Artikolu 21 Mekkaniżmu Ewropew tar-Rieżami tal-Inċidenti taċ-Ċibersigurtà

Meta tintalab mill-Kummissjoni jew mill-EU-CyCLONe, l-ENISA għandha, bl-appoġġ tan-network tas-CSIRTs u bl-approvazzjoni tal-Istati Membri kkonċernati, tirrieżamina u tivvaluta t-theddid ċibernetiku, il-vulnerabbiltajiet magħrufin sfruttabbli u l-azzjonijiet tal-mitigazzjoni fir-rigward ta’ xi inċident taċ-ċibersigurtà sinifikanti jew inċident taċ-ċibersigurtà fuq skala kbira speċifiku. Wara t-tlestija tar-rieżami u tal-valutazzjoni tal-inċident, bil-għan li tislet tagħlimiet biex tevita jew timmitiga l-inċidenti fil-futur, l-ENISA għandha tibgħat ir-rapport tar-rieżami tal-inċident lill-EU-CyCLONe, lin-network tas-CSIRTs, lill-Istati Membri kkonċernati u lill-Kummissjoni biex tappoġġahom fit-twettiq ta’ dmirijiethom, b’mod partikolari l-kompiti stabbiliti fl-Artikoli 15 u 16 tad-Direttiva (UE) 2022/2555. Fejn inċident ikollu impatt fuq pajjiż terz assoċjat mad-DEP, l-ENISA għandha tforni r-rapport lill-Kunsill. F’tali każijiet, il-Kummissjoni għandha tforni r-rapport lir-Rappreżentant Għoli.

Biex tħejji r-rapport dwar ir-rieżami tal-inċidenti msemmi fil-paragrafu 1 ta’ dan l-Artikolu, l-ENISA għandha tikkoopera mal-partijiet ikkonċernati rilevanti kollha, inkluż mar-rappreżentanti tal-Istati Membri, il-Kummissjoni, istituzzjonijiet, korpi, uffiċċji u aġenziji rilevanti oħra tal-Unjoni, l-industrija, inklużi l-fornituri tas-servizzi tas-sigurtà ġestiti, u l-utenti tas-servizzi taċ-ċibersigurtà, kif ukoll tiġbor feedback mingħandhom. Meta xieraq, l-ENISA għandha, f’kooperazzjoni mas-CSIRTs u, meta rilevanti, mal-awtoritajiet kompetenti maħtura jew stabbiliti skont l-Artikolu 8(1) tad-Direttiva (UE) 2022/2555, tikkollabora wkoll mal-entitajiet affettwati minn inċidenti taċ-ċibersigurtà sinifikanti jew inċidenti taċ-ċibersigurtà fuq skala kbira. Ir-rappreżentanti kkonsultati għandhom jiżvelaw kull kunflitt ta’ interess potenzjali.

Ir-rapport dwar ir-rieżami tal-incident msemmi fil-paragrafu 1 ta’ dan l-Artikolu għandu jkopri rieżami u analiżi tal-inċident taċ-ċibersigurtà sinifikanti jew l-inċident taċ-ċibersigurtà fuq skala kbira speċifiku, inkluż il-kawżi ewlenin, il-vulnerabbiltajiet magħrufin sfruttabbli u t-tagħlimiet meħuda. L-ENISA għandha tiżgura li r-rapport ikun konformi mal-liġi tal-Unjoni jew il-liġi nazzjonali dwar il-protezzjoni tal-informazzjoni sensittiva jew klassifikata. Jekk l-Istat Membru rilevanti jew utent ieħor imsemmi fl-Artikolu 14(3) li huma affettwati mill-inċident jirrikjedu dan, id-data u l-informazzjoni fir-rapport għandhom ikunu anonimizzati. Dan ma għandu għandux jinkludi l-ebda dettall dwar vulnerabbiltajiet sfruttati b’mod attiv li għadhom mhux ikkoreġuti.

Fejn xieraq, ir-rapport dwar ir-rieżami tal-inċident għandu jfassal rakkomandazzjonijiet biex tittejjeb il-pożizzjoni ċibernetika tal-Unjoni u jista’ jinkludi l-aħjar prattiki u t-tagħlimiet meħuda mill-partijiet ikkonċernati rilevanti.

L-ENISA tista’ toħroġ verżjoni disponibbli pubblikament tar-rapport dwar ir-rieżami tal-inċident. Dik il-verżjoni tar-rapport għandha tinkludi biss informazzjoni pubblika affidabbli, jew informazzjoni affidabbli oħra bil-kunsens tal-Istat Membru kkonċernat u, fir-rigward tal-informazzjoni relatata ma’ utent kif imsemmi fl-Artikolu 14(3), il-punt (b) jew (c), bil-kunsens ta’ dak l-utent.