Airteagal 36 Fíneálacha

1.   I gcás ina gcinnfidh ESMA gur sháraigh soláthraí rátála ESG, nó, i gcás inarb infheidhme, a ionadaí dlíthiúil, an Rialachán seo d’aon ghnó nó le faillí, glacfaidh sé cinneadh lena bhforchuirfear fíneáil. Is é 10 % de ghlanláimhdeachas bliantúil iomlán an tsoláthraí rátála ESG a bheidh in uasmhéid na fíneála, arna ríomh ar bhonn na ráiteas airgeadais is déanaí atá ar fáil agus arna bhformheas ag comhlacht bainistíochta an tsoláthraí rátála ESG.

2.   Maidir leis an soláthraí rátála ESG dá dtagraítear i mír 1 den Airteagal seo, i gcás inar máthairghnóthas nó fochuideachta máthairghnóthais a bhfuil sé de cheangal air nó uirthi cuntais airgeadais chomhdhlúite a ullmhú i gcomhréir le Treoir 2013/34/AE é, is é a bheidh sa ghlanláimhdeachas bliantúil iomlán ábhartha an glanláimhdeachas bliantúil iomlán, nó an cineál ioncaim comhfhreagrach i gcomhréir le dlí an Aontais is infheidhme i réimse na cuntasaíochta, de réir na gcuntas comhdhlúite is déanaí atá ar fáil agus atá formheasta ag comhlacht bainistíochta an mháthairghnóthais deiridh.

3.   Agus an leibhéal fíneála á chinneadh de bhun mhír 1 den Airteagal seo, cuirfidh ESMA na critéir a leagtar amach in Airteagal 35(5) san áireamh.

4.   D’ainneoin mhír 3, i gcás inar bhain an soláthraí rátála ESG dá dtagraítear i mír 1 tairbhe airgeadais as an sárú go díreach nó go hindíreach, beidh méid na fíneála cothrom leis an tairbhe sin ar a laghad.

5.   I gcás inar mó ná sárú amháin ar an Rialachán seo gníomh nó neamhghníomh soláthraí rátála ESG, ní bheidh feidhm ach ag an bhfíneáil is airde arna ríomh i gcomhréir le mír 2 agus a mhéid a bhaineann le ceann amháin de na sáruithe sin.