Artikolu 18 Soluzzjoni tat-tilwim

1.   Fil-każ ta’ tilwim konness mal-obbligi stabbiliti f’dan ir-Regolament bejn l-impriżi li jipprovdu networks jew servizzi tal-komunikazzjoni elettronika fi Stat Membru, għandhom japplikaw il-proċeduri għas-soluzzjoni tat-tilwim stabbiliti fl-Artikoli 26 u 27 tad-Direttiva (UE) 2018/1972.

It-tilwim bejn l-operaturi tan-network miżjur u operaturi oħra dwar ir-rati applikati għall-inputs meħtieġa għall-forniment ta’ servizzi tar-roaming bl-ingrossa regolati jista’ jitressaq quddiem l-awtorità jew l-awtoritajiet regolatorji nazzjonali kompetenti skont l-Artikolu 26 u 27 tad-Direttiva (UE) 2018/1972. L-awtorità jew l-awtoritajiet regolatorji nazzjonali kompetenti għandhom jinnotifikaw lill-BEREC b’kwalunkwe tilwim transfruntier biex tinstab soluzzjoni konsistenti għat-tilwim. Meta l-BEREC ikun ġie kkonsultat, l-awtorità jew l-awtoritajiet regolatorji nazzjonali kompetenti għandhom jistennew l-opinjoni tal-BEREC qabel ma jieħdu azzjoni biex isolvu t-tilwim.

2.   Fil-każ tat-tilwim mhux solvut li jinvolvi klijent jew utent finali u li jikkonċerna kwistjoni li taqa’ fil-kamp ta’ applikazzjoni ta’ dan ir-Regolament, l-Istati Membri għandhom jiżguraw id-disponibbiltà tal-proċeduri għal soluzzjoni tat-tilwim barra mill-qorti stabbiliti fl-Artikolu 25 tad-Direttiva (UE) 2018/1972.