Artikolu 7 L-akkwist pubbliku

L-Istati Membri għandhom jiżguraw ukoll li meta jikkonkludu l-kuntratti pubbliċi u l-konċessjonijiet ta’ valur daqs jew aktar mil-limiti msemmija fl-ewwel subparagrafu, l-awtoritajiet kontraenti u l-entitajiet kontraenti japplikaw il-prinċipju “l-Effiċjenza Enerġetika tiġi l-Ewwel” f’konformità mal-Artikolu 3, inkluż għal dawk il-kuntratti pubbliċi u l-konċessjonijiet li għalihom m’hemm previst l-ebda rekwiżit speċifiku fl-Anness IV.

Biex tkun żgurata t-trasparenza fl-applikazzjoni tar-rekwiżiti tal-effiċjenza enerġetika fil-proċess tal-akkwist, l-Istati Membri għandhom jiżguraw li l-awtoritajiet kontraenti u l-entitajiet kontraenti agħmlu informazzjoni disponibbli għall-pubbliku dwar l-impatt tal-effiċjenza enerġetika ta’ kuntratti b’valur daqs jew aktar mil-limiti msemmija fil-paragrafu 1 billi jippubblikaw dik l-informazzjoni fl-avviżi rispettivi fuq Tenders Electronic Daily (TED), skont id-Direttivi 2014/23/UE, 2014/24/UE u 2014/25/UE, u r-Regolament ta’ Implimentazzjoni tal-Kummissjoni (UE) 2019/1780 ( 6 ). L-awtoritajiet kontraenti jistgħu jiddeċiedu li jirrikjedu li l-offerenti jiżvelaw informazzjoni dwar il-potenzjal ta’ tisħin globali taċ-ċiklu tal-ħajja, l-użu ta’ materjali b’livell baxx ta’ emissjonijiet tal-karbonju u ċ-ċirkolarità tal-materjali użati għal bini ġdid u bini li għandu jiġi rinnovat. L-awtoritajiet kontraenti jistgħu jagħmlu dik l-informazzjoni disponibbli pubblikament għall-kuntratti, b’mod partikolari għal bini ġdid li jkollu erja tal-art akbar minn 2 000 m2.

L-Istati Membri għandhom jappoġġaw lill-awtoritajiet kontraenti u lill-entitajiet kontraenti fl-adozzjoni tar-rekwiżiti tal-effiċjenza enerġetika, inkluż fil-livell reġjonali u lokali, billi jipprovdu regoli u linji gwida ċari, inkluż metodoloġiji, dwar il-valutazzjoni tal-kostijiet taċ-ċiklu tal-ħajja u l-impatti u l-kostijiet ambjentali, jistabbilixxu ċentri ta’ appoġġ għall-kompetenzi, iħeġġu l-kooperazzjoni fost l-awtoritajiet kontraenti, inkluż bejn il-fruntieri, u jużaw l-akkwist aggregat u l-akkwist diġitali meta possibbli.

L-Istati Membri għandhom jirrappurtaw lill-Kummissjoni dwar il-miżuri meħuda biex jindirizzaw l-ostakli għall-adozzjoni tat-titjib tal-effiċjenza enerġetika bħala parti mir-rapporti ta’ progress nazzjonali integrati għall-enerġija u l-klima tagħhom ippreżentati skont l-Artikolu 17 tar-Regolament (UE) 2018/1999.