Airteagal 30 Comhar le tríú tíortha

Chun críoch Airteagal 29 agus, i gcás ina meastar gur gá, chun críoch Airteagal 28, déanfaidh údaráis inniúla na mBallstát nó ÚEUM, arna iarraidh sin d’údarás inniúil amháin ar a laghad, socruithe comhair a thabhairt i gcrích maidir le malartú faisnéise le húdaráis mhaoirseachta i dtríú tíortha agus oibleagáidí a eascraíonn as an Rialachán seo a fhorfheidhmiú i dtríú tíortha. Ní dhéanfar socruithe comhair a thabhairt i gcrích le tríú tír atá, i gcomhréir le gníomh tarmligthe atá i bhfeidhm arna ghlacadh ag an gCoimisiún de bhun Airteagal 9 de Threoir (AE) 2015/849 ó Pharlaimint na hEorpa agus ón gComhairle ( 17 ), ar liosta na ndlínsí a bhfuil easnaimh straitéiseacha ina gcóras náisiúnta chun an sciúradh airgid agus maoiniú na sceimhlitheoireachta a chomhrac ar bagairtí suntasacha iad ar chóras airgeadais an Aontais nó atá liostaithe in Iarscríbhinn I a ghabhann le liosta an Aontais de dhlínsí neamh-chomhoibríocha chun críoch cánach. Áiritheofar leis na socruithe comhair sin malartú éifeachtúil faisnéise, ar a laghad, lena ligfear do na húdaráis inniúla a ndualgais a chomhlíonadh faoin Rialachán seo.

Chun críoch Airteagal 29 agus, i gcás ina meastar gur gá, chun críoch Airteagal 28, éascóidh agus comhordóidh ÚEUM forbairt na socruithe comhair idir na húdaráis inniúla agus na húdaráis mhaoirseachta ábhartha i dtríú tíortha. Éascóidh agus comhordóidh ÚEUM freisin, i gcás inar gá, malartú na faisnéise a fhaightear ó údaráis mhaoirseachta i dtríú tíortha idir na húdaráis inniúla, faisnéis a d’fhéadfadh a bheith ábhartha maidir le bearta a dhéanamh faoi Airteagail 38 agus 39.

Ní fhéadfar socruithe comhair maidir le malartú faisnéise a thabhairt i gcrích le húdaráis mhaoirseachta tríú tíortha ach amháin i gcás ina bhfuil an fhaisnéis a nochtar faoi réir ráthaíochtaí rúndachta gairmiúla atá coibhéiseach ar a laghad leis na ráthaíochtaí a leagtar amach in Airteagal 35. Beidh malartú faisnéise den sórt sin beartaithe chun cúraimí na n-údarás maoirseachta sin a chur i gcrích.

Tugtar de chumhacht don Choimisiún gníomhartha tarmligthe a ghlacadh i gcomhréir le hAirteagal 44 chun an Rialachán seo a fhorlíonadh trí inneachar íosta na socruithe comhair dá dtagraítear i mír 1 den Airteagal seo agus sa doiciméad teimpléid atá le húsáid le haghaidh na socruithe comhair sin a chinneadh.