Airteagal 51 Comhar le maoirseoirí i dtríú tíortha

1.   Áiritheoidh na Ballstáit go mbeidh maoirseoirí in ann comhaontuithe comhair a thabhairt i gcrích lena bhforálfar do chomhar agus d’fhaisnéis rúnda a mhalartú lena gcontrapháirtithe i dtríú tíortha. Le comhaontuithe comhair den sórt sin, comhlíonfar na rialacha cosanta sonraí is infheidhme agus déanfar iad a thabhairt i gcrích ar bhonn na cómhalartachta agus faoi réir ceanglais rúndachta gairmiúla atá coibhéiseach ar a laghad leis sin dá dtagraítear in Airteagal 67(1). Bainfear feidhm as an bhfaisnéis rúnda a mhalartófar i gcomhréir leis na comhaontuithe comhair sin chun críche cúraimí maoirseachta na n-údarás sin a chomhlíonadh agus chun na críche sin amháin.

I gcás ina dtionscnaítear an fhaisnéis arna malartú i mBallstát eile, ní dhéanfar í a nochtadh gan toiliú sainráite an mhaoirseora a chomhroinn í agus, i gcás inarb iomchuí, chun na gcríoch ar thug an maoirseoir sin a thoiliú ina leith agus chun na gcríoch sin amháin.

2.   Chun críocha mhír 1, soláthróidh AMLA cibé cúnamh is gá chun measúnú a dhéanamh ar choibhéis na gceanglas rúndachta gairmiúla is infheidhme maidir leis an gcontrapháirtí tríú tír.

3.   Áiritheoidh na Ballstáit go dtabharfaidh maoirseoirí fógra faoi aon chomhaontú a shíneofar de bhun an Airteagail seo do AMLA laistigh de 1 mhí amháin ón tráth a shíneofar é.

4.   Faoin 10 Iúil 2029, forbróidh AMLA dréachtchaighdeáin theicniúla cur chun feidhme agus cuirfidh sé faoi bhráid an Choimisiúin iad lena nglacadh. Leis na dréachtchaighdeáin theicniúla cur chun feidhme sin, sonrófar an teimpléad atá le húsáid chun na comhaontuithe comhair dá dtagraítear i mír 1 a thabhairt i gcrích.

Tarmligtear chuig an gCoimisiúin an chumhacht na caighdeáin theicniúla cur chun feidhme dá dtagraítear sa chéad fhomhír a ghlacadh i gcomhréir le hAirteagal 53 de Rialachán (AE) 2024/1620.