Airteagal 50b Rialacha ginearálta maidir le ríomh an KCCP

déanfaidh contrapháirtithe lárnacha luach a neamhchosaintí ar a gcomhaltaí imréitigh a ríomh mar seo a leanas:

maidir le hinstitiúidí a thagann faoi raon feidhme Rialachán (AE) Uimh. 575/2013, is ionann na tacair ghlanluachála agus iad siúd a shainmhínítear i bpointe (4) d'Airteagal 272 den Rialachán sin;

déanfaidh contrapháirtí lárnach a bhfuil neamhchosaintí aige ar chontrapháirtí lárnach amháin nó níos mó na neamhchosaintí sin a láimhseáil amhail is gur neamhchosaintí ar chomhaltaí imréitigh iad agus cuirfidh sé aon chorrlach nó ranníocaíochtaí réamh-mhaoinithe a fhaightear ó na contrapháirtithe lárnacha sin san áireamh chun KCCP a ríomh;

measfaidh contrapháirtí lárnach a bhfuil socrú conarthach ceangailteach i bhfeidhm aige lena chomhaltaí imréitigh lena gceadaítear dó an corrlach tosaigh uile a fhaightear óna chomhaltaí imréitigh, nó cuid de, a úsáid mar a bheidís ina ranníocaíochtaí réamh-mhaoinithe, measfaidh sé an corrlach tosaigh sin a bheith ina ranníocaíochtaí réamh-mhaoinithe chun críocha an ríofa i mír 1 agus ní ina chorrlach tosaigh;

i gcás ina sealbhófar comhthaobhacht i gcoinne cuntas ina bhfuil níos mó ná ceann amháin de na cineálacha conartha agus idirbhirt dá dtagraítear in Airteagal 301(1) de Rialachán (AE) 575/2013, déanfaidh na contrapháirtithe lárnacha an corrlach tosaigh a sholáthróidh a gcomhaltaí imréitigh nó a gcliaint, de réir mar is infheidhme, i gcomhréir le EADanna na gcineálacha conartha agus idirbhirt arna ríomh i gcomhréir le pointe (a) den mhír seo, gan an corrlach tosaigh a chur san áireamh sa ríomh;

déanfaidh na contrapháirtithe lárnacha a bhfuil níos mó ná aon chiste mainneachtana amháin acu ríomh ar gach ciste mainneachtana ina aonar;

i gcás ina gcuireann comhalta imréitigh seirbhísí imréitigh ar fáil do chliaint, agus ina gcoinnítear idirbhearta agus comhthaobhacht na gcliant atá ag an gcomhalta imréitigh i bhfochuntais ar leith atá dealaithe ó na cinn a bhaineann le gnólacht dhílsithe an chomhalta imréitigh, déanfaidh na contrapháirtithe lárnacha EADi a ríomh i gcomhair gach fochuntas ar leithligh agus déanfaidh siad EADi iomlán an chomhalta imréitigh a ríomh mar shuim EADanna na bhfochuntas cliant agus EAD fhochuntas gnólachta dílsithe an chomhalta imréitigh;

chun críocha phointe (f), i gcás nach roinntear DFi idir fochuntais na gcliant agus fochuntais gnólachta dílsithe an chomhalta imréitigh, cionroinnfidh na contrapháirtithe lárnacha DFi in aghaidh an fhochuntais de réir an chodáin áirithe atá ag corrlach tosaigh an fhochuntais sin i ndáil leis an gcorrlach tosaigh iomlán arna bhreacadh ag an gcomhalta imréitigh nó i gcomhair chuntas an chomhalta imréitigh;

ní dhéanfaidh na contrapháirtithe an ríomh i gcomhréir le hAirteagal 50a(2) lena leagtar amach gur in airgead tirim amháin a chumhdaíonn an ciste mainneachtana idirbhearta.