Airteagal 46 Creat Eorpach um dheimhniú cibearshlándála

Bunófar an creat Eorpach um dheimhniú cibearshlándála chun na dálaí maidir le feidhmiú an mhargaidh inmheánaigh a fheabhsú trí leibhéal na cibearshlándála a mhéadú laistigh den Aontas agus trí ligean do chur chuige comhchuibhithe a bheith ann ar leibhéal an Aontais i dtaca le scéimeanna Eorpacha um dheimhniú cibearshlándála, d’fhonn margadh aonair digiteach a chruthú le haghaidh táirgí TFC, seirbhísí TFC, próisis TFC agus seirbhísí slándála bainistithe.

Leis an gcreat Eorpach um dheimhniú cibearshlándála, déanfar foráil maidir le sásra chun scéimeanna Eorpacha um dheimhniú cibearshlándála a bhunú agus chun a fhianú go gcomhlíonann na táirgí TFC, seirbhísí TFC agus próisis TFC a ndearnadh meastóireacht orthu i gcomhréir le scéimeanna den sórt sin ceanglais shonraithe slándála chun infhaighteacht, barántúlacht, sláine nó rúndacht sonraí atá stóráilte nó tarchurtha nó próiseáilte nó na bhfeidhmeanna nó na seirbhísí a chuirtear ar fáil leis na táirgí, seirbhísí agus próisis sin, nó atá inrochtana tríothu, a chosaint ar feadh a saolré. Ina theannta sin, fianófar leis go gcomhlíonann seirbhísí slándála bainistithe a ndearnadh meastóireacht orthu i gcomhréir le scéimeanna den sórt sin ceanglais shonraithe slándála chun infhaighteacht, barántúlacht, sláine agus rúndacht sonraí a chosaint ar sonraí iad a bhfaightear rochtain orthu, a phróiseáiltear, a stóráiltear nó a tharchuirtear maidir le soláthar na seirbhísí sin, agus go soláthraíonn baill foirne a bhfuil leibhéal leordhóthanach agus iomchuí eolais theicniúil ábhartha agus ionracais ghairmiúil ábhartha acu na seirbhísí sin go leanúnach leis an inniúlacht, an saineolas agus an taithí is gá.