Airteagal 41 Ceanglais éarlaise

Déanfaidh CPL éarlaisí a fhorchur, a ghlaoch agus a bhailiú óna chomhaltaí imréitigh, agus, i gcás inarb iomchuí, ó CPLanna lena bhfuil socruithe idir-inoibritheachta aige chun teorainn a chur lena neamhchosaintí creidmheasa. Beidh na héarlaisí sin leordhóthanach chun neamhchosaintí féideartha a mheasann an CPL a thiocfaidh chun cinn a chumhdach go dtí leachtú na suíomhanna ábhartha. Beidh siad leordhóthanach freisin chun caillteanais a chumhdach a eascraíonn as 99 % ar a laghad de ghluaiseachtaí na neamhchosaintí thar thréimhse ama iomchuí agus áiritheoidh siad go ndéanfaidh CPL a neamhchosaintí a chomhthaobhú go hiomlán lena chomhaltaí imréitigh ar fad, agus, i gcás inarb ábhartha, le CPLanna lena bhfuil socruithe idir-inoibritheachta aige, ar bhonn laethúil ar a laghad. Déanfaidh CPL faireachán agus athbhreithniú leanúnach ar leibhéil a éarlaisí i bhfianaise dhálaí reatha an mhargaidh agus aon iarmhairt chomh-thimthriallach a d’fhéadfadh a bheith ag athbhreithnithe den sórt sin á cur san áireamh.

Glacfaidh CPL samhlacha agus paraiméadair agus a cheanglais éarlaise á socrú aige lena léirítear saintréithe riosca na dtáirgí a imréitítear agus cuirfidh sé san áireamh an tréimhse idir éarlaisí a bhailiú, leachtacht an mhargaidh agus athruithe a d’fhéadfadh a bheith ann i gcaitheamh an idirbhirt. Déanfaidh an t-údarás inniúil na samhlacha agus na paraiméadair a bhailíochtú agus beidh siad faoi réir tuairim ón gcoláiste dá dtagraítear in Airteagal 18 i gcomhréir le hAirteagal 19 agus faoi réir tuairim ó ESMA i gcomhréir le hAirteagal 24a(7), an chéad fhomhír, pointe (bc), agus iad eisithe i gcomhréir leis an nós imeachta a leagtar amach in Airteagal 17b.

Déanfaidh CPL éarlaisí a ghlaoch agus a bhailiú ar bhonn ionlae, ar a laghad nuair a sháraítear tairseacha réamhshainithe. Agus é sin á dhéanamh aige, déanfaidh CPL, a mhéid is féidir, an tionchar a d’fhéadfadh a bheith ag a bhailiúcháin éarlaisí ionlae agus a íocaíochtaí éarlaisí ionlae ar staid leachtachta a rannpháirtithe agus ar athléimneacht an CPL a chur san áireamh. Ní shealbhóidh CPL, a mhéid is féidir, íocaíochtaí éarlaise athrúcháin ionlae tar éis dó na híocaíochtaí uile den sórt sin atá dlite a bhailiú.

Déanfaidh contrapháirtí lárnach éarlaisí a ghlaoch agus a bhailiú a bheidh leormhaith chun an riosca a eascróidh ó na suíomhanna atá cláraithe i ngach cuntas atá á choimeád i gcomhréir le hAirteagal 39 maidir le hionstraimí airgeadais sonracha a chlúdach. Féadfaidh contrapháirtí lárnach éarlaisí a ríomh maidir le punann ionstraimí airgeadais ar choinníoll gur stuama agus daingean í an mhodheolaíocht a bheidh in úsáid.

D'fhonn cur i bhfeidhm comhsheasmhach an Airteagail seo a áirithiú, déanfaidh ÚEUM, tar éis dó dul i gcomhairle le ÚBE agus le CEBC, dréachtchaighdeáin theicniúla rialála a fhorbairt ina sonrófar síos an céatadán iomchuí agus an tréimhse ionchais iomchuí i gcomhair tréimhse leachtachta agus i gcomhair ríomh na luaineachta stairiúla, dá dtagraítear i mír 1, a bheidh le breithniú le haghaidh aicmí éagsúla na n-ionstraimí airgeadais, agus an cuspóir chun comhthimthriallacht a theorannú á chur san áireamh, agus na coinníollacha faoina bhféadfar na cleachtais um éarlaisiú punainne dá dtagraítear i mír 4 a chur chun feidhme.