Airteagal 9 Muirir mhórdhíola chun glaonna fánaíochta rialáilte a dhéanamh

1.   Maidir leis an meánmhuirear mórdhíola a fhéadfaidh oibreoir an líonra a bhfuil cuairt á tabhairt air a thobhach ar sholáthraí seirbhísí fánaíochta chun glao fánaíochta rialáilte a sholáthar a thosaíonn ar an líonra a bhfuil cuairt á tabhairt air, lena n-áirítear, inter alia, costais tosaithe, idirthurais agus foirceanta, ní rachaidh sé thar theorainn choimirce EUR 0,022 in aghaidh an nóiméid. Laghdófar an muirear mórdhíola uasta go dtí EUR 0,019 in aghaidh an nóiméid an 1 Eanáir 2025 agus, gan dochar d’Airteagal 21, leanfaidh sé de bheith cothrom le EUR 0,019 in aghaidh an nóiméid go dtí an 30 Meitheamh 2032.

2.   Beidh feidhm ag an meánmhuirear mórdhíola dá dtagraítear i mír 1 idir aon dá oibreoir agus déanfar é a ríomh thar thréimhse 12 mhí nó thar aon tréimhse níos giorra ná sin a fhéadfaidh a bheith fágtha roimh dheireadh na tréimhse ina bhfuil feidhm ag meánmhuirear mórdhíola uasta dá bhforáiltear i mír 1 nó roimh an 30 Meitheamh 2032.

3.   Déanfar an meánmhuirear mórdhíola dá dtagraítear i mír 1 a ríomh tríd an ioncam iomlán a fhaightear ó fhánaíocht mhórdhíola a roinnt ar líon iomlán na nóiméad fánaíochta mórdhíola a úsáideann an t-oibreoir ábhartha go hiarbhír chun glaonna fánaíochta mórdhíola a sholáthar laistigh den Aontas sa tréimhse ábhartha, arna chomhiomlánú mar shuim in aghaidh an tsoicind arna coigeartú chun aird a thabhairt ar an bhféidearthacht go ndéanfaidh oibreoir an líonra a bhfuil cuairt á tabhairt air tréimhse íosta muirir tosaigh nach faide ná 30 soicind a chur i bhfeidhm.