Artikolu 8 Stabbiliment ta' pjanijiet ta' azzjoni preventiva u pjanijiet ta' emerġenza

Il-kapitoli reġjonali għandhom jiġu żviluppati b'mod konġunt mill-Istati Membri kollha fil-grupp ta' riskju qabel ma jiġu inkorporati fil-pjanijiet nazzjonali rispettivi. Il-Kummissjoni għandha taġixxi bħala faċilitatur sabiex tagħmel possibbli li l-kapitoli reġjonali b'mod kollettiv isaħħu s-sigurtà tal-provvista tal-gass fl-Unjoni, u, ma jwasslu għal ebda kontradizzjoni, u tegħleb kull xkiel għall-kooperazzjoni.

Il-kapitoli reġjonali għandhom jinkludu miżuri transfruntieri xierqa u effettivi, inkluż fir-rigward tal-ħażna tal-gass u tal-LNG, soġġett għal ftehim bejn l-Istati Membri li jimplimentaw il-miżuri mill-istess gruppi ta’ riskju jew minn gruppi ta’ riskju differenti affettwati mill-miżura abbażi tas-simulazzjoni msemmija fl-Artikolu 7(1) u l-valutazzjoni tar-riskju komuni.

Il-Kummissjoni jista' jkollha rwol ta' faċilitazzjoni fil-preparazzjoni tal-pjan ta' azzjoni preventiva u l-pjan ta' emerġenza, b'mod partikolari għall-istabbiliment ta' mekkaniżmu ta' kooperazzjoni. Jekk l-awtoritajiet kompetenti fi grupp ta' riskju ma jaqblux dwar mekkaniżmu ta' kooperazzjoni, il-Kummissjoni għandha tipproponi mekkaniżmu ta' kooperazzjoni għal dak il-grupp ta' riskju. L-awtoritajiet kompetenti kkonċernati għandhom jaqblu dwar il-mekkaniżmu ta' kooperazzjoni għal dak il-grupp ta' riskju b'konsiderazzjoni tal-proposta tal-Kummissjoni. L-awtoritajiet kompetenti għandhom jiżguraw il-monitoraġġ regolari tal-implimentazzjoni tal-pjan ta' azzjoni preventiva u l-pjan ta' emerġenza.

L-awtoritajiet kompetenti għandhom, f'kull grupp ta' riskju, jiskambjaw abbozzi ta' pjanijiet ta' azzjoni preventiva u pjanijiet ta' emerġenza bi proposti għall-kooperazzjoni, mhux aktar tard minn ħames xhur qabel id-data ta' skadenza biex jitressqu l-pjanijiet.

Il-verżjonijiet finali tal-kapitoli reġjonali msemmija fil-paragrafu 3 għandhom jiġu miftiehma mill-Istati Membri kollha fil-grupp ta' riskju. Il-pjanijiet ta' azzjoni preventiva u l-pjanijiet ta' emerġenza għandhom ikollhom fihom ukoll il-miżuri nazzjonali neċessarji għall-implimentazzjoni u l-infurzar tal-miżuri transkonfinali fil-kapitoli reġjonali.

Fi żmien erba' xhur min-notifika mill-awtoritajiet kompetenti, il-Kummissjoni għandha tivvaluta l-pjanijiet waqt li tqis il-fehmiet espressi fil-GCG.

Fil-każ ta' nuqqas ta' qbil marbut mal-elementi msemmijin fil-paragrafu 8, il-Kummissjoni tista', fi żmien erba' xhur mit-tweġiba tal-awtorità kompetenti, tirtira t-talba tagħha jew tiltaqa' mal-awtorità kompetenti u, fejn il-Kummissjoni tqis li dan ikun meħtieġ, mal-GCG, sabiex jikkunsidraw il-kwistjoni. Il-Kummissjoni għandha tistipula r-raġunijiet dettaljati tagħha biex titlob kwalunkwe emenda tal-pjan ta' azzjoni preventiva jew tal-pjan ta' emerġenza. L-awtorità kompetenti kkonċernata għandha tikkunsidra b'mod sħiħ ir-raġunijiet dettaljati tal-Kummissjoni.

Fejn applikabbli, l-awtorità kompetenti kkonċernata għandha bla dewmien temenda u tagħmel pubbliku l-pjan ta' azzjoni preventiva emendat jew il-pjan ta' emerġenza emendat.

Fejn il-pożizzjoni finali tal-awtorità kompetenti kkonċernata tkun differenti mir-raġunijiet dettaljati tal-Kummissjoni, dik l-awtorità kompetenti għandha tipprovdi u tagħmel pubblika, flimkien mal-pożizzjoni tagħha u r-raġunijiet dettaljati tal-Kummissjoni, il-ġustifikazzjoni li ssostni l-pożizzjoni tagħha fi żmien xahrejn mir-riċezzjoni tar-raġunijiet dettaljati tal-Kummissjoni.