil u tal-elettriku”.

2.6.3.2.5.   Tagħmir tat-tidwil u tal-elettriku (elettriku biss):

L-użu tal-elettriku għat-tidwil u kull tagħmir ieħor tal-elettriku f’binja mhux ikkunsidrat f’użi finali oħra.

2.6.3.2.6.   Użi finali oħra

Kull konsum tal-enerġija ieħor fl-unitajiet domestiċi, bħall-użu tal-enerġija minn attivitajiet fil-miftuħ u attivitajiet oħra li mhumiex inklużi fil-ħames użi finali tal-enerġija msemmija hawn fuq (eż. lawn mowers, tisħin tal-pixxina, ħiters ta’ barra, barbikju fil-miftuħ, sawni, eċċ.).

2.6.3.3.   Agrikoltura

Il-kwantitajiet tal-fjuwils ikkonsmati mill-utenti klassifikati bħala produzzjoni tal-għelejjel u tal-annimali, kaċċa u attivitajiet ta’ servizzi relatati; NACE Div. 01.

2.6.3.4.   Forestrija

Il-kwantitajiet tal-fjuwils ikkonsmati mill-utenti klassifikati bħala forestrija u qtugħ tas-siġar għall-injam; NACE Div. 02.

2.6.3.5.   Sajd

Il-kwantitajiet tal-fjuwils ikkonsenjati għas-sajd intern, kostali u fil-baħar fond. Is-sajd irid ikopri l-fjuwils ikkonsenjati lill-bastimenti li jtajru kwalunkwe bandiera u li jkunu ħadu l-fjuwil fil-pajjiż (inkluż is-sajd internazzjonali) u l-enerġija użata fl-industrija tas-sajd. NACE Div. 03.

2.6.3.6.   Mhux speċifikat band’oħra — Oħrajn

Il-kwantitajiet tal-fjuwils użati għal attivitajiet mhux inklużi band’oħra (bħal NACE Klassi 84.22). Din il-kategorija tinkludi l-użu militari tal-fjuwil għal konsum mobbli u stazzjonarju kollu (eż. bastimenti, inġenji tal-ajru, toroq u enerġija użata fil-postijiet tal-għajxien), irrispettivament minn jekk il-fjuwil ikkonsenjat ikunx għall-militar ta’ dak il-pajjiż jew għall-militar ta’ pajjiż ieħor. Jekk użati, kulma jiddaħħal f’din l-intestatura jrid jiġi spjegat fir-rapport.

3.    PRODOTTI

3.1.    FAĦAM (Fjuwils fossili solidi u gassijiet manifatturati)

3.1.1.   FAĦAM IEBES

Il-faħam iebes hu prodott aggregat ugwali għat-total tal-antraċite, il-faħam tal-kokk u faħam bituminuż ieħor.

3.1.2.   ANTRAĊITE

Il-faħam ta’ livell għoli użat għal applikazzjonijiet industrijali u domestiċi. Ġeneralment dan ikollu inqas minn 10% ta’ materja volatili u kontenut għoli ta’ karbonju (madwar 90% ta’ karbonju fiss). Il-valur kalorifiku gross tiegħu hu aktar minn 24 000  kJ/kg fuq bażi ħielsa mill-irmied iżda niedja.

3.1.3.   FAĦAM TAL-KOKK

Faħam bituminuż bi kwalità li tippermetti l-produzzjoni ta’ kokk (kokk tal-fran tal-kokk) adattat biex jappoġġa ċarġ tal-fran tal-blast. Il-valur kalorifiku gross tiegħu hu aktar minn 24 000  kJ/kg fuq bażi ħielsa mill-irmied iżda niedja.

3.1.4.   FAĦAM BITUMINUŻ IEĦOR

Il-faħam użat biex jiġi ġġenerat l-istim u li jinkludi l-faħam bituminuż kollu li la jkun inkluż mal-faħam tal-kokk u lanqas mal-antraċite. Ikkaratterizzat minn materja aktar volatili mill-antraċite (aktar minn 10%) u kontenut ta’ karbonju aktar baxx (inqas minn 90% ta’ karbonju fiss). Il-valur kalorifiku gross tiegħu hu aktar minn 24 000  kJ/kg fuq bażi ħielsa mill-irmied iżda niedja.

3.1.5.   FAĦAM KANNELLA

Il-faħam kannella hu prodott aggregat ugwali għat-total tal-faħam subbituminuż u l-linjite.

3.1.6.   FAĦAM SUBBITUMINUŻ IEĦOR

Jirreferi għall-faħam nonagglomeratorju b’valur kalorifiku gross ta’ bejn 20 000  kJ/kg u 24 000  kJ/kg b’aktar minn 31% ta’ materja volatili fuq bażi ħielsa minn materja minerali xotta.

3.1.7.   LINJITE

Faħam nonagglomeratorju b’valur kalorifiku gross inqas minn 20 000  kJ/kg u aktar minn 31% ta’ materja volatili fuq bażi ħielsa minn materja minerali xotta.

3.1.8.   FJUWIL BIL-PRIVATTIVA

Il-fjuwil kompost manifatturat minn trab fin tal-faħam iebes biż-żieda ta’ aġent li jgħaqqad. Għaldaqstant l-ammont tal-fjuwil bil-privattiva manifatturat jista’ jkun xi ftit iżjed mill-ammont proprju tal-faħam ikkonsmat tul il-proċess tat-trasformazzjoni.

3.1.9.   KOKK TAL-FRAN TAL-KOKK

Il-prodott solidu miksub mill-karbonizzazzjoni tal-faħam, l-aktar tal-faħam tal-kokk, f’temperatura għolja; għandu kwantità baxxa ta’ umdità u materja volatili. Il-kokk tal-fran tal-kokk jintuża l-aktar fl-industrija tal-ħadid u tal-azzar, u jaġixxi bħala sors tal-enerġija u aġent kimiku.

Ir-riħ tal-kokk u l-kokk tal-funderija jridu jiġu rappurtati f’din il-kategorija.

Is-semikokk (prodott solidu miksub mill-karbonizzazzjoni tal-faħam f’temperatura baxxa) irid jiġi inkluż f’din il-kategorija. Is-semikokk jintuża bħala fjuwil għat-tisħin jew jintuża mill-impjant tat-trasformazzjoni stess.

