Airteagal 6 Sásra inbhuanaitheachta

1.   In imthosca sonracha agus eisceachtúla, d’fhonn inbhuanaitheacht a shamhla muirearaithe baile a áirithiú, i gcás nach féidir le soláthraí seirbhísí fánaíochta a chuid costas iomlán iarbhír agus a chuid costas réamh-mheasta a bhaineann le seirbhísí fánaíochta rialáilte a sholáthar i gcomhréir le hAirteagal 4 agus Airteagal 5 a aisghabháil as a ioncam foriomlán iarbhír agus réamh-mheasta ó na seirbhísí sin a sholáthar, féadfaidh an soláthraí seirbhísí fánaíochta sin iarratas a dhéanamh ar údarú formhuirear a chur i bhfeidhm. Ní chuirfear an formhuirear sin i bhfeidhm ach a mhéid is gá chun aisghabháil a dhéanamh ar na costais a bhaineann le seirbhísí fánaíochta miondíola rialáilte a sholáthar, ag féachaint do na muirir uasta mhórdhíola is infheidhme.

2.   I gcás ina gcinnfidh soláthraí seirbhísí fánaíochta leas a bhaint as mír 1 den Airteagal seo, déanfaidh sé iarratas a chur faoi bhráid an údaráis rialála náisiúnta gan mhoill agus tabharfaidh sé an fhaisnéis uile is gá dó i gcomhréir leis na gníomhartha cur chun feidhme dá dtagraítear in Airteagal 7. Gach 12 mhí ina dhiaidh sin, déanfaidh an soláthraí seirbhísí fánaíochta an fhaisnéis sin a nuashonrú agus a chur faoi bhráid an údaráis rialála náisiúnta.

3.   Ar iarratas de bhun mhír 2 a fháil, déanfaidh an t-údarás rialála náisiúnta measúnú le fíorú an bhfuil sé suite ag an soláthraí seirbhísí fánaíochta nach bhfuil sé in ann a chostais a aisghabháil i gcomhréir le mír 1, agus é mar éifeacht leis sin go mbainfí an bonn ó inbhuanaitheacht a shamhla muirearaithe baile. Beidh an measúnú ar inbhuanaitheacht na samhla muirearaithe baile bunaithe ar thosca oibiachtúla ábhartha a bhaineann go sonrach leis an soláthraí seirbhísí fánaíochta, lena n-áirítear éagsúlachtaí oibiachtúla idir soláthraithe seirbhísí fánaíochta atá sa Bhallstát lena mbaineann agus leibhéal na bpraghsanna agus na n-ioncam baile. Déanfaidh an t-údarás rialála náisiúnta an formhuirear a údarú i gcás ina gcomhlíontar na coinníollacha a leagtar síos i mír 1 agus sa mhír seo.

4.   Laistigh de 1 mhí tar éis dó iarratas a fháil de bhun mhír 2, údaróidh an t-údarás rialála náisiúnta an formhuirear, mura rud é gur follasach go bhfuil an t-iarratas gan bhunús nó nach leor an fhaisnéis a sholáthraítear ann. I gcás ina measfaidh an t-údarás rialála náisiúnta gur follasach go bhfuil an t-iarratas gan bhunús, nó ina measfaidh sé nach leor an fhaisnéis a soláthraíodh, déanfaidh sé cinneadh críochnaitheach, laistigh de thréimhse 2 mhí bhreise tar éis dó deis éisteachta a thabhairt don soláthraí seirbhísí fánaíochta, chun an formhuirear a údarú nó a leasú nó chun diúltú dó.