Artikolu 12 Fażi tal-għeluq

1.   Wara t-tmiem tal-fażi attiva tal-ittestjar tat-tim l-aħmar, il-kap tat-tim ta’ kontroll għandu jinforma lit-tim il-blu li jkun sar TLPT.

2.   Fi żmien 4 ġimgħat mit-tmiem tal-fażi attiva tal-ittestjar tat-tim l-aħmar, it-testers għandhom jippreżentaw lit-tim ta’ kontroll rapport tat-test tat-tim l-aħmar li jkun fih l-informazzjoni stabbilita fl-Anness V.

3.   It-tim ta’ kontroll għandu jipprovdi r-rapport tat-test tat-tim l-aħmar lit-tim il-blu u lill-maniġers tat-testijiet mingħajr dewmien żejjed.

Fuq talba tal-maniġers tat-testijiet, ir-rapport imsemmi fl-ewwel subparagrafu ma għandux ikun fih informazzjoni sensittiva.

4.   Malli jirċievi r-rapport tat-test tat-tim l-aħmar, u mhux aktar tard minn 10 ġimgħat wara t-tmiem tal-fażi attiva tal-ittestjar tat-tim l-aħmar, it-tim il-blu għandu jippreżenta lit-tim ta’ kontroll rapport tat-test tat-tim il-blu li jkun fih l-informazzjoni stabbilita fl-Anness VI. It-tim ta’ kontroll għandu jipprovdi r-rapport tat-test tat-tim il-blu lit-testers u lill-maniġers tat-testijiet mingħajr dewmien żejjed.

Fuq talba tal-maniġers tat-testijiet, ir-rapport imsemmi fl-ewwel subparagrafu ma għandux ikun fih informazzjoni sensittiva.

5.   Mhux aktar tard minn 10 ġimgħat wara t-tmiem tal-fażi attiva tal-ittestjar tat-tim l-aħmar, it-tim il-blu u t-testers għandhom jirrepetu l-azzjonijiet offensivi u difensivi mwettqa matul it-TLPT. It-tim ta’ kontroll għandu jwettaq ukoll eżerċizzju bl-użu tat-tim il-vjola fuq suġġetti identifikati b’mod konġunt mit-tim il-blu u mit-testers, abbażi tal-vulnerabbiltajiet identifikati matul it-test u, fejn rilevanti, fuq kwistjonijiet li ma setgħux jiġu ttestjati matul il-fażi attiva tal-ittestjar tat-tim l-aħmar.

6.   Wara t-tlestija tal-eżerċizzji ta’ ripetizzjoni u bl-użu tat-tim il-vjola, it-tim ta’ kontroll, it-tim il-blu, it-testers, u l-fornituri tal-intelligence dwar it-theddid għandhom jipprovdu feedback lil xulxin dwar il-proċess tat-TLPT. Il-maniġers tat-testijiet jistgħu jipprovdu feedback.

7.   Hekk kif l-awtorità tat-TLPT tkun innotifikat lill-kap tat-tim ta’ kontroll li tkun ivvalutat li r-rapport tat-test tat-tim il-blu u r-rapport tat-test tat-tim l-aħmar ikun fihom l-informazzjoni stabbilita fl-Annessi V u VI, l-entità finanzjarja għandha fi żmien 8 ġimgħat tippreżenta r-rapport li jiġbor fil-qosor is-sejbiet rilevanti tat-TLPT lill-awtorità tat-TLPT, kif imsemmi fl-Artikolu 26(6) tar-Regolament (UE) 2022/2554, li jkun fih l-elementi stabbiliti fl-Anness VII għall-approvazzjoni.

Fuq talba tal-awtorità tat-TLPT, ir-rapport imsemmi fl-ewwel subparagrafu ma għandux ikun fih informazzjoni sensittiva.