Artikolu 47 Proġetti komuni

1.   Il-Kummissjoni tista’ tistabbilixxi proġetti komuni, abbażi tal-ħtiġijiet ta’ sinkronizzazzjoni fost il-partijiet ikkonċernati, għall-implimentazzjoni tal-bidliet operazzjonali essenzjali identifikati fil-Pjan Regolatorju Ewropew tal-ATM li għandhom impatt fuq in-network kollu u ladarba tinkiseb biżżejjed maturità għall-implimentazzjoni li tippermetti kapaċitajiet interoperabbli fl-Istati Membri kollha bil-ħsieb li titjieb il-prestazzjoni tal-Ajru Uniku Ewropew.

2.   Il-Kummissjoni tista’ tistabbilixxi wkoll mekkaniżmi ta’ governanza għal proġetti komuni u għall-implimentazzjoni tagħhom. Il-partijiet ikkonċernati ċivili u militari rilevanti kollha għandhom ikunu involuti f’dawn il-mekkaniżmi sal-aktar punt possibbli u, fejn possibbli u kif xieraq, ikollhom rwol ewlieni.

3.   Il-proġetti komuni jistgħu jkunu eliġibbli għal finanzjament tal-Unjoni fi ħdan il-qafas finanzjarju pluriennali. Għal dan il-għan, u mingħajr preġudizzju għall-kompetenza tal-Istati Membri li jiddeċiedu dwar l-użu tar-riżorsi finanzjarji tagħhom, il-Kummissjoni għandha twettaq analiżi indipendenti tal-kostbenefiċċji u konsultazzjonijiet xierqa mal-Istati Membri u mal-partijiet ikkonċernati rilevanti f’konformità mal-Artikolu 49, filwaqt li tesplora l-prijoritizzazzjoni u kull mezz xieraq għall-finanzjament tal-implimentazzjoni tagħhom.

4.   Il-Kummissjoni għandha tadotta atti ta’ implimentazzjoni li jistabbilixxu l-proġetti komuni u l-mekkaniżmi ta’ governanza msemmija fil-paragrafi 1 u 2 ta’ dan l-Artikolu. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 48(3).