Artikolu 20 Aċċess għall-grilji u t-tħaddim tagħhom

Fejn ikun rilevanti, l-Istati Membri għandhom jevalwaw il-ħtieġa tal-estensjoni tal-infrastruttura tan-netwerk tal-gass eżistenti sabiex jiffaċilitaw l-integrazzjoni tal-gass minn sorsi rinnovabbli.

Fejn ikun rilevanti, l-Istati Membri għandhom jeħtieġu li l-operaturi ta' sistemi ta' trasmissjoni u l-operaturi ta' sistemi ta' distribuzzjoni fit-territorju tagħhom jippubblikaw regoli tekniċi skont l-Artikolu 8 tad-Direttiva 2009/73/KE, b'mod partikolari rigward ir-regoli tal-konnessjoni man-netwerk li jinkludu rekwiżiti dwar il-kwalità tal-gass, l-odorazzjoni tal-gass u l-pressjoni tal-gass. L-Istati Membri għandhom jeħtieġu wkoll mill-operaturi ta' sistemi ta' trasmissjoni u ta' sistemi ta' distribuzzjoni li jippubblikaw it-tariffi ta' konnessjoni biex issir il-konnessjoni tal-gass minn sorsi rinnovabbli ibbażati fuq kriterji oġġettivi, trasparenti u mhux diskriminatorji.

Skont l-evalwazzjoni inkluża fil-pjanijiet integrati nazzjonali tagħhom dwar l-enerġija u l-klima ppreżentati skont l-Artikoli 3 u 14 tar-Regolament (UE) 2018/1999 u f’konformità mal-Anness I ta’ dak ir-Regolament, dwar il-ħtieġa li jinbnew infrastrutturi ġodda għat-tisħin u t-tkessiħ distrettwali prodotti minn sorsi rinnovabbli bil-għan li tinkiseb il-mira tal-Unjoni ġenerali stipulata fl-Artikolu 3(1) ta’ din id-Direttiva, l-Istati Membri għandhom, meta rilevanti, jieħdu l-passi meħtieġa bil-għan li tiġi żviluppata infrastruttura distrettwali għall-promozzjoni tat-tisħin u t-tkessiħ minn sorsi rinnovabbli, bħall-enerġija solari termika, l-enerġija solari fotovoltajka, il-pompi tas-sħana mħaddma mill-elettriku rinnovabbli bl-użu tal-enerġija ambjentali u l-enerġija ġeotermika, teknoloġija oħra tal-enerġija ġeotermika, il-bijomassa, il-bijogass, il-bijolikwidi u s-sħana u l-kesħa mormija, fejn possibbli f’kombinazzjoni mal-ħżin tal-enerġija termika, sistemi tar-rispons tad-domanda u installazzjonijiet li jikkonvertu l-elettriku għas-sħana,.