Artikolu 15 Qabżiet tal-livelli limitu ta’ allert jew tal-livelli limitu ta’ informazzjoni

1.   Il-livelli limitu ta’ allert għall-konċentrazzjonijiet tad-diossidu tal-kubrit, tal-materja partikolata (PM10 u PM2,5) u tal-ożonu fl-arja ambjentali għandhom ikunu dawk stabbiliti fit-Taqsima 4, il-Punt A, tal-Anness I.

2.   Il-livelli limitu ta’ informazzjoni għall-konċentrazzjonijiet tad-diossidu tal-kubrit, tad-diossidu tan-nitroġenu, tal-materja partikolata (PM10 u PM2,5) u tal-ożonu għandhom ikunu dawk stabbiliti fit-Taqsima 4, il-Punt B, tal-Anness I.

3.   Meta jinqabeż kwalunkwe livell limitu ta’ allert stabbilit fit-Taqsima 4, il-Punt A, tal-Anness I jew, meta jkun xieraq, jekk ikun imbassar li se jinqabeż abbażi ta’ applikazzjonijet tal-immudellar jew għodod ta’ tbassir oħra, l-Istati Membri għandhom, meta jkun xieraq, jimplimentaw mingħajr dewmien żejjed il-miżuri ta’ emerġenza indikati fil-pjanijiet ta’ azzjoni għal żmien qasir stabbiliti skont l-Artikolu 20.

4.   Fejn jinqabeż kwalunkwe livell limitu ta’ allert jew kwalunkwe livell limitu ta’ informazzjoni stabbilit fit-Taqsima 4 tal-Anness I jew, meta jkun xieraq, jekk ikun imbassar li se jinqabeż abbażi tal-applikazzjonijiet ta’ mmudellar jew għodod ta’ tbassir oħra, l-Istati Membri għandhom jieħdu l-passi meħtieġa biex jinformaw lill-pubbliku fl-inqas perjodu ta’ żmien possibbli u kemm jista’ jkun fi żmien ftit sigħat, f’konformità mal-punti 2 u 3 ta-Anness X, billi jintużaw media u kanali tal-komunikazzjoni differenti u jiġi żgurat aċċess pubbliku wiesa’.

5.   L-Istati Membri jistgħu jżommu jew jintroduċu miżuri protettivi aktar iebsa, inklużi livelli limitu ta’ allert jew livelli limitu ta’ informazzjoni li jkunu aktar iebsa minn dawk imsemmija f’dan l-Artikolu, f’konformità mal-Artikolu 193 tat-TFUE. L-Istati Membri għandhom jinnotifikaw tali miżuri lill-Kummissjoni fi tliet xhur mill-adozzjoni tagħhom.