Airteagal 3 Sainmhínithe

ciallaíonn “údarás inniúil” údarás nó comhlacht atá ainmnithe ag Ballstát chun a chuid oibleagáidí faoin Rialachán seo a chomhlíonadh i dtaca le ceadanna a dheonú i ndáil le táirgeadh agus/nó soláthar uisce athshlánaithe, i dtaca le díolúintí do thionscadail taighde nó tionscadail phíolótacha, agus i dtaca le seiceálacha ar chomhlíonadh;

ciallaíonn “úsáideoir deiridh” duine nádúrtha nó dlítheanach, cibé an eintiteas poiblí nó príobháideach é, a úsáideann uisce athshlánaithe le haghaidh uisciú talmhaíochta;

ciallaíonn “fuíolluisce uirbeach” fuíolluisce uirbeach mar a shainmhínítear é i bpointe (1) d’Airteagal 2 de Threoir 91/271/CEE;

ciallaíonn “uisce athshlánaithe” fuíolluisce uirbeach a cóireáladh i gcomhlíonadh na gceanglas a leagtar amach i dTreoir 91/271/CEE agus a eascraíonn as cóireáil bhreise i saoráid athshlánaithe i gcomhréir le Roinn 2 d’Iarscríbhinn I a ghabhann leis an Rialachán seo;

ciallaíonn “saoráid athshlánaithe” gléasra cóireála fuíolluisce uirbigh nó saoráid eile a dhéanann cóireáil bhreise ar fhuíolluisce uirbeach ar cóireáil í a chomhlíonann na ceanglais a leagtar amach i dTreoir 91/271/CEE chun uisce a tháirgeadh atá oiriúnach le haghaidh úsáid a shonraítear i Roinn 1 d’Iarscríbhinn I a ghabhann leis an Rialachán seo;

ciallaíonn “oibreoir saoráide athshlánaithe” duine nádúrtha nó dlítheanach, a dhéanann ionadaíocht ar eintiteas príobháideach nó ar údarás poiblí, a oibríonn nó a rialaíonn saoráid athshlánaithe;

ciallaíonn “guais” oibreán bitheolaíoch, cheimiceach, fhisiceach nó raideolaíoch a bhfuil d’acmhainn aici dochar a dhéanamh do dhaoine, d’ainmhithe, do bharra nó do phlandaí, do bhithraí talún eile, do bhithraí uisceacha, d’ithreacha nó don chomhshaol i gcoitinne;

ciallaíonn “riosca” an dóchúlacht go ndéanfaidh guaiseacha sainaitheanta dochar i dtréimhse shonraithe, lena n-áirítear déine na n-iarmhairtí;

ciallaíonn “bainistiú riosca” cineál córasach bainistithe a áirithíonn go comhsheasmhach go bhfuil athúsáid uisce sábháilte i gcomhthéacs sonrach;

ciallaíonn “beart coisctheach” gníomhaíocht iomchuí is féidir riosca sláinte nó comhshaoil a chosc nó a dhíchur, nó ar féidir léi riosca den sórt sin a laghdú go leibhéal inghlactha;

ciallaíonn “pointe comhlíonta” an pointe mar a sheachadann oibreoir saoráide athshlánaithe uisce athshlánaithe chuig an gcéad ghníomhaí eile sa slabhra;

ciallaíonn “bacainn” aon mheán, lena n-áirítear céimeanna fisiciúla nó céimeanna a bhaineann le próiseas nó coinníollacha úsáide, lena ndéantar riosca ionfhabhtaithe don duine a laghdú nó a chosc trí theagmháil a chosc idir uisce athshlánaithe agus táirge atá le hionghabháil agus na daoine atá nochta go díreach, nó meáin eile lena laghdaítear, mar shampla, dlús na miocrorgánach san uisce athshlánaithe nó lena gcuirtear cosc orthu maireachtáil den táirge atá le hionghabháil;

ciallaíonn “cead” údarú i scríbhinn arna eisiúint ag údarás inniúil chun uisce athshlánaithe a tháirgeadh nó a sholáthar le haghaidh uisciú talmhaíochta i gcomhréir leis an Rialachán seo;

ciallaíonn “páirtí freagrach” páirtí a dhéanann ról nó gníomhaíocht sa chóras athúsáide uisce, lena n-áirítear an t-oibreoir saoráide athshlánaithe, an t-oibreoir gléasra cóireála fuíolluisce uirbigh i gcás nach ionann é agus an t-oibreoir saoráide athshlánaithe, an t-údarás ábhartha seachas an t-údarás inniúil ainmnithe, an t-oibreoir dáileacháin uisce athshlánaithe nó an t-oibreoir stórála uisce athshlánaithe;

ciallaíonn “córas athúsáide uisce” an bonneagar agus na heilimintí teicniúla eile atá riachtanach chun uisce athshlánaithe a tháirgeadh, a sholáthar agus a úsáid; is é atá ann na heilimintí go léir ó phointe iontrála an ghléasra cóireála fuíolluisce uirbigh go dtí an pointe a bhaintear úsáid as uisce athshlánaithe le haghaidh uisciú talmhaíochta, lena n-áirítear an bonneagar dáilte agus stórála, i gcás inarb iomchuí.