Din tinkludi wkoll il-kokk, ir-riħ tal-kokk u s-semikokk magħmul mil-linjite.

3.1.10.   KOKK TAL-GASS

Prodott sekondarju tal-faħam iebes użat għall-produzzjoni tal-gass tal-ibliet fl-impjanti tal-gass. Il-kokk tal-gass jintuża għall-finijiet ta’ tisħin.

3.1.11.   QATRAN TAL-FAĦAM

Riżultat tad-distillazzjoni distruttiva tal-faħam bituminuż. Il-qatran tal-faħam hu l-prodott sekondarju likwidu tad-distillazzjoni tal-faħam biex isir il-kokk fil-proċess tal-fran tal-kokk jew jiġi prodott mill-faħam kannella (“qatran ta’ temperatura baxxa”).

3.1.12.   BKB (MATTUNELLI TAL-FAĦAM KANNELLA)

Il-BKB hu fjuwil kompost manifatturat mil-linjite jew mill-faħam subbituminuż, magħmul billi jingħata l-forma ta’ mattunelli bi pressjoni għolja mingħajr ma jiġi miżjud l-ebda aġent li jgħaqqad, inkluż it-trab fin u t-trab tal-linjite niexef.

3.1.13.   GASSIJIET MANIFATTURATI

Il-gassijiet manifatturati huma aggregat ta’ prodott ugwali għat-total tal-gass tal-impjanti tal-gass, il-gass tal-fran tal-kokk, il-gass tal-fran tal-blast u gassijiet irkuprati oħra.

3.1.14.   GASS TAL-IMPJANTI TAL-GASS

Ikopri t-tipi kollha tal-gassijiet magħmulin fl-impjanti tal-utilità pubblika jew fl-impjanti privati, bil-għan ewlieni jkun il-manifattura, it-trasport u d-distribuzzjoni tal-gass. Dan jinkludi l-gass magħmul mill-karbonizzazzjoni (inkluż il-gass magħmul mill-fran tal-kokk u trasferit għall-gass tal-impjanti tal-gass), bil-gassifikazzjoni totali u b’arrikkiment jew mingħajr arrikkament ta’ prodotti taż-żejt (LPG, żejt tal-fjuwil residwu, eċċ.), u b’riformazzjoni u taħlit sempliċi ta’ gassijiet u/jew ajra, inkluż it-taħlit ma’ gass naturali li jiġi distribwit u kkonsmat tul il-grillja tal-gass naturali. L-ammont tal-gass li jirriżulta mit-trasferimenti ta’ gassijiet oħrajn tal-faħam lejn il-gass tal-impjanti tal-gass irid jiġi rappurtat bħala l-produzzjoni tal-gass tal-impjanti tal-gass.

3.1.15.   GASS TAL-FRAN TAL-KOKK

Il-gass tal-fran tal-kokk hu gass miksub bħala prodott sekondarju mill-manifattura tal-kokk tal-fran tal-kokk għall-produzzjoni tal-ħadid u tal-azzar.

3.1.16.   GASS TAL-FRAN TAL-BLAST

Il-gass tal-fran tal-blast hu magħmul waqt il-kombustjoni tal-kokk fil-fran tal-blast fl-industrija tal-ħadid u tal-azzar. Dan jiġi rkuprat u użat bħala fjuwil, parzjalment fl-impjant u parzjalment fi proċessi oħra tal-industrija tal-azzar jew fl-impjanti tal-enerġija attrezzati biex jaħarquh.

3.1.17.   GASSIJIET IRKUPRATI OĦRA

Prodott sekondarju mill-produzzjoni tal-azzar f’forn tal-ossiġnu, irkuprat malli jinħareġ mill-forn. Il-gassijiet huma magħrufa wkoll bħala gass konvertitur, gass LD jew gass BOS. Il-kwantità tal-fjuwil irkuprat trid tiġi rappurtata abbażi ta’ valur kalorifiku gross. Ikopri wkoll il-gassijiet manifatturati mhux speċifikati u mhux imsemmija hawn fuq, bħall-gassijiet kombustibbli b’oriġini karbonika solida rkuprati mill-manifattura u minn proċessi kimiċi mhux definiti band’oħra.

3.1.18.   PIT

Il-pit hu depożitu sedimentarju kombustabbli, artab, poruż jew kompressat, b’oriġini mill-pjanti u b’kontenut għoli ta’ ilma (sa 90% meta mhux ipproċessat), li jitqatta’ faċilment, b’kulur li jvarja mill-kannella ċar għall-kannella skur. Il-pit jinkludi l-pit tat-torba u l-pit mitħun. Eskluż il-pit użat għal finijiet mhux tal-enerġija.

3.1.19.   PRODOTTI TAL-PIT

Prodotti bħal mattunelli tal-pit derivati direttament jew indirettament mill-pit tat-torba u mill-pit mitħun.

3.1.20.   SHALE TAŻ-ŻEJT U RAMEL TAŻ-ŻEJT

Ix-shale taż-żejt u r-ramel taż-żejt huma blat sedimentarju li jkun fih materja organika fil-forma ta’ keroġenu. Il-keroġenu hu materjal tax-xama’ rikk fl-idrokarburi meqjus bħala prekursur taż-żejt mhux raffinat. Ix-shale taż-żejt jista’ jinħaraq direttament jew jiġi pproċessat bit-tisħin biex jiġi estratt iż-żejt tax-shale. Iż-żejt tax-shale u l-prodotti l-oħra derivati mil-likwifazzjoni jridu jiġu rappurtati bħal idrokarburi oħra fil-prodotti taż-żejt mhux raffinat.

3.2.    GASS NATURALI

3.2.1.   GASS NATURALI

Il-gass naturali jinkludi l-gassijiet li jokkorru bħala depożiti taħt l-art, likwifikati jew gassużi, li jikkonsistu l-aktar minn metan, indipendenti mill-metodu tal-estrazzjoni (konvenzjonali u mhux konvenzjonali). Inkluż il-gass “nonassoċjat” li joriġina mill-faċilitajiet li jipproduċu l-idrokarburi biss f’forma ta’ gass, u l-gass “assoċjat” li jsir b’mod assoċjat maż-żejt mhux raffinat kif ukoll il-metanu rkuprat mill-minjieri tal-faħam (gass tal-minjieri tal-faħam tal-ħaġra u l-bini tagħha) jew mis-saffi tal-faħam (gass tas-saffi tal-faħam). Il-gass naturali ma jinkludix il-bijogass u l-gassijiet manifatturati. It-trasferimenti ta’ dawn il-prodotti lejn in-network tal-gass naturali jridu jiġu rappurtati b’mod separat mill-gass naturali. Il-gass naturali jinkludi l-gass naturali likwifikat (LNG) u l-gass naturali kompressat (CNG).

