KAPITOLU V SPAZJU TAL-AJRU, INTEROPERABBILTÀ U INNOVAZZJONI TEKNOLOĠIKA

Artikolu 43

Mingħajr preġudizzju għall-pubblikazzjoni mill-Istati Membri tal-informazzjoni ajrunawtika u b’mod konsistenti ma’ dik il-pubblikazzjoni, il-Maniġer tan-Network għandu jistabbilixxi, mal-applikazzjoni tad-deċiżjoni ta’ implimentazzjoni msemmija fl-Artikolu 38(3) ta’ dan ir-Regolament, infrastruttura ta’ informazzjoni ajrunawtika għall-Unjoni kollha biex tiżdied id-disponibbiltà ta’ informazzjoni ajrunawtika elettronika ta’ kwalità għolja, ippreżentata b’mod aċċessibbli u li taqdi r-rekwiżiti tal-utenti rilevanti kollha mil-lat ta’ kwalità tad-data u tempestività. L-informazzjoni ajrunawtika magħmula disponibbli b’dan il-mod għandha tkun biss l-informazzjoni li tikkonforma mar-rekwiżiti essenzjali stipulati fil-punt 2.1 tal-Anness VIII tar-Regolament (UE) 2018/1139.

Artikolu 44

Il-Kummissjoni għandha, f’konformità mal-proċedura ta’ eżami msemmija fl-Artikolu 48(3), tadotta dispożizzjonijiet xierqa biex tiżgura l-implimentazzjoni uniformi tal-klassifikazzjoni tal-ispazju tal-ajru tal-ICAO, b’adattament xieraq, bil-ħsieb li jiġi żgurat forniment mingħajr xkiel ta’ servizzi tat-traffiku tal-ajru sikuri u effiċjenti fi ħdan l-Ajru Uniku Ewropew.

Artikolu 46

L-entitajiet inkarigati mill-kompiti stabbiliti fid-dritt tal-Unjoni fl-oqsma tal-koordinazzjoni tal-fażi tad-definizzjoni ta’ SESAR, tal-fażi tal-iżvilupp ta’ SESAR u tal-fażi tal-mobilizzazzjoni ta’ SESAR, skont il-każ, għandhom jiżguraw koordinazzjoni effettiva bejn dawk it-tliet fażijiet ħalli tinkiseb tranżizzjoni bla xkiel u fil-ħin bejniethom, filwaqt li b’mod partikolari jiffokaw fuq il-fażi tal-industrijalizzazzjoni.

Il-partijiet ikkonċernati ċivili u militari rilevanti kollha għandhom ikunu involuti kemm jista’ jkun.