Artikolu 6 Implimentazzjoni u forom ta’ finanzjament

1.   Il-Programm Euratom 2026-2027 għandu jiġi implimentat b’ġestjoni diretta f’konformità mar-Regolament Finanzjarju jew b’ġestjoni indiretta mill-korpi tal-finanzjament imsemmija fl-Artikolu 62(1), l-ewwel subparagrafu, il-punt (c), tar-Regolament Finanzjarju.

2.   Il-finanzjament permezz tal-Programm Euratom 2026-2027 jista’ jingħata bi kwalunkwe waħda mill-forom stabbiliti fir-Regolament Finanzjarju; iżda, l-għotjiet għandhom ikunu l-forma ewlenija ta’ appoġġ għall-azzjonijiet indiretti permezz tal-Programm Euratom 2026-2027. Il-finanzjament permezz tal-Programm Euratom 2026-2027 jista’ jingħata wkoll bi premjijiet, b’sejħiet għall-akkwist u bi strumenti finanzjarji f’operazzjonijiet ta’ taħlit.

3.   It-tipi ewlenin ta’ azzjoni li jridu jitwettqu permezz tal-Programm Euratom 2026-2027 huma stipulati u definiti fl-Artikolu 2 tar-Regolament (UE) 2021/695, bħal azzjonijiet ta’ riċerka u innovazzjoni, azzjonijiet ta’ innovazzjoni, azzjonijiet ta’ innovazzjoni u użu fis-suq, azzjonijiet ta’ taħriġ u mobbiltà, azzjonijiet ta’ kofinanzjament tal-programm, azzjonijiet ta’ akkwist prekummerċjali, azzjonijiet ta’ akkwist pubbliku ta’ soluzzjonijiet innovattivi, azzjonijiet ta’ koordinazzjoni u appoġġ, premjijiet ta’ inċentiv u premjijiet ta’ rikonoxximent.

Il-forom tal-finanzjament imsemmija fil-paragrafu 2 ta’ dan l-Artikolu għandhom jintużaw b’mod flessibbli għall-objettivi kollha tal-Programm Euratom 2026-2027, u l-użu tagħhom għandu jiġi ddeterminat skont il-ħtiġijiet u l-karatteristiċi tal-objettivi partikolari.

4.   Il-Programm Euratom 2026-2027 għandu jappoġġa wkoll azzjonijiet diretti mwettqa mill-JRC.