3.3.    ELETTRIKU U SĦANA

3.3.1.   ELETTRIKU

L-elettriku jirreferi għat-trasferiment tal-enerġija permezz tal-fenomenu fiżiku li jinvolvi ċarġis elettriċi u l-effetti tagħhom meta jkunu weqfin u qed jiċċaqilqu. L-elettriku kollu użat, iġġenerat u kkonsmat irid jiġi rappurtat, inkluż dak barra mill-grilja u awtokkonsmat. L-elettriku lil hinn mill-grilja jiġi ġġenerat minn installazzjonijiet li ma jkunux konnessi mill-grilja mill-perspettiva tal-produzzjoni; l-installazzjoni ma tistax tintroduċi l-elettriku ġġenerat fil-grilja. L-elettriku awtokkonsmat hu l-elettriku kkonsmat mill-produttur qabel ma jiddaħħal fil-grilja.

3.3.2.   SĦANA (SĦANA DERIVATA)

Is-sħana tirreferi għall-enerġija miksuba bil-moviment translazzjonali, rotazzjonali u vibrazzjonali tal-kostitwenti tal-materja u bit-tibdil fl-istat fiżiku tagħha. Is-sħana ġġenerata kollha, għajr is-sħana ġġenerata mill-awtoprodutturi għall-użu proprju u mhux mibjugħa, trid tiġi rappurtata; il-forom l-oħra kollha tas-sħana jiġu rappurtati bħala użu ta’ prodotti li minnhom ġiet iġġenerata s-sħana.

3.4.    ŻEJT (żejt mhux raffinat u prodotti taż-żejt mhux raffinat)

3.4.1.   ŻEJT MHUX RAFFINAT

Iż-żejt mhux raffinat hu żejt minerali b’oriġini naturali li jinkludi taħlita ta’ idrokarburi u impuritajiet assoċjati, bħall-kubrit. Jeżisti fil-fażi likwida b’temperatura u bi pressjoni normali tas-superfiċje u l-karatteristiċi fiżiċi tiegħu (id-densità, il-viskożità, eċċ.) ivarjaw ferm. Din il-kategorija tinkludi l-kondensati tal-impjant tat-trattament jew taż-żona tal-isfruttament irkuprati minn gassijiet assoċjati jew nonassoċjati fejn jitħalltu mal-fluss taż-żejt kummerċjali mhux raffinat. Il-kwantitajiet iridu jiġu rappurtati indipendentement mill-metodu tal-estrazzjoni (konvenzjonali u mhux konvenzjonali). Iż-żejt mhux raffinat jeskludi NGL.

3.4.2.   LIKWIDI TAL-GASS NATURALI (NGL)

L-NGL huma idrokarburi likwidi jew likwifikati rkuprati mill-gass naturali fil-faċilitajiet tas-separazzjoni jew fl-impjanti tal-ipproċessar tal-gass. L-NGL jinkludu l-etanu, il-propan, il-butan (normali u iso-), l-(iso) pentan u l-pentani plus (xi drabi jissejjaħ gażolina naturali jew kondensat tal-impjanti).

3.4.3.   MATERJA PRIMA TAR-RAFFINERIJI

Il-materja prima tar-raffineriji hi żejt ipproċessat maħsub għal aktar ipproċessar (eż. żejt tal-fjuwil tad-distillazzjoni diretta jew żejt tal-gass tal-vakwu), eskluż it-taħlit. B’aktar ipproċessar, din issir komponent wieħed jew aktar u/jew prodotti finali. Din id-definizzjoni tkopri wkoll il-prodotti trasferiti lura mill-industrija petrokimika għall-industrija tar-raffinar (eż. il-gażolina bil-piroliżi, il-frazzjonijiet C4, iż-żejt tal-fjuwil u l-frazzjonijiet taż-żejt tal-gass).

3.4.4.   ADDITTIVI/OSSIĠENATI

L-addittivi huma sustanzi mhux idrokarburi miżjuda jew imħallta ma’ prodotti taż-żejt mhux raffinat biex jimmodifikaw il-proprjetajiet tagħhom (ottan, ċetan, proprjetajiet kesħin, eċċ.). L-addittivi jinkludu l-ossiġenati (bħall-alkoħol (il-metanol, l-etanol), l-ethers (il-metil-terz-butil-etere (MTBE), l-etil-terz-butil-etere (l-ETBE), it-terz-amilmetiletere (TAME) eċċ.), l-esteri (iż-żejt tal-kolza jew id-dimetilester, eċċ.), il-komposti kimiċi (bħaċ-ċomb tetrametil (TML), iċ-ċomb tetraetile (TEL) u d-deterġenti). Il-kwantitajiet tal-addittivi/ossiġenati (alkoħol, eteri, esteri u komposti kimiċi oħra) rappurtati f’din il-kategorija jridu jkunu relatati mal-kwantitajiet imħallta mal-fjuwils jew għall-użu tal-fjuwil. Din il-kategorija tinkludi l-bijofjuwils mħalltin ma’ fjuwils fossili likwidi.

3.4.5.   BIJOFJUWILS F’ADDITTIVI/OSSIĠENATI

Il-kwantitajiet tal-bijofjuwils likwidi rappurtati f’din il-kategorija huma relatati mal-bijofjuwils likwidi mħallta u jirreferu biss għall-porzjon tal-bijofjuwil likwidu u mhux għall-volum totali tal-likwidi li fih jitħalltu l-bijofjuwils. Dawn jeskludu l-bijofjuwils likwidi kollha mhux imħalltin.

3.4.6.   IDROKARBURI OĦRA

Żejt mhux raffinat sintetiku mir-ramel tal-qatran, żejt tax-shale, eċċ., likwidi mil-likwifazzjoni tal-faħam, il-produzzjoni ta’ likwidi mill-konverżjoni tal-gass naturali f’gażolina, idroġenu u żjut emulsifikati (eż. orimulsjoni); eskluż ix-shale taż-żejt; inkluż iż-żejt tax-shale (prodott sekondarju).

