Artikolu 2 Definizzjonijiet

“Ċentru Ċibernetiku Transfruntier” tfisser pjattaforma multinazzjonali, stabbilita bi ftehim tal-konsorzju bil-miktub li fi struttura ta’ network ikkoordinat tiġbor flimkien Ċentri Ċibernetiċi Nazzjonali minn tal-anqas tliet Stati Membri, u li titfassal biex issaħħaħ il-monitoraġġ, l-identifikazzjoni u l-analiżi tat-theddid ċibernetiku, biex tipprevjeni l-inċidenti ċibernetiċi u biex tappoġġa l-ġenerazzjoni ta’ intelligence dwar it-theddid ċibernetiku, b’mod partikolari bl-iskambju ta’ data u informazzjoni rilevanti, anonimizzati meta jkun xieraq, kif ukoll bil-kondiviżjoni ta’ għodod mill-aktar avvanzati u bl-iżvilupp konġunt ta’ identifikazzjoni, analiżi, u kapaċitajiet tal-prevenzjoni u tal-protezzjoni fil-qasam ċibernetiku f’kuntest ta’ fiduċja;

“Konsorzju tal-Hosting” tfisser konsorzju magħmul minn Stati Membri parteċipanti, li qablu li jistabbilixxu u li jikkontribwixxu għall-akkwist ta’ għodod, infrastrutturi jew servizzi għaċ-Ċentru Ċibernetiku Transfruntier, u għall-funzjonament tiegħu;

“CSIRT” tfisser CSIRT maħtura jew stabbilita skont l-Artikolu 10 tad-Direttiva (UE) 2022/2555;

“entità” tfisser entità kif definit fl-Artikolu 6, il-punt (38), tad-Direttiva (UE) 2022/2555;

“entitajiet li joperaw fis-setturi ta’ kritiċità għolja jew setturi kritiċi oħra” tfisser it-tipi ta’ entità elenkati fl-Anness I tad-Direttiva (UE) 2022/2555;

“entitajiet li joperaw f’setturi kritiċi oħra” tfisser it-tipi ta’ entità elenkati fl-Anness II għad-Direttiva (UE) 2022/2555;

“riskju” tfisser riskju kif definit fl-Artikolu 6, il-punt (9), tad-Direttiva (UE) 2022/2555;

“theddida ċibernetika” tfisser theddida ċibernetika kif definit fl-Artikolu 2, il-punt (8), tar-Regolament (UE) 2019/881;

“inċident” tfisser inċident kif definit fl-Artikolu 6, il-punt (6), tad-Direttiva (UE) 2022/2555;

“inċident taċ-ċibersigurtà sinifikanti” tfisser inċident li jissodisfa l-kriterji stabbiliti fl-Artikolu 23(3) tad-Direttiva (UE) 2022/2555;

“inċident kbir” tfisser inċident kbir kif definit fl-Artikolu 3, punt (8), tar-Regolement (UE, Euratom) 2023/2841 tal-Parlament Ewropew u tal-Kunsill ( 1 );

“inċident taċ-ċibersigurtà fuq skala kbira” tfisser inċident taċ-ċibersigurtà fuq skala kbira kif definit fl-Artikolu 6, il-punt (7), tad-Direttiva (UE) 2022/2555;

“inċident taċ-ċibersigurtà fuq skala ekwivalenti għal skala kbira” tfisser, fil-każ ta’ istituzzjonijiet, korpi, uffiċċji u aġenziji tal-Unjoni, inċident kbir u, fil-każ ta’ pajjiżi terzi assoċjati mad-DEP, inċident li jikkawża livell ta’ tfixkil li jaqbeż il-kapaċità ta’ pajjiż terz assoċjat mad-DEP li jirrispondi għalih;

“pajjiż terz assoċjat mad-DEP” tfisser pajjiż terz li huwa parti għal ftehim mal-Unjoni li jippermetti l-parteċipazzjoni tiegħu fil-Programm Ewropa Diġitali skont l-Artikolu 10 tar-Regolament (UE) 2021/694;

“awtorità kontraenti” tfisser il-Kummissjoni jew, sa fejn il-funzjonament u l-amministrazzjoni tar-Riżerva tal-UE għaċ-Ċibersigurtà jkunu ġew fdati lill-ENISA skont l-Artikolu 14(5), l-ENISA;

“fornitur ta’ servizzi tas-sigurtà ġestiti” tfisser fornitur ta’ servizzi tas-sigurtà ġestiti kif definit fl-Artikolu 6, il-punt (40), tad-Direttiva (UE) 2022/2555;

“fornituri fdati ta’ servizzi tas-sigurtà ġestiti” tfisser fornituri ta’ servizzi tas-sigurtà ġestiti magħżula biex jiġu inklużi fir-Riżerva tal-UE għaċ-Ċibersigurtà, f’konformità mal-Artikolu 17.