Artikolu 15 Bażi tad-data ta’ data relatata mas-sostenibbiltà ambjentali

1.   Sat-2 ta’ Jannar 2032, l-ECHA għandha tistabbilixxi, bħala parti mill-pjattaforma komuni tad-data, bażi tad-data li jkun fiha data relatata mas-sostenibbiltà ambjentali u li jkollha funzjonalitajiet imfassla f’konformità mal-paragrafu 4, li għandha tiġi ġestita minnha.

2.   Fejn il-Kummissjoni jew waħda mill-aġenziji tospita jew iżżomm data relatata mas-sostenibbiltà ambjentali, hija għandha tagħmel dik id-data disponibbli għall-ECHA mingħajr dewmien biex tiġi inkorporata fil-bażi tad-data tad-data relatata mas-sostenibbiltà ambjentali ladarba l-Kummissjoni jew l-aġenzija li tospita jew iżżomm dik id-data tkun lestiet, fejn ikun rilevanti, valutazzjonijiet tal-validità u tal-kunfidenzjalità. Barra minn hekk, l-Istati Membri jew partijiet oħra, inklużi aġenziji nazzjonali, istituti tar-riċerka u organizzazzjonijiet ta’ pajjiżi terzi jistgħu jissottomettu data relatata mas-sostenibbiltà ambjentali lill-ECHA. Il-Kummissjoni u l-Aġenziji għandhom jipprovdu l-kooperazzjoni teknika meħtieġa lill-ECHA biex tali data tkun tista’ tiġi inkorporata fil-bażi tad-data ta’ data relatata mas-sostenibbiltà ambjentali. L-ECHA għandha tipprovdi l-appoġġ meħtieġ lill-Kummissjoni u lill-Aġenziji biex tiffaċilita l-inkorporazzjoni ta’ tali data.

3.   Meta, skont l-Artikolu 5(6), ir-riċerkaturi jew il-konsorzji ta’ riċerka ffinanzjati mill-programmi qafas tal-Unjoni jagħmlu disponibbli għall-ECHA kwalunkwe data relatata mas-sostenibbiltà ambjentali dwar sustanzi kimiċi jew materjali li jiġbru jew jiġġeneraw, l-ECHA għandha tinkorpora dik id-data fil-bażi tad-data ta’ data relatata mas-sostenibbiltà ambjentali.

4.   Sat-2 ta’ Jannar 2029, il-Kummissjoni għandha, f’konsultazzjoni mal-Istati Membri, tfassal il-funzjonalitajiet tal-bażi tad-data u tidentifika settijiet tad-data eżistenti tad-data dwar sustanzi kimiċi dwar data relatata mas-sostenibbiltà ambjentali, għajr id-data kif imsemmija fil-paragrafu 2. Tali data għandha tiġi ospitata u miżmuma mill-ECHA.