3.4.7.   PRODOTTI TAŻ-ŻEJT MHUX RAFFINAT

Il-prodotti taż-żejt mhux raffinat huma prodott aggregat ugwali għat-total tal-gass tar-raffineriji, l-etan, il-gassijiet likwifikati miż-żejt mhux raffinat, in-nafta, il-gażolina tal-magni, il-gażolina tal-avjazzjoni, il-fjuwil tal-ġett tat-tip tal-gażolina, il-fjuwil tal-ġett tat-tip tal-pitrolju, pitrolju ieħor, iż-żejt tal-gass/diżil, iż-żejt kombustibbli, l-ispirtu abjad u SPB, lubrikanti, il-bitum, ix-xama’ tal-paraffina, il-kokk taż-żejt mhux raffinat u prodotti oħra.

3.4.8.   GASS TAR-RAFFINERIJI

Il-gass tar-raffineriji jinkludi taħlita ta’ gassijiet nonkondensati li tikkonsisti l-aktar f’idroġenu, metan, etan u olefini miksuba waqt id-distillazzjoni taż-żejt mhux raffinat jew it-trattament tal-prodotti taż-żejt (eż. cracking) fir-raffineriji. Dan jinkludi wkoll il-gassijiet trasferiti lura mill-industrija petrokimika.

3.4.9.   ETAN

Idrokarbonu ta’ katina miftuħa u bil-gass naturali, (C2H6) estratt minn flussi tal-gass naturali u tal-gass prodott fir-raffineriji.

3.4.10.   GASSIJIET LIKWIFIKATI MIŻ-ŻEJT MHUX RAFFINAT (LPG)

L-LPG huma idrokarburi paraffiniċi ħfief derivati mill-impjanti tal-proċessi tar-raffineriji, tal-istabbilizzazzjoni taż-żejt mhux raffinat u tal-ipproċessar tal-gass naturali. Dawn jikkonsistu l-aktar minn propan (C3H8) u butan (C4Hl0) jew taħlita tat-tnejn. Jistgħu jinkludu wkoll il-propilen, il-butilen, l-isopropilen u l-isobutilen. L-LPG normalment ikunu likwifikati bi pressjoni għall-ġarr u l-ħżin.

3.4.11.   NAFTA

In-nafta hi materja prima maħsuba għall-industrija petrokimika (eż. il-manifattura tal-etilen jew il-produzzjoni tal-aromatiċi) jew għall-produzzjoni tal-gażolina b’riforma jew iżomerizzazzjoni fir-raffinerija. In-nafta tinkludi l-materjal fil-medda tad-distillazzjoni ta’ bejn 30°C u 210°C jew f’parti minn din il-medda.

3.4.12.   GAŻOLINA TAL-MAGNI

Il-gażolina tal-magni tikkonsisti f’taħlita ta’ idrokarburi ħfief li jiddistillaw bejn 35°C u 215°C. Din tintuża bħala fjuwil għall-magni terrestri li jixegħlu bi spark. Il-gażolina tal-magni tista’ tinkludi addittivi, ossiġenati u aġenti li jtejbu l-ottan, inkluż komposti taċ-ċomb. Tinkludi komponenti ta’ taħlit tal-gażolina tal-magni (eskluż addittivi/ossiġenati), eż. alkilati, gażolina iżomerata, gażolina riformata, gażolina krekkjata maħsuba biex tintuża bħala gażolina tal-magni finali. Il-gażolina tal-magni hi prodott aggregat ugwali għat-total tal-bijogażolina (bijogażolina fil-gażolina tal-magni) u n-nonbijogażolina mħalltin.

3.4.12.1.   Bijogażolina mħallta (bijogażolina fil-gażolina tal-magni)

Il-bijogażolina mħallta fil-gażolina tal-magni.

3.4.12.2.   Nonbijoġażolina

Il-parti li jibqa’ mill-gażolina tal-magni — gażolina tal-magni mingħajr il-bijogażolina mħallta (ħafna drabi tkun gażolina tal-magni b’oriġini fossili).

3.4.13.   GAŻOLINA TAL-AVJAZZJONI

Spirtu tal-magni mħejji speċjalment għall-magni bil-pistuni tal-avjazzjoni, b’numru ta’ ottan adattat għall-magna, punt tal-iffriżar ta’ -60°C u medda tad-distillazzjoni ġeneralment fil-limiti ta’ bejn 30°C u 180°C.

3.4.14.   FJUWIL TAL-ĠETT TAT-TIP TAL-GAŻOLINA (FJUWIL TAL-ĠETT TAT-TIP NAFTA JEW JP4)

Dan jinkludi ż-żjut tal-idrokarbur ħafif kollha użati fl-unitajiet tal-enerġija tat-turbini tal-avjazzjoni, li jiddistillaw bejn 100°C u 250°C. Dawn jinkisbu b’taħlita ta’ pitrolji u gażolina jew nafti b’tali mod li l-kontenut aromatiku ma jkunx iżjed minn 25% fil-volum, u l-pressjoni tal-fwar tkun bejn 13,7kPa u 20,6kPa.

3.4.15.   FJUWIL TAL-ĠETT TAT-TIP TAL-PITROLJU

Distillat użat għall-unitajiet tal-enerġija tat-turbini tal-avjazzjoni. Għandu l-istess karatteristiċi tad-distillazzjoni ta’ bejn 150°C u 300°C (ġeneralment mhux aktar minn 250°C) u punt tal-fjammabbiltà bħall-pitrolju. Barra minn hekk, ċerti speċifikazzjonijiet partikolari tiegħu (bħall-punt tal-iffriżar) jiġu stabbiliti mill-Assoċjazzjoni Internazzjonali tat-Trasport bl-Ajru. Jinkudi komponenti tat-taħlit tal-pitrolju. Fjuwil tal-ġett tat-tip tal-pitrolju hu prodott aggregat ugwali għat-total tal-pitrolju bijoloġiku tal-ġett imħallat (pitrolju bijoloġiku tal-ġett fi fjuwil tal-ġett tat-tip tal-pitrolju) u pitrolju nonbijoloġiku tal-ġett.

