Artikolu 12 Monitoraġġ u rappurtar

1.   Il-Kummissjoni għandha timmonitorja b’mod kontinwu l-ġestjoni u l-implimentazzjoni tal-Programm Euratom 2026-2027. Biex tiżdied it-trasparenza, dik id-data għandha tkun disponibbli għall-pubbliku b’mod aċċessibbli fuq il-paġna web tal-Kummissjoni f’konformità mal-aħħar aġġornament ta’ dik id-data.

L-indikaturi biex isir rappurtar annwali dwar il-progress tal-Programm Euratom 2026-2027 favur l-ilħuq tal-objettivi stabbiliti fl-Artikolu 3 huma stipulati fl-Anness II tul id-direzzjonijiet tal-impatt.

2.   Biex tkun żgurata l-valutazzjoni effettiva tal-progress tal-Programm Euratom 2026-2027 favur il-kisba tal-objettivi tiegħu, il-Kummissjoni għandha tadotta atti ta’ implimentazzjoni dwar l-implimentazzjoni tal-qafas tal-monitoraġġ u tal-evalwazzjoni, b’mod partikolari billi tistabbilixxi linji bażi u miri f’konformità mal-Anness II. Dawk l-atti ta’ implimentazzjoni għandhom jiġu adottati f’konformità mal-proċedura konsultattiva skont l-Artikolu 16(3).

3.   Is-sistema tar-rappurtar dwar il-prestazzjoni għandha tiżgura li d-data għall-monitoraġġ tal-implimentazzjoni u r-riżultati tal-Programm Euratom 2026-2027 tinġabar b’mod effiċjenti, effettiv u fil-ħin mingħajr ma jiżdied il-piż amministrattiv fuq il-benefiċjarji. Għal dak il-għan, għandhom jiġu imposti rekwiżiti tar-rappurtar proporzjonati fuq ir-riċevituri tal-fondi tal-Komunità u, meta xieraq, fuq l-Istati Membri.