Airteagal 11 Muirir mhórdhíola ar sheirbhísí fánaíochta sonraí rialáilte

1.   Maidir leis an meánmhuirear mórdhíola a fhéadfaidh oibreoir an líonra a bhfuil cuairt á tabhairt air a thobhach ar an soláthraí seirbhísí fánaíochta as seirbhísí fánaíochta sonraí rialáilte a sholáthar trí bhíthin an líonra a bhfuil cuairt á tabhairt air, ní rachaidh sé thar theorainn choimirce EUR 2,00 in aghaidh an ghigibhirt sonraí a tarchuireadh. Laghdófar an muirear mórdhíola uasta sin go EUR 1,80 in aghaidh an ghigibhirt sonraí a tharchuirtear an 1 Eanáir 2023, go EUR 1,55 in aghaidh an ghigibhirt an 1 Eanáir 2024, go EUR 1,30 in aghaidh an ghigibhirt an 1 Eanáir 2025, go EUR 1,10 in aghaidh an ghigibhirt an 1 Eanáir 2026 agus go EUR 1,00 in aghaidh an ghigibhirt faoin 1 Eanáir 2027, agus ina dhiaidh sin, gan dochar d’Airteagal 21, fanfaidh sé ag EUR 1,00 in aghaidh an ghigibhirt sonraí a tharchuirtear go dtí an 30 Meitheamh 2032.

2.   Beidh feidhm ag an meánmhuirear mórdhíola dá dtagraítear i mír 1 idir aon dá oibreoir agus déanfar é a ríomh thar thréimhse 12 mhí nó thar aon tréimhse níos giorra ná sin a fhéadfaidh a bheith fágtha roimh dheireadh na tréimhse ina bhfuil feidhm ag meánmhuirear mórdhíola uasta dá bhforáiltear i mír 1 nó roimh an 30 Meitheamh 2032.

3.   Déanfar an meánmhuirear mórdhíola dá dtagraítear i mír 1 a ríomh tríd an ioncam mórdhíola iomlán a fhaigheann oibreoir an líonra a bhfuil cuairt á tabhairt air nó oibreoir an líonra baile as seirbhísí fánaíochta sonraí rialáilte a sholáthar sa tréimhse ábhartha a roinnt ar líon iomlán na meigibheart sonraí a thomhlaítear go hiarbhír trí na seirbhísí sin a sholáthar laistigh den tréimhse sin, arna gcomhiomlánú ar bhonn ráta in aghaidh an chilibhirt thar ceann an tsoláthraí seirbhísí fánaíochta ábhartha nó oibreoir ábhartha an líonra baile laistigh den tréimhse sin.