3.4.15.1.   Pitrolju bijoloġiku tal-ġett imħallat (pitrolju bijoloġiku tal-ġett fi fjuwil tal-ġett tat-tip tal-pitrolju)

Il-pitrolju bijoloġiku tal-ġett li ġie mħallat fi fjuwil tal-ġett tat-tip tal-pitrolju.

3.4.15.2.   Pitrolju tal-ġett nonbijoloġiku

Il-parti li jibqa’ mill-fjuwil tal-ġett tat-tip tal-pitrolju — fjuwil tal-ġett tat-tip tal-pitrolju, eskluż il-pitrolju bijoloġiku tal-ġett imħallat (ħafna drabi jkun fjuwil tal-ġett tat-tip tal-pitrolju b’oriġini fossili).

3.4.16.   PITROLJU IEĦOR

Distillat irfinut taż-żejt mhux raffinat li jintuża f’setturi għajr fit-trasport bl-inġenji tal-ajru. Jiddistilla bejn 150°C u 300°C.

3.4.17.   ŻEJT TAL-GASS/DIŻIL (ŻEJT TAL-FJUWIL DISTILLAT)

Iż-żejt tal-gass/diżil hu primarjament distillat medju li jiddistilla b’temperatura ta’ bejn 180°C u 380°C. Jinkludi komponenti tat-taħlit. Jinstab f’diversi gradi, jiddependi mill-użi. Iż-żejt tal-gass/diżil jinkludi ż-żejt tad-diżil użat fit-triq, għall-magni diżil tal-karozzi u t-trakkijiet li jixegħlu bil-kompressjoni. Iż-żejt tal-gass/diżil jinkludi ż-żejt ħafif għat-tisħin għal użi industrijali u kummerċjali, id-diżil marittimu u d-diżil użat fit-traffiku tal-ferroviji, żejt tal-gass ieħor li jinkludi żjut tal-gass tqal oħra li jiddistillaw bejn 380°C u 540°C u li jintużaw bħala materja prima petrokimika. Iż-żejt tal-gass/diżil hu prodott aggregat ugwali għat-total tal-bijodiżils (bijodiżils fiż-żejt tal-gass/diżil) u n-nonbijodiżils imħalltin.

3.4.17.1.   Bijodiżils imħallta (bijodiżils fiż-żejt tal-gass/diżil)

Il-bijodiżils li ġew imħallta fiż-żejt tal-gass/diżil.

3.4.17.2.   Nonbijodiżils

Il-parti li jibqa’ miż-żejt tal-gass/diżil — żejt tal-gass/diżil eskluż il-bijodiżils imħallta (ħafna drabi jkun żejt tal-gass/diżil b’oriġini fossili).

3.4.18.   ŻEJT TAL-FJUWIL (ŻEJT TAL-FJUWIL TQIL)

Iż-żjut tal-fjuwil (tqal) residwi kollha (inkluż dawk miksuba bit-taħlit). Il-viskożità kinematika tkun aktar minn 10cSt f’temperatura ta’ 80°C. Il-punt tal-fjammabbiltà jkun dejjem aktar minn 50°C u d-densità tkun dejjem aktar minn 0,90kg/l. Iż-żejt tal-fjuwil hu prodott aggregat ugwali għat-total taż-żejt tal-fjuwil b’kontenut baxx tal-kubrit u ż-żejt tal-fjuwil b’kontenut għoli tal-kubrit.

3.4.18.1.   Żejt tal-fjuwil b’kontenut baxx tal-kubrit (LSFO)

Iż-żejt tal-fjuwil b’kontenut tal-kubrit inqas minn 0,5%.

3.4.18.2.   Żejt tal-fjuwil b’kontenut għoli tal-kubrit (HSFO)

Iż-żejt tal-fjuwil b’kontenut tal-kubrit ta’ 0,5% jew aktar.

3.4.19.   SPIRTU ABJAD U SBP

L-ispirtu abjad u l-SBP huma definiti bħala intermedji tad-distillat irfinuti b’distillazzjoni fil-medda tan-nafta/tal-pitrolju. Dawn jinkludu l-ispirtu industrijali (imsejjaħ ukoll SBP; żjut ħfief li jiddistillaw bejn 30°C u 200°C bi spirtu industrijali ta’ 7 jew 8 gradi, skont il-pożizzjoni tal-qtugħ fil-medda tad-distillazzjoni — il-gradi huma definiti skont id-differenza fit-temperatura bejn il-punti tad-distillazzjoni b’volum ta’ 5% u b’volum ta’ 90%, li ma tkunx aktar minn 60°C) u l-ispirti bojod (l-ispirtu industrijali b’punt tal-fjammabbiltà iżjed minn 30°C u l-medda tad-distillazzjoni tkun bejn 135°C u 200°C).

3.4.20.   LUBRIKANTI

Idrokarburi prodotti mill-prodott sekondarju tad-distillat. Dawn jintużaw l-aktar biex tonqos il-frizzjoni bejn is-superfiċji li jġorru l-piżijiet. Inkluż il-gradi maħduma kollha taż-żejt tal-lubrikazzjoni, miż-żejt tal-fus saż-żejt taċ-ċilindri, u dawk kollha li jintużaw fil-griżijiet, fiż-żjut tal-magni u fil-gradi kollha tal-istokkijiet b’bażi taż-żejt tal-lubrikazzjoni.

3.4.21.   BITUM

Idrokarbur solidu, semisolidu jew viskuż bi struttura kollojdali, li l-kulur tiegħu jvarja mill-kannella għall-iswed, miksub bħala residwu fid-distillazzjoni taż-żejt mhux raffinat, bid-distillazzjoni f’vakwu tar-residwi taż-żejt minn distillazzjoni atmosferika. Il-bitum ta’ spiss jissejjaħ asfalt u jintuża l-aktar għall-bini tat-toroq u għal materjal tal-bjut. Jinkludi l-bitum fluwidizzat u l-bitum ridott.

3.4.22.   XAMA’ TAL-PARAFFINA

Dawn huma idrokarburi alifatiċi saturati. Huma residwi estratti bit-tneħħija tax-xama’ miż-żjut tal-lubrikazzjoni. Għandhom struttura kristallina, xi ftit jew wisq fina skont il-grad. Il-karatteristiċi ewlenin tagħhom huma dawn: mingħajr kulur, mingħajr riħa u trasluċidi, b’punt tat-tidwib aktar minn 45°C.

