Artikolu 39 Dikjarazzjoni tal-konformità tal-UE

1.   Id-dikjarazzjoni tal-konformità tal-UE għandha tiddikjara li ntwera li r-rekwiżiti essenzjali stabbiliti fi jew skont l-Artikoli 5 sa 12 ġew issodisfati.

2.   Id-dikjarazzjoni tal-konformità tal-UE għandu jkollha l-istruttura tal-mudell stabbilita fl-Anness VIII, ikun fiha l-elementi speċifikati fil-modulu rilevanti li jinsab fl-Anness VII u għandha tiġi aġġornata kontinwament. Din għandha titfassal, jew tiġi tradotta, f'lingwa waħda jew aktar meħtieġa mill-Istat Membru li fih l-imballaġġ jitqiegħed fis-suq jew jitqiegħed għad-dispożizzjoni fis-suq.

3.   Meta imballaġġ jew prodott fl-imballaġġ jiġi soġġett għal aktar minn att wieħed tal-Unjoni li jirrikjedi dikjarazzjoni tal-konformità tal-UE, għandha, fejn xieraq, titfassal dikjarazzjoni waħda ta' konformità tal-UE fir-rigward tal-atti kollha tal-Unjoni bħal dawn. Dik id-dikjarazzjoni għandha tiddikjara l-atti tal-Unjoni kkonċernati u r-referenzi tal-pubblikazzjoni tagħhom. Id-dikjarazzjoni tista' tikkonsisti f’fajl magħmul minn dikjarazzjonijiet tal-konformità tal-UE individwali rilevanti.

4.   Meta jfassal id-dikjarazzjoni tal-konformità tal-UE, il-manifattur jassumi r-responsabbiltà għall-konformità tal-imballaġġ mar-rekwiżiti stabbiliti f'dan ir-Regolament.

5.   L-awtoritajiet kompetenti għandhom jagħmlu ħilithom biex jivverifikaw l-akkuratezza ta' mill-anqas parti mid-dikjarazzjonijiet ta' konformità kull sena, ivvalutati b'approċċ ibbażat fuq ir-riskju u għandhom jieħdu l-miżuri meħtieġa biex jindirizzaw in-nuqqas ta' konformità, bħall-irtirar ta' prodotti mhux konformi mis-suq.