Artikolu 30 Kooperazzjoni ta’ pajjiżi terzi

Għall-fini tal-Artikolu 29 u, fejn ikun meħtieġ, għall-fini tal-Artikolu 28, l-awtoritajiet kompetenti tal-Istati Membri jew l-EMSA, fuq it-talba ta’ mill-inqas awtorità kompetenti waħda, għandhom jikkonkludu arranġamenti ta’ kooperazzjoni dwar l-iskambju ta’ informazzjoni mal-awtoritajiet superviżorji f’pajjiżi terzi u l-infurzar tal-obbligi li jirriżultaw skont dan ir-Regolament fil-pajjiżi terzi. L-arranġamenti ta’ kooperazzjoni ma għandhomx jiġu konklużi ma’ pajjiż terz li, f’konformità ma’ att delegat fis-seħħ adottat mill-Kummissjoni skont l-Artikolu 9 tad-Direttiva (UE) 2015/849 tal-Parlament Ewropew u tal-Kunsill ( 17 ), jinsab fil-lista ta’ ġuriżdizzjonijiet li għandhom nuqqasijiet strateġiċi fir-reġimi nazzjonali tagħhom tal-ġlieda kontra l-ħasil tal-flus u kontra l-finanzjament tat-terroriżmu li huma ta’ theddid sinifikanti għas-sistema finanzjarja tal-Unjoni, jew li jkun elenkat fl-Anness I tal-lista tal-UE ta’ ġuriżdizzjonijiet li ma jikkooperawx għal finijiet ta’ taxxa. Dawn l-arranġamenti ta’ kooperazzjoni għandhom jiżguraw mill-inqas skambju effiċjenti ta’ informazzjoni li jippermetti lill-awtoritajiet kompetenti jwettqu d-dmirijiet tagħhom skont dan ir-Regolament.

Għall-finijiet tal-Artikolu 29 u, fejn ikun meħtieġ, għall-finijiet tal-Artikolu 28, l-ESMA għandha tiffaċilita u tikkoordina l-iżvilupp ta’ arranġamenti ta’ kooperazzjoni bejn l-awtoritajiet kompetenti u l-awtoritajiet superviżorji rilevanti ta’ pajjiżi terzi. L-ESMA għandha wkoll, fejn ikun meħtieġ, tiffaċilita u tikkoordina l-iskambju bejn l-awtoritajiet kompetenti tal-informazzjoni miksuba mill-awtoritajiet superviżorji ta’ pajjiżi terzi li tista’ tkun rilevanti għall-adozzjoni ta’ miżuri skont l-Artikoli 38 u 39.

L-arranġamenti ta’ kooperazzjoni dwar l-iskambju ta’ informazzjoni ma’ awtoritajiet superviżorji ta’ pajjiżi terzi jistgħu jiġu konklużi biss meta l-informazzjoni żvelata tkun soġġetta għal garanziji ta’ segretezza professjonali li jkunu tal-anqas ekwivalenti għal dawk stabbiliti fl-Artikolu 35. Dan l-iskambju ta’ informazzjoni għandu jkun intenzjonat għat-twettiq tal-kompiti ta’ dawk l-awtoritajiet superviżorji.

Il-Kummissjoni għandha s-setgħa li tadotta atti delegati f’konformità mal-Artikolu 44 sabiex tissupplimenta dan ir-Regolament billi tiddetermina l-kontenut minimu tal-arranġamenti ta’ kooperazzjoni msemmijin fil-paragrafu 1 ta’ dan l-Artikolu u d-dokument mudell li għandu jintuża għal arranġamenti ta’ kooperazzjoni bħal dawn.