3.4.23.   KOKK TAŻ-ŻEJT MHUX RAFFINAT

Prodott sekondarju iswed u solidu, miksub l-aktar bit-tfarrik u bil-karbonizzazzjoni ta’ materja prima derivata miż-żejt mhux raffinat, mill-qigħan bil-vakwu, mill-qatran u miż-żiftijiet fi proċessi bħall-ikkokkjar imdewwem jew l-ikkokkjar fluwidu. Jikkonsisti prinċipalment mill-karbonju (90 sa 95%) u għandu kontenut baxx tal-irmied. Jintuża bħala materja prima fil-fran tal-kokk għall-industrija tal-azzar, għall-finijiet ta’ tisħin, għall-manifattura tal-elettrodi u għall-produzzjoni tal-kimiċi. L-aktar żewġ kwalitajiet importanti huma “kokk aħdar” u “kokk kalċinat”. Jinkludi l-“kokk katalist” depożitat fuq il-katalista tul il-proċessi tar-raffinar; dan il-kokk ma jistax jiġi rkuprat u ġeneralment jinħaraq bħala fjuwil tar-raffineriji.

3.4.24.   PRODOTTI OĦRA

Il-prodotti l-oħra kollha li ma jissemmewx b’mod speċifiku hawn fuq, pereżempju: il-qatran u l-kubrit. Jinkludu l-aromatiċi (eż. il-BTX jew il-benżen, it-toluwen u l-ksilen) u l-olefini (eż. il-propilen) magħmulin fir-raffineriji.

3.5.    ENERĠIJA RINNOVABBLI U MILL-ISKART

3.5.1.   IDRO

L-enerġija potenzjali u kinetika tal-ilma kkonvertita f’elettriku fl-impjanti idroelettriċi. L-idro hu prodott aggregat ugwali għat-total tal-impjanti idro puri, l-impjanti idro mħallta u l-impjanti tal-ħżin ippompjat pur.

3.5.1.1.   Impjanti idro puri

L-impjanti idro li jużaw biss influssi diretti tal-ilma naturali u li m’għandhomx il-kapaċità għal ħżin bil-pompa idro (ippumpjar tal-ilma ’l fuq).

3.5.1.2.   Impjanti idro mħallta

L-impjanti idro b’influss tal-ilma naturali f’riżerva ta’ fuq fejn parti mit-tagħmir jew it-tagħmir kollu jista’ jintuża għall-ippumpjar tal-ilma ’l fuq; l-elettriku ġġenerat hu konsegwenza tal-influss tal-ilma naturali u tal-ilma li qabel kien ġie ppumpjat ’il fuq.

3.5.1.2.1.   Li minnhom ippumpjar

Dan hu l-porzjon tal-elettriku ġġenerat f’impjanti tal-idro mħallta bil-modalità tal-ippumpjar idro (mill-ilma li qabel kien ġie ppumpjat ’il fuq).

3.5.1.3.   Impjanti tal-ħżin ippompjat puri

L-impjanti idro li ma jkollhom l-ebda influss tal-ilma naturali fir-riżerva ta’ fuq; il-biċċa l-kbira tal-ilma li jiġġenera l-elettriku ikun ilma li qabel kien ġie ppumpjat ’il fuq; eskluż l-ilma tax-xita u tal-borra.

3.5.2.   ENERĠIJA ĠEOTERMALI

L-enerġija disponibbli bħala sħana emessa minn ġol-qoxra tad-dinja, ġeneralment bħala misħun jew stim; eskluż is-sħana ambjentali maqbuda b’pompi tas-sħana mill-art. Il-produzzjoni tal-enerġija ġeotermali hi d-differenza bejn l-entalpija tal-fluwidu magħmul fl-ispiera tal-ilma tal-produzzjoni u dik tal-fluwidu li eventwalment jintrema.

3.5.3.   SOLARI

Is-solari hu prodott aggregat ugwali għat-total tal-fotovoltajċi solari u t-termali solari.

3.5.3.1.   Fotovoltajċi solari

Id-dawl tax-xemx konvertit fl-elettriku biċ-ċelluli solari li meta esposti għad-dawl jiġġeneraw l-elettriku. L-elettriku kollu ġġenerat irid jiġi rappurtat, inkluż il-produzzjoni fuq skala żgħira u l-installazzjonijiet barra l-grilja.

3.5.3.1.1.   Bjut

Ikteb hawn il-kwantità tal-enerġija ġġenerata mill-pannelli fotovoltajċi solari fuq il-bjut tal-bini li għandhom skop primarju ieħor apparti l-produzzjoni tal-enerġija. Din tinkludi wkoll l-BIPV (PV integrati fil-bini), fejn il-pannelli PV ma jkunux fuq il-bjut iżda eż. ikunu mwaħħla mal-bini. Il-pannelli PV solari ma jitqisux bħal dawk fuq il-bjut jekk jitqiegħdu f’fetħa fuq l-art, biex jimlew xi spazju żejjed bħaż-żoni agrikoli.

3.5.3.1.2.   Barra mill-grilja

Irrapporta hawnhekk dawk li jkunu lil hinn mill-grilja kif definit fl-Anness A, 3.3.1.

3.5.3.2.   Termali solari

Is-sħana mir-radjazzjoni tax-xemx (id-dawl tax-xemx) sfruttata għall-finijiet ta’ enerġija utli. Bħala eżempju, din tinkludi l-impjanti termaelettriċi solari u s-sistemi attivi fil-produzzjoni tal-misħun sanitarju jew għat-tisħin tal-ispazju fil-binjiet. Din il-produzzjoni tal-enerġija hi s-sħana disponibbli għall-mezz tat-trasferiment tas-sħana, jiġifieri l-enerġija solari inċidentali mingħajr it-telf ottiku u tal-kolletturi. L-enerġija solari maqbuda minn sistemi passivi tat-tisħin, tat-tkessiħ u tat-tidwil tal-bini ma jiġux inklużi; trid tiġi inkluża biss l-enerġija solari relatata mas-sistemi attivi.

3.5.4.   MAREA, MEWĠ, OĊEAN

L-enerġija mekkanika derivata mill-moviment tal-marea, mill-moviment tal-mewġ jew mill-kurrent tal-oċeani, u sfruttata għall-ġenerazzjoni tal-elettriku.

3.5.5.   RIĦ

L-enerġija kinetika tar-riħ sfruttata għall-ġenerazzjoni tal-elettriku bit-turbini tar-riħ. Ir-riħ hu prodott aggregat ugwali għat-total tar-riħ fuq l-art u r-riħ lil hinn mill-kosta.

3.5.5.1.   Riħ fuq l-art

Il-produzzjoni tal-elettriku mir-riħ f’postijiet fuq l-art (inkluż il-lagi u ilmijiet interni oħra).

3.5.5.2.   Riħ lil hinn mill-kosta

Il-produzzjoni tal-elettriku f’postijiet lil hinn mill-kosta (eż. Fuq il-baħar, l-oċeani u gżejjer artifiċjali). Rigward il-produzzjoni tar-riħ lil hinn mill-kosta, ’il barra mill-ilmijiet territorjali tat-territorju kkonċernat, iridu jitqiesu l-installazzjonijiet kollha li hemm fiż-żona ekonomika esklussiva tal-pajjiż.

3.5.6.   SKART INDUSTRIJALI (IL-PORZJON NONRINNOVABBLI)

Skart b’oriġini nonrinnovabbli industrijali maħruq direttament f’installazzjonijiet speċifiċi għal finijiet ta’ enerġija sinifikanti. Il-kwantità tal-fjuwil użat trid tiġi rappurtata abbażi ta’ valur kalorifiku nett. L-iskart inċinerat mingħajr irkupru tal-enerġija hu eskluż. Il-porzjon rinnovabbli tal-iskart industrijali jrid jiġi rappurtat fil-kategorija tal-bijofjuwils li tiddeskrivih l-aħjar.

3.5.7.   SKART MUNIĊIPALI:

L-iskart iġġenerat mill-unitajiet domestiċi, l-isptarijiet u s-settur terzjarju (b’mod ġenerali l-iskart kollu li jixbah l-iskart tal-unitajiet domestiċi), li jinħaraq direttament f’installazzjonijiet speċifiċi għall-finijiet ta’ enerġija sinifikattiva. Il-kwantità tal-fjuwil użat trid tiġi rappurtata abbażi ta’ valur kalorifiku nett. L-iskart inċinerat mingħajr irkupru tal-enerġija hu eskluż. L-iskart muniċipali hu prodott aggregat ugwali għat-total tal-iskart muniċipali rinnovabbli u l-iskart muniċipali nonrinnovabbli.

3.5.7.1.   Skart muniċipali rinnovabbli

Il-porzjon tal-iskart muniċipali li għandu oriġini bijoloġika.

3.5.7.2.   Skart muniċipali nonrinnovabbli

Il-porzjon tal-iskart muniċipali b’oriġini nonbijoloġika.

3.5.8.   BIJOFJUWILS

Il-bijofjuwils huma prodott aggregat ugwali għat-total tal-bijofjuwils solidi, il-bijogass u l-bijofjuwils likwidi. Il-bijofjuwils użati għal finijiet mhux tal-enerġija huma esklużi mill-ambitu tal-istatistika dwar l-enerġija (pereżempju l-injam użat għall-kostruzzjoni jew għall-għamara, il-bijolubrikanti għal lubrikazzjoni tal-magni u l-bijobitum użat għall-kisi tal-uċuħ tat-toroq).

3.5.8.1.   Bijofjuwils solidi

Ikopru l-materjal organiku solidu, nonfossili b’oriġini bijoloġika (magħruf ukoll bħala l-bijomassa) li jista’ jintuża bħala fjuwil għall-produzzjoni tas-sħana jew għall-ġenerazzjoni tal-elettriku. Il-bijofjuwils solidi huma prodott aggregat ugwali għat-total tal-faħam tal-kannol, l-injam użat bħala fjuwil, ir-residwi u l-prodotti sekondarji tal-injam, il-likur iswed, il-bagasse, l-iskart tal-annimali, materjali u residwi veġetali oħra u frazzjoni rinnovabbli tal-iskart industrijali.

3.5.8.1.1.   Faħam tal-kannol

Il-faħam tal-kannol hu fjuwil manifatturat mill-bijofjuwils solidi — ir-residwu solidu tad-distillazzjoni distruttiva u l-piroliżi tal-injam u materjal veġetali ieħor.

3.5.8.1.2.   Injam għall-fjuwil, residwi u prodotti sekondarji tal-injam

L-injam li jintuża bħala fjuwil jew għall-ħruq (bħala zkuk, friegħi mejtin, gerbub jew biċċiet tal-injam) miksub mill-foresti naturali jew ġestiti, jew mi nn siġar iżolati. Inkluż ir-residwi tal-injam użati bħala fjuwil, li jżommu l-kompożizzjoni oriġinali tal-injam; inkluż il-gerbub tal-injam. Eskluż il-faħam tal-kannol u l-likur iswed. Il-kwantità tal-fjuwil użat trid tiġi rappurtata abbażi ta’ valur kalorifiku nett.

3.5.8.1.2.1.   Gerbub tal-injam

Il-gerbub tal-injam hu prodott ċilindriku agglomerat mir-residwi tal-injam bil-kompressjoni.

3.5.8.1.3.   Likur iswed

L-enerġija mil-likur mingħajr alkalina miksuba mid-diġesturi waqt il-produzzjoni tal-kubrit jew il-polpa tas-soda meħtieġa għall-manifattura tal-karta. Il-kwantità tal-fjuwil użat trid tiġi rappurtata abbażi ta’ valur kalorifiku nett.

3.5.8.1.4.   Bagassa

Il-fjuwil miksub mill-fibra li jibqa’ wara l-estrazzjoni tal-meraq fl-ipproċessar tal-kannamiela. Il-kwantità tal-fjuwil użat trid tiġi rappurtata abbażi ta’ valur kalorifiku nett.

3.5.8.1.5.   Skart tal-annimali

L-enerġija mir-rawt tal-annimali, mir-residwi tal-laħam u tal-ħut li meta jinxfu jintużaw direttament bħala fjuwil. Eskluż l-iskart użat fl-impjanti tal-fermentazzjoni anaerobika. Il-gassijiet tal-fjuwil minn dawn l-impjanti jiġu inklużi mal-bijogassijiet. Il-kwantità tal-fjuwil użat trid tiġi rappurtata abbażi ta’ valur kalorifiku nett.

3.5.8.1.6.   Residwi u materjali veġetali oħra

Il-bijofjuwils mhux speċifikati band’oħra, inkluż it-tiben, il-qxur tal-ħaxix, il-qxur tal-ġewż mitħun, il-friegħi mejta miżbura, ir-residwi taż-żebbuġ u skart ieħor li joħroġ mill-manutenzjoni, mill-qtugħ u mill-ipproċessar tal-pjanti. Il-kwantità tal-fjuwil użat trid tiġi rappurtata abbażi ta’ valur kalorifiku nett.

3.5.8.1.7.   Porzjon rinnovabbli tal-iskart industrijali

Il-porzjon rinnovabbli solidu tal-iskart industrijali maħruq direttament f’installazzjonijiet speċifiċi għall-finijiet ta’ enerġija sinifikattiva (pereżempju iżda mhux biss, il-porzjon tal-lastiku naturali fit-tajers tal-lastiku mormija jew il-porzjon tal-fibri naturali fl-iskart tessili — mill-kategoriji tal-iskart 07.3 u 07.6, rispettivament, kif definit fir-Regolament (KE) Nru 2150/2002 dwar l-istatistika tal-iskart). Il-kwantità tal-fjuwil użat trid tiġi rappurtata abbażi ta’ valur kalorifiku nett.

3.5.8.2.   Bijogass

Gass magħmul l-aktar mill-metan u mid-dijossidu tal-karbonju, magħmul bid-diġestjoni anaerobika tal-bijomassa jew bi proċessi termali mill-bijomassa, inkluż il-bijomassa fl-iskart. Il-kwantità tal-fjuwil użat trid tiġi rappurtata abbażi ta’ valur kalorifiku nett. Il-bijogass hua prodott aggregat ugwali għat-total tal-gass tal-miżbliet, il-gass tal-ħama tad-dranaġġ, bijogassijiet oħra mid-diġestjoni anaerobika u l-bijogassijiet minn proċessi termali.

3.5.8.2.1.   Gass tal-miżbliet

Il-bijogass magħmul mid-diġestjoni anaerobika tal-iskart tal-miżbliet.

3.5.8.2.2.   Gass tal-ħama tad-dranaġġ

Il-bijogass magħmul mill-fermentazzjoni anerobika tal-ħama tad-dranaġġ.

3.5.8.2.3.   Bijogassijiet oħra mid-diġestjoni anaerobika

Il-bijogass magħmul mill-fermentazzjoni anaerobika tal-islurries tal-annimali u tal-iskart tal-biċċeriji, tal-birreriji u ta’ industriji agroalimentari oħra.

3.5.8.2.4.   Bijogassijiet mill-proċessi termali

Il-bijogass magħmul mill-proċessi termali (b’gassifikazzjoni jew piroliżi) tal-bijomassa.

3.5.8.3.   Bijofjuwils likwidi

Din il-kategorija tinkludi l-fjuwils likwidi kollha b’oriġini naturali (eż. prodotti mill-bijomassa u/jew il-frazzjoni tal-iskart bijodegradabbli), adattati biex jitħalltu ma’ fjuwils b’oriġini fossili jew minflokhom. Il-kwantitajiet tal-bijofjuwils likwidi rappurtati f’din il-kategorija jridu jkunu jinkludu l-kwantitajiet tal-bijofjuwil pur li ma jkunux tħalltu mal-fjuwils fossili. Fil-każ partikolari tal-importazzjonijiet u tal-esportazzjonijiet tal-bijofjuwils likwidi, hu rilevanti biss il-kummerċ tal-kwantitajiet mhux imħallta mal-fjuwils tat-trasport (jiġifieri fil-forma pura tagħhom); il-kummerċ tal-bijofjuwils likwidi mħalltin fi fjuwils tat-trasport irid jiġi rappurtat fil-kategorija tal-prodotti taż-żejt. Iridu jiġu rappurtati biss il-bijofjuwils likwidi użati għal finijiet tal-enerġija, maħruqa direttament jew imħallta mal-fjuwils fossili. Il-bijofjuwils likwidi huma prodott aggregat ugwali għat-total tal-bijogażolina, il-bijodiżils, il-pitrolju bijoloġiku tal-ġett u bijofjuwils likwidi oħra.

3.5.8.3.1.   Biogażolina

Il-bijofjuwils likwidi adattati biex jitħalltu mal-gażolina tal-magni minn oriġini fossili jew minflokha.

3.5.8.3.1.1.   Bijoetanol

L-etanol bħala parti mill-bijogażolina.

3.5.8.3.2.   Bijodiżils

Il-bijofjuwils likwidi adattati biex jitħalltu maż-żejt tal-gass/diżil minn oriġini fossili jew minfloku.

3.5.8.3.3.   Pitrolju bijoloġiku tal-ġett

Il-bijofjuwils likwidi adattati biex jitħalltu mal-pitrolju tal-ġett minn oriġini fossili jew minfloku.

3.5.8.3.4.   Bijofjuwils likwidi oħra

Il-bijofjuwils likwidi li mhuma inklużi fl-ebda kategorija preċedenti.

3.5.9.   SĦANA AMBJENTALI

L-enerġija tas-sħana f’livell ta’ temperatura utli estratta (maqbuda) bil-pompi tas-sħana li jeħtieġu l-elettriku jew enerġija awżiljarja oħra biex jaħdmu. Din l-enerġija tas-sħana tista’ tinħażen fl-arja ambjentali, taħt wiċċ l-art jew fl-ilma tal-wiċċ. Il-valuri jridu jiġu rappurtati bl-istess metodoloġija bħal dik użata għar-rappurtar tal-enerġija tas-sħana maqbuda mill-pompi tas-sħana skont id-Direttiva 2009/28/KE u d-Direttiva (UE) 2018/2001, iżda jridu jiġu inklużi l-pompi tas-sħana kollha irrispettivament mil-livell tal-prestazzjoni tagħhom.

3.6.    IDROĠENU

L-idroġenu użat bħala materja prima, fjuwil jew trasportatur/għall-ħżin tal-enerġija jrid jiġi rappurtat. L-idroġenu jrid jiġi rappurtat, anki meta jkun awtoġġenerat u awtokkonstmat. L-idroġenu fit-taħlitiet ma jridx jiġi rappurtat għajr meta jiġi estratt (separat) għall-użu tal-enerġija u mhux tal-